लिम्पियाधुराका नाममा

A+ A A-

म विश्वको सबैभन्दा अग्लो हिमाल सगरमाथाको छाँयामा हुर्किएँ र बुद्धको यो भूमिमा मैले आफ्ना संस्कारहरु सिकेँ ।

म पनि मेरो देश र माटोलाई त्यति नै माया गर्छु जति तपाईले आफ्नो देशलाई माया गर्नुहुन्छ । तपाईंको देशको सिमानामा अर्को देशको सेनाले कव्जा जमायो भनें तपाईलाई कस्तो लाग्छ ? अहिले मैले महसुस गरिरहेको छु, देशको माटोमा पराईले कव्जा जमाउँदा कति पीडा हुन्छ भनेर ।

मेरो देश सानो छ । हो हामी गरिब छौं । हामी कमजोर छौं । तर के यो २१औं शताव्दीको विश्व माछा पोखरी हो र ? के यहाँ पनि ठूला माछाहरुले सानो माछाहरुलाई खाने गर्दछन् ? के सानो देशहरुको सार्वभौमिकताको महत्व हुँदैन ?

म सानो देशको सानो मान्छे हुँ । मलाई विश्व राजनीति थाहा छैन तर मलाई यति थाहा छ कि मेरो देशलाई म प्यासिफिक समुन्द्रको पानीको मात्रा भन्दा हजारौं गुणा धेरै माया गर्छु ।

मलाई मेरो देश घुम्न आउने, संस्कार हेर्न आउने पर्यटकहरु आउँदा खुशी लाग्छ तर चोरडाँका झैं कव्जा जमाउन मेरो माटोमा लुकेर अनि छल गरेर छिरेका मान्छेहरु मलाई पटक्कै मन पर्दैन ।

मलाई भारतसँग कुनै घृणा छैन । हाम्रो देशका मान्छेहरुको भारतसँग रोटी बेटीको नाता छ । तर भारतीय नेतृत्वको सामन्तवादी नीति र मेरो सिमानाको मिचाहा प्रवृतिसँग मेरो चित्त दुखाई छ ।

मेरो परिवारको इतिहास बुझ्दा जिज्यूबुवा पनि भारतको ईलाहवाद विश्वविद्यालयमा पढाउनुहुन्थ्यो रे । मैले नेपाल भारत सम्वन्धका धेरै शानदार किस्साहरु सुनेको छु । देखेको छु । अनि दुबै देशका नागरिकहरु बीचको सम्वन्धको मिठास पनि अनुभव गरेको छु ।

मलाई हिन्दी गीत र चलचित्र पनि मन नपर्ने हैन । तर आजभोलि गीत सुन्न र चलचित्र हेर्न मन लाग्दैन । मलाई मेरो सिमानामा बसेका मिचाहाको मात्र सम्झना आउँछ । भित्र मनमा धेरै तीतो महसुस भएको छ ।

विश्वभरिका साथीहरु, के सानो देशलाई स्वतन्त्र हुने अधिकार छैन? नेपाल त कहिलेपनि कुनै पनि देश या शक्तिको उपनिवेश नभएको इतिहास भएको देश हो ।

यो सुन्दर देश अहिले साँच्चै दुःखमा छ । नेपालीले गोर्खाली सेनाका भूमिकामा विश्वयुद्धमा निकै साहस देखाए । अहिलेपनि विश्वका धेरै ठूला देशहरुमा सेनाका रुपमा नेपालीहरु छन् । मपनि तिनै नेपाली मध्ये हुँ, मलाई गोली र बमसँग डर लाग्दैन तर म मायामा विश्वास गर्छु ।

मलाई आशा छ भारतले मलाई मेरो सीमाको सम्मान गरेर एउटा माया गर्ने कारण दिनेछ । मलाई मेरो लिपुलेक, कालापानी र लिम्पियाधुराको माया छ ।
युद्ध र घृणामा विश्वास नभएका यहाँहरु सबैजनाको माया र साथ अनि समर्थन चाहिएको छ । फुर्सद हुँदा नेपाल घुम्न आउनुहोला । मलगायत सबै नेपाली यहाँलाई स्वागत गर्न तम्तयार छौं ।

मेरो देशको स्वाभिमान खोसिनु भनेको विश्वमा सबै देशहरुको अस्तित्व भोलिका दिनमा संकट पर्नसक्नु हो । हामी जहाँ भएपनि एउटै ग्रहमा छौं । आउनुहोस् आधुनिक युद्धको साम्राज्यवादको विरुद्धमा सबैजना एक हौं । नेपाली हिमालका चिसो हावाबाट न्यानो माया ।

पृथ्वी गोलो छ, जीवन लामो छ अनि यहाँ धेरै दोवाटाहरु छन्, कुनै न कुनै दोवाटोमा हाम्रो भेट अवश्य हुनेछ ।
जय नेपाल ।

मलाई सुन्न यो भिडियो हेर्नुहोला है