धितोपत्र बोर्डले ब्रोकरलाई भन्योः व्यवसायिक मर्यादामा बस

A+ A A-

धितोपत्र बोर्डले धितोपत्र दलाल ब्यवसायी (ब्रोकर) लाई व्यवसायिक मर्यादामा बस्न आग्रह गरेको छ । अघिल्लो साता बोर्ड अध्यक्ष रेवत बहादुर कार्कीले संघीय संसदको अर्थसमितिमा बोल्दा आफूहरुको मानमर्दन गरेको भन्दै ब्रोकर आन्दोलित भएपछि बोर्डको यस्तो प्रतिक्रिया आएको हो ।

समितिमा बोल्दा अध्यक्ष कार्कीले ब्यक्त गरेको बिचारलाई ब्रोकरले नै अन्यथा रुपमा लिएको बोर्डको भनाइ छ ।

‘प्रतिनिधिसभाको अर्थ समितिले ७ फागुनमा आयोजना गरेको पूँजी बजारमा देखिएको समस्या सम्वन्धी छलफल कार्यक्रममा नियामक निकायको तर्फवाट वोर्डका अध्यक्षज्यूले धितोपत्र दलाल व्यवसायीहरु प्रतिस्पर्धी हुनुपर्ने, व्यवसायको पहँुच विस्तार गर्नुपर्ने लगायतका धितोपत्र व्यवसाय तथा वजार बिकास तथा विस्तारका सम्वन्धमा दिनु भएको अभिव्यक्तिलाई अन्यथा रुपमा लिइएको जानकारी प्राप्त भएको छ,’ बोर्डले मंगलबार जारी गरेको विज्ञप्तिमा उल्लेख छ ।

सो सम्वन्धमा व्यवसायीहरुसँग वोर्डमा छलफल समेत गरी स्पष्ट समेत गराईसकिएको र नेपाल सरकारद्घारा गठित मुद्रा तथा पूँजी बजार सम्वन्धी कार्यदलको सुझाव अनुसारसरकार र वोर्ड समस्या समाधान गरी वजारको सुधार गर्ने क्रममा रहेकोमा एक्कासी धितोपत्र दलाल व्यवसायीहरुले आन्दोलन गर्ने भन्ने जानकारी प्राप्त भएकोमा आफ्नो गम्भीर ध्यानाकर्षण भएको बोर्डको भनाइ छ ।

देशमा आएको राजनीतिक स्थायित्वसँगै आर्थिक विकासको लागि आर्थिक साधन परिचालनमा धितोपत्र वजारको महत्वलाई दृष्टिगत गरी धितोपत्र दलाल व्यवसायीसहित वजार सहभागीहरुको सहयोगमा पूँजी वजारका विविध पक्षहरुको सुधार र बिकास भइरहकोे र वोर्डलाई थप स्वायत्तता प्रदान गरी यसको काम कारवाहीलाई थप प्रभावकारी वनाउन नेपाल सरकारले धितोपत्र सम्वन्धी ऐन संशोधन प्रक्रिया अगाडि वढाइसकेको पनि जानकारी दिएको छ ।

ब्रोकरलाई बोर्डले सहयोग गरिरहेको अबस्थामा ब्रोकर उल्टै आन्दोलित भएर गल तगर्न लागेको आसय बोर्डले ब्यक्त गरेको छ ।

‘विगत केही वर्षदेखि धितोपत्र दलाल व्यवसायी सेवालाई मूल्य अभिवृद्धि करमा आवद्घ गर्ने सम्वन्धमा समस्या रहेकोमा वोर्डको पहलमा सरकारले धितोपत्र दलाल व्यवसायलाई मूल्य अभिवृद्धि कर नलाग्ने व्यवस्था गरी वित्तीय मध्यस्थकारी संस्थाको मान्यता दिएको, मार्जिन कारोवार सुविधा उपलब्ध गराउने कार्य कार्यान्वयनमा ल्याउन नेप्से र धितोपत्र दलाल व्यवसायीहरुलाई निर्देशन दिइएकोमा सो कार्यान्वयनमा आउन लागेको छ,’ बोर्डले ब्रोकरका समस्या समाधानमा आफूले गरेको कामको चर्चा गर्दै विज्ञप्तिमा उल्लेख गरेको छ ।

धितोपत्र दलाल व्यवसायी संस्थालाई सुदृढ गर्दै काठमाण्डौ उपत्यका वाहिर ४१ स्थानमा शाखा खोल्न स्वीकृत दिइएको तथा अन्य ८ ठाँउमा शाखा खोल्न पूर्व स्वीकृति दिइएको बोर्डले उल्लेख गरेको छ । यस्तै अन्य जिल्ला र स्थानहरुमा नियामक निकायहरुको संस्थागत तथा प्राविधिक क्षमता, ब्रोकरको क्षमता तथा आर्थिक सक्रियताको हिसावले प्रतिस्पर्धात्मक र गुणात्मक रुपमा अगाडि वढाउन एवं ब्रोकरलाई धितोपत्र व्यापारी (डिलर) को रुपमा कार्य गर्ने सम्वन्धमा नियमावली संशोधनको प्रक्रिया अगाडि वढाई सम्वद्घ पक्षहरुको राय सुझावको लागि अनुरोध समेत गरिएको बोर्डको भनाइ छ ।

आफूले सक्दो सहयोग गर्दा पनि ब्रोकरले उल्टो अर्थ लगाएर आन्दोलन गर्ने धम्की दिएको आशय बोर्डले ब्यक्त गरेको छ ।

‘वजारको विकास र विस्तार तथा देखिएका समस्याहरुको समाधानको लागि सम्वद्ध पक्षहरुसँग छलफल तथा अन्र्तक्रिया गरी कार्य अगाडि वढाउने वोर्डको अभ्यास रही रहेको सन्र्दभमा व्यवसायिक समस्याहरु रहे वोर्ड छलफलवाट त्यसलाई निराकरण गर्न सर्धै तत्पर रहेको छ, ब्रोकरले गर्नेे आन्दोलनले प्रत्यक्ष रुपमा लगानीकर्ताहरुलाई असुविधा भई वजारमा अझ प्रतिकूल प्रभाव पर्ने तथा राष्ट्रिय विकासको कार्यमा समेत अवरोध हुने हुनाले सम्वन्धित पक्षहरुलाई संयमित भई आफ्नो व्यवसायिक मर्यादा कायम राखी पूँजी वजारको विकास र विस्तारमा सहयोग गर्नु हुन सम्वन्धित सवैलाई वोर्ड आग्रह गर्दछ,’ विज्ञप्तिमा उल्लेख गरिएको छ ।

प्रकाशित मिति: बुधबार, फागुन १५, २०७५ ०४:४२