विपक्षी मोर्चा कस्ने प्रचण्डको रणनीति, राप्रपा र रास्वपाले साथ देलान् ?

नेकपा माओवादी केन्द्रका अध्यक्ष पुष्पकमल दाहाल प्रचण्डले विपक्षी दलहरूको माेर्चालाई बलियो पार्ने रणनीति लिएका छन् । त्यसका लागि उनले समाजवादी मोर्चामा दलहरूको संख्या बढाउन चाहेका छन् । माेर्चामा आबद्ध नहुने दलहरूलाई पनि उनले एजेन्डामा एकढिक्का राख्ने प्रयास गरिरहेका छन् । विपक्षमा रहेका दलहरूलाई एकठाउँमा राख्न प्रयास गरिरहेका प्रचण्डले आफ्नाे पार्टीका संगठनहरूलाई पनि आक्रामक बनाउन खोजिरहेका छन् ।

त्यसकै उपज हुनुपर्छ उनले माओवादी केन्द्रक्रो विद्यार्थी संगठन अखिल क्रान्तिकारीलाई सडकमा बाघ बनेर निस्कन निर्देशन दिएका छन् । बिहीबार क्रान्तिकारीको २३औँ राष्ट्रिय सम्मेलनको उद्घाटन गर्दै प्रचण्डले भने, 'म संसदमा सिंह बनेको छु । अखिल क्रान्तिकारीले सडकमा बाघ बनेर निस्कनुपर्‍याे ।'

प्रचण्डको यो अभिव्यक्तिले अब उनी संसदमा मात्र होइन, सडकबाट पनि केपी शर्मा ओली नेतृत्वको सरकारलाई दबाबमा राख्न चाहन्छन् भन्ने देखाउँछ । माओवादी केन्द्रका उपाध्यक्ष तथा प्रवक्ता अग्नि सापकोटाले जनताका समस्यालाई लिएर प्रतिपक्षहरूलाई साथमा लिँदै पार्टी अगाडि बढ्ने बताए ।

उनले भने, ‘यो सरकार सुरुबाट नै सुशासनको विरुद्धमा उभिएको छ । जनताका सरोकारका विषयप्रति चासो राखेको छैन । भ्रष्टाचारीलाई कारबाही गर्नुको सट्टा विद्युत् प्राधिकरणमा कुलमान घिसिङलाई हटाउन खोज्यो । यसका विरुद्ध दसैँतिहारपछि संसद र सडकबाट प्रतिपक्षको मोर्चा बनाएर जान्छौँ । त्यो मोर्चामा माओवादी, नेकपा एकीकृत समाजवादी, राष्ट्रिय स्वतन्त्र पार्टी हुन्छौँ होला ।'

प्रचण्डले अहिले तीन तरिकाले आफू बलियो हुने रणनीति अपनाएका छन् । पहिलो समाजवादी मोर्चाबाट समाजवाद भन्ने शक्तिहरू एक ठाउँमा उभिने । मोर्चामा माओवादी केन्द्र, नेकपा एकीकृत समाजवादी, विप्लव नेतृत्वको नेकपा र महेन्द्र राय यादव नेतृत्वको नेसपा सहभागी छ । उपेन्द्र यादव नेतृत्वको जसपालाई पनि पुनः मोर्चामा ल्याउने तयारीमा प्रचण्ड छन् ।

दोस्रो, माओवादी शक्तिहरू र वामपन्थीहरूबीच एकता गरेर बलियो शक्ति हुने । त्यसका लागि विप्लव नेतृत्वको नेकपा, धर्मेन्द्र बाँस्तोला नेतृत्वको नेकपा बहुमतसँग एकता गर्ने मनसाय प्रचण्डको छ । यदि सरकारले दल विभाजनसम्बन्धी अध्यादेश ल्याउने तयारी गरेमा त्योभन्दा पहिला नै अस्तित्व संकटमा रहेको नेकपा एससँग एकता गर्ने रणनीति पनि प्रचण्डको छ ।

र तेस्रो, प्रतिपक्षमा भएका र मोर्चामा आउन सक्ने चारवटा शक्ति एक ठाउँमा आउने, जसमा माओवादी, रास्वपा, नेकपा एस र जसपा छन् । यसका साथै प्रतिपक्षमा रहेको राप्रपासँग पनि सम्बन्ध सुधारेर जाने ।

के भन्छन् अन्य दल ?

सरकारले गरेका गलत कामका विरुद्धमा प्रतिपक्षहरू एक ठाउँमा उभिएर खबरदारी गर्नुपर्ने नेकपा एसका उपाध्यक्ष जगन्नाथ खतिवडा बताउँछन् । उनले भने, ‘सरकारले गरेका गलत कामका विरुद्ध खबरदारी गर्ने हाम्रो पार्टीको नीति नै छ । प्रतिपक्षहरूबीच पनि सहकार्य हुन सक्छ । अहिले प्रतिपक्षहरूबीच कसरी जाने भन्नेबारेमा छलफल भएको छैन । छलफल भएमा प्रतिपक्षको सशक्त शक्ति बन्न सक्छ ।’

माओवादी उपाध्यक्ष सापकोटा एजेन्डा मिल्ने, समाजवादी विचार भएका बीच सहकार्य गर्ने गरी छलफल चलाउने तयारी भएको बताउँछन् । उनले भने, ‘समाजवादी कार्यक्रमका लागि विचार मिल्नेहरू मिल्छौँ । केही एजेन्डा मिल्नेहरूसँग पनि मोर्चा बनाएर संसद र सडकबाट खबरदारी गर्छौं । त्यसका लागि आन्तरिक तयारी गरीरहेका छौँ ।’

सरकारका विरुद्ध माओवादीले जस्तै राष्ट्रिय स्वतन्त्र पार्टी रास्वपाले पनि सडक आन्दोलन गर्ने घोषणा गरेको छ । अहिलेसम्म माओवादी र रास्वपा संसदमा एक ठाउँमा उभिएका छन् । कांग्रेस–एमाले गठबन्धन सरकारले उपसभामुख इन्दिरा रानामगरलाई हटाउने तयारी गर्दा रास्वपा मात्र होइन, माओवादी पनि विरोधमा उभिएको थियो ।

माओवादी–एमाले गठबन्धन हुँदा तत्कालीन प्रधानमन्त्री प्रचण्डले संसदबाट नै सहकारी ठगी प्रकरणमा रास्वपा सभापति रवि लामिछानेको कुनै संलग्नता नभएको ठोकुवा गरेका थिए । संसदबाट प्रचण्डले रविको बचाउ गर्दा रवि सरकारका गृहमन्त्री थिए । अहिले दुवै प्रतिपक्षमा पुगेका छन् । सरकारविरुद्धको खबरदारीमा प्रचण्डले रास्वपालाई साथमा लिन चाहेका छन् ।

नेकपा एसका उपमहासचिव रामकुमार भट्टराई पनि दसैँतिहारपछि संसदमा र संसदबाहिर पनि प्रतिपक्षहरूको मोर्चा बन्न सक्ने बताउँछन् । उनले भने, ‘सुशासनका विषयमा, महँगीका विषयमा, संसदमा गैरसंसदीय कामका विषयमा प्रतिपक्षको मोर्चा बन्न सक्छ । सबै दलहरूले आआफ्नो दलमा छलफल गरिरहेका छन् । दसैँतिहारपछि एकमुष्ट रूपमा छलफल भएर मोर्चा बन्न सक्छ । बन्न आवश्यक पनि छ ।’

प्रतिपक्ष दलमध्येको राप्रपाले पनि आन्दोलनको घोषणा गरेको छ । तर, अहिले नै राप्रपासँग मोर्चा बनाउने बारेमा कुनै छलफल नभएको माओवादी केन्द्रका प्रवक्ता सापकोटा बताउँछन् । तर केही दिनपहिला राप्रपा उपाध्यक्ष रवीन्द्र मिश्रले प्रचण्डसँग भेटेर छलफल गरेका थिए । प्रचण्ड निवास खुमलटारमा दुई नेताबीच भएको छलफलका बारेमा मिश्रले सामाजिक सञ्जालबाट सार्वजनिक गरेका थिए । मिश्रले प्रचण्ड र आफूबीच भएका कुराकानी भन्दै सार्वजनिक गरेपछि प्रचण्ड सचिवालयले खण्डन गरेको थियो । तर, राप्रपाले पनि सरकारविरुद्ध आन्दोलन गर्ने र एजेन्डा मिलेका विषयमा माओवादीलगायत पार्टीसँग सहकार्य गर्न तयार रहेको बुझिएको छ ।

प्रकाशित मिति: शुक्रबार, असोज ११, २०८१ २०:३४