मनाङेले छोडेको मन्त्रालय १५ दिनदेखि खाली, कांग्रेसमा मन्त्री छान्न सकस

अनुप पौडेल मंगलबार, असोज १, २०८१

A+ A A-

वन तथा वातावरणमन्त्री राजीव गुरूङ (दीपक मनाङे) ले राजीनामा दिएपछि गण्डकी प्रदेशको उक्त मन्त्रालय मुख्यमन्त्री सुरेन्द्रराज पाण्डेले आफैँसँग राखेका छन् । गत भदौ १७ मा मनाङेले राजीनामा दिएकोमा १५ दिन भइसक्दा पनि नयाँ मन्त्री नियुक्त हुन नसकेको अवस्था छ ।

गण्डकीमा ९ मध्ये हाल मुख्यमन्त्रीसहित कांग्रेसका तीन जना मन्त्री छन् । अब कांग्रेसभित्रको इतर अर्थात् शेखर–गगन समूहका एक जना सांसद मन्त्री बन्नेछन् । यसरी मन्त्री बन्ने सांसद सम्भवतः दल नेताको निर्वाचन हुँदा सुरेन्द्रराज पाण्डेलाई मत नदिने ८ जनामध्ये एक हुनेछन् ।

२०७९ पुस १३ मा कांग्रेस संसदीय दलको नेता छान्न मतदान भएको थियो । त्यसमा २७ सांसदमध्ये १८ जनाले पाण्डेलाई र ८ जनाले संस्थापन इतर समूहका भोजराज अर्याललाई मत दिएका थिए । एक मत बदर भएको थियो ।

कांग्रेसका एक सांसदले बताएअनुसार आफूलाई मत दिए–नदिएकाबारे मुख्यमन्त्री पाण्डे जानकार छन् । मत नदिने समूहका एक जना मन्त्री बन्ने, अन्तर पार्टी र भूगोल मिलाउँदा केही समय लागेको ती सांसदले बताए । ‘अन्तर पार्टी र भूगोल मिलाउने कुरा छ । संसदीय दलको निर्वाचनमा मत नदिनेलाई लैजानपर्ने हुन्छ,’ ती सांसदले भने ।

नेता डा. शेखर कोइराला र महामन्त्री गगन थापाले जसको नाम दिन्छन् ती सांसद नै वन तथा वातावरण मन्त्री बन्नेछन् । पाण्डेलाई दल नेता चयन हुने निर्वाचनमा मत नदिने भोजराज अर्याल, डिल्लीराम सुवेदी, महेन्द्रध्वज जिसी, कल्पना तिवारी, प्रकाश बराललगायत रहेको स्रोत बताउँछ । यीमध्ये महामन्त्री गगन थापानिकट डिल्लीराम र संस्थापन इतर समूहकै कल्पनाको सम्भावना रहेको चर्चा कांग्रेस वृत्तमा छ ।

मुख्य दुई दाबेदारमध्ये भूगोल मिलाउँदा डिल्लीको सम्भावना अझै बढी छ । गण्डकीमा हाल कांग्रेसका सुरेन्द्रराज पाण्डे (गोरखा), विन्दुकुमार थापा (कास्की), डा. टकराज गुरूङ (लमजुङ) मन्त्री छन् । यी तीन वटै जिल्ला साविकको गण्डकी अञ्चलका हुन् । डिल्ली (बाग्लुङ) साविकको धौलागिरी अञ्चलका हुन् । कल्पना (स्याङ्जा) पनि साविकको गण्डकी अञ्चलकै हुन् ।

कांग्रेस स्रोतकाअनुसार धौलागिरीले मन्त्री पाउने अवस्थामा डिल्लीराम र पर्वतकी रेखा गुरूङको सम्भावना बढी हुन्छ । दल नेता निर्वाचनमा संस्थापन इतर समूहकै भए पनि रेखाले पाण्डेलाई मत दिएकी थिइन् । त्यसैले उनको पक्षमा माहोल सकारात्मक नरहेको स्रोत बताउँछ ।

संस्थापन इतर समूहले मन्त्रीको नाम टुंग्याउन नसक्नुको एउटा कारण दलको नेताको निर्वाचनको मतपरिणाम पनि हो । इतर समूहका धेरै सांसद पाण्डेलाई मत दिनेलाई बनाउन नहुने पक्षमा छन् । पाण्डेलाई मत दिएकाहरू पनि मन्त्रीमा दाबी गर्दा यो समूहका शीर्ष नेताले साझा समझदारी जुटाउन सकेका छैनन् ।

मन्त्रीको विषयमा नेपाली कांग्रेसको संसदीय दलमा केही छलफल भएको छैन । मन्त्रिपरिषद् बैठकमा पनि मुख्यमन्त्रीले केही भनेका छैनन् । गत भदौ १९ मा एमालेबाट मन्त्री बनेकाहरूसँगको भेटमा मुख्यमन्त्रीले वनमन्त्री छिट्टै टुंग्याउने बताएका थिए ।

सरकारका प्रवक्ता डा. टकराज गुरूङले मुख्यमन्त्रीको स्वअधिकारको विषय भएकाले आफूलाई केही थाहा नभएको बताए । ‘हामीले बनाएको माननीय जीले अस्वीकार गर्नुभयो । त्यहाँ कांग्रेसले नै मन्त्री बनाउने हो,’ उनले भने, ‘दलभित्र केही कुरा भएको छैन । असोज १०/१२ भित्र हुन्छ भन्ने लाग्छ ।’

मनाङेले वनमन्त्रीसँग काम गर्न अधिकार नरहेको र तितेपाती मन्त्रालय नचाहिने भन्दै छोडेका थिए । प्रमुख प्रतिपक्षी दल नेकपा (माओवादी केन्द्र) ले डेँगीबाट जनता प्रभावित भएको विषय उठाएर मन्त्रिपरिषद् पुनर्गठन गर्न नसकेको विषयमा संसदमै व्यंग्य गरेको थियो । सांसद हरिबहादुर भण्डारीले गत भदौ २६ को शून्य समयमा बोल्दै ‘सरकार तितेपातीमन्त्री कसलाई बनाउने भन्नेमा व्यस्त’ भएको भनेर व्यंग्य कसेका थिए । ‘जनताले सामान्य डेँगीबाट मृत्युवरण गर्नुपरेको छ । सरकार तितेपाती मन्त्री कसलाई बनाउने भन्नेमा व्यस्त छ कि ! सरकार खोज्दिनुपर्‍यो सभामुख महोदय र जनताको काममा पठाइदिनु पर्‍यो,’ भण्डारीले भनेका थिए ।

गण्डकीमा ९ मन्त्रालय रहेकोमा कांग्रेसले मुख्यमन्त्रीसहित ५ र एमालेले ४ मन्त्रालय पाएका छन् । भागबण्डा मिलाउन गत भदौ १७ मा मन्त्रालय संख्या ७ बाट ९ बनाइएको थियो । कांग्रेसले मुख्यमन्त्रीलाई विश्वासको मत दिएका नेसपाका फणीन्द्र देवकोटालाई आफ्नो भागबाट ऊर्जामन्त्री बनाएको छ । कांग्रेसकै भागबाट मन्त्री बनेका मनाङेले छोडेकाले कांग्रेसले एक जना मन्त्री थप्ने छ ।

प्रकाशित मिति: मंगलबार, असोज १, २०८१ १०:४१

अनुप पौडेल

प्रतिक्रिया दिनुहोस्