काठमाडौंमा बैंकिङ एक्स्पो, एउटै छानामुनि सबै जानकारी

फाइल तस्वीर (सन् २०१७ मा काठमाडाैंमा पहिलाे पटक आयोजित बैंकिङ एक्स्पाेकाे उद्घाटन गर्दै गभर्नर र बैकर्स)

A+ A A-

वित्तीय तथा बीमा साक्षरताको क्षेत्रमा क्रियाशील मिडिया इन्टरनेसनलले काठमाडौंमा तेस्रो पटक बैंक, बीमा र पुँजीबजारसम्बन्धी प्रदर्शनी (बैंकिङ एक्स्पो २०१९) को आयोजना गर्दैछ । भृकुटीमण्डवमा आगामी मंसिर १ र २ मा हुने प्रदर्शनीमा बैंक, बीमा र पुँजीबजारसम्बन्धी सम्पूर्ण जानकारी दिइने मिडिया इन्टरनेसनलका अध्यक्ष माधव निर्दोषले जानकारी दिए ।

यसअघिका कार्यक्रम फलदायी भएको भन्दै यसपटक पनि नियामक नेपाल राष्ट्र बैंकसँगै बैंक तथा वित्तीय संस्थाहरूले आयोजकलाई साथ दिएका छन् ।

एक्स्पोलाई नेपाल राष्ट्र बैंकले प्रवर्द्धन गरेको छ भने नेपाल बैंकर्स एसोसिएसन, माइक्रोफाइनान्स एसोसिएसन, डेभलपमेन्ट बैंकर्स एसोसिएसनले साझेदारी गरेका छन् ।

यस्तै, पुँजीबजारको नियामक नेपाल धितोपत्र बोर्ड, बीमा कम्पनीहरुको नियामक बीमा समिति र विभिन्न बीमा कम्पनीसँग पनि विशेष समन्वय गरेको अध्यक्ष निर्दोषले बताए ।

उनका अनुसार, ‘भिजिट नेपाल २०२०’ मा सहयोग पुर्‍याउने उद्देश्यले यस वर्ष ट्रेकिङ एजेन्सिज एसोसिएसन अफ नेपाल (टान)लाई पनि सहभागी गराइएको छ ।

२ मंसिरमा सम्पन्न हुने एक्स्पोलाई चार खण्डमा सञ्चालन गरिने उनले बताए । १ मंसिर बिहान ११ बजे गभर्नर डा. चिरञ्जीवी नेपालले एक्स्पो उद्घाटन गरेपछि सोही दिन दिउँसो ३ बजे ‘बैंकिङ लगानी र उद्यमशीलता’का विषयमा अन्तर्क्रिया हुनेछ । उक्त सेसनमा नेपाल राष्ट्र बैंकका प्रवक्ता लक्ष्मी प्रपन्न निरौला, विभिन्न बैंकर्स र उद्यमीहरू सहभागी हुनेछन् ।

२ मंसिरमा ‘लगानी र पुँजीबजार’सम्बन्धी छलफल हुनेछ । उक्त सेसनमा नेपाल धितोपत्र बोर्ड र नेप्सेका अधिकारीसहित मर्चेन्ट बैंकर्स, सेयर बजार विज्ञ र लगानीकर्ता सहभागी हुनेछन् ।

सोही दिन दोस्रो खण्डको अन्तर्क्रियामा ‘स्वरोजगार, जीवन बीमा र निर्जीवन बीमा’ विशेष कार्यक्रम हुनेछ । उक्त सेसनमा बीमाक्षेत्रको नियामक बीमा समितिका अध्यक्ष चिरञ्जीवी चापागाईं, बीमक संघका प्रतिनिधि, बीमाविज्ञ र युवा स्वरोजगार कोषका अधिकारीले बोल्नेछन् ।

कार्यक्रमको अन्तिम सेसनमा ‘फाइनान्सियल टेक्नोलोजी’ विशेष कार्यक्रम राखिएको छ । यसपटकको एक्स्पोमा राखिएको यो नयाँ विषय हो । यो सेसनमा बैंक तथा वित्तीय संस्थाका प्रतिनिधिसँगै विज्ञहरू सहभागी हुनेछन् ।

‘एउटै छानामुनि बैंकिङ, बीमा, सेयर बजार, रेमिट्यान्स तथा फाइनान्सियल टेक्नोलोजीबारे जानकारी दिइनेछ,’ अध्यक्ष निर्दोषले भने, ‘उद्यमशीलतामा बैंक तथा वित्तीय संस्थाको भूमिका उजागर गर्न र थप लगानीका लागि प्रोत्साहित गर्न पनि यो एक्स्पो महत्त्वपूर्ण हुने हाम्रो विश्वास छ ।’

डेपुटी गभर्नर चिन्तामणि शिवाकोटीले यस्तो एक्स्पोले बैंक तथा वित्तीय संस्थासँगै उद्यमीलाई पनि प्रोत्साहित गर्ने बताए । ‘त्यसबाहेक वित्तीय चेतनाका लागि बैंकिङ एक्स्पो झन् महत्त्वपूर्ण छ,’ उनले भने ।

एक्स्पोमा बैंक तथा वित्तीय संस्था, बीमा, रेमिटेन्स, सेयर बजारसम्बन्धी स्टलहरू पनि राखिने आयोजक मिडिया इन्टरनेसनले जनाएको छ । यसअघि यस्तो एक्स्पो २ पटक मिडिया इन्टरनेसनलकै आयोजनामा काठमाडौंमा भएको थियो ।

प्रकाशित मिति: बिहीबार, कात्तिक २८, २०७६ १२:१७