नेसनल लाइफको ३१औं साधारणसभा, १४.५ प्रतिशत लाभांश पारित

A+ A A-

नेसनल लाइफ इन्स्योरेन्स कम्पनीको ३१औं वार्षिक साधारणसभा सम्पन्न भएको छ । २४ कात्तिकमा साधारणसभा भएको हो ।

सभामा कम्पनी अध्यक्ष प्रेमा सिंहले आर्थिक वर्ष २०७४/०७५ मा मा कम्पनीले सन्तोषजनक प्रगति गरेको बताउँदै सो आवमा ६ अर्ब ४४ करोड ७६ लाख रूपैयाँ बीमाशुल्क संकलन भएको र २ अर्ब ५ करोड रूपैयाँ कुल दाबी भुक्तानी गरेको जानकारी दिइन् । यस्तै, ४७ करोड रूपैयाँ खुद नाफा आर्जन गरेको सभामा जानकारी गराइयो ।

यसैगरी, सो आवसम्ममा कम्पनीको कुल लगानी २३.५४ प्रतिशतले बृद्धि भई २० अर्ब ९५ करोड रूपैयाँ पुगेको छ । कम्पनीको बीमा कोष गत वर्षको तुलनामा २४.१६ प्रतिशतले बृद्धि भई २०७५ असार मसान्तसम्ममा २१ अर्ब ४७ करेड रूपैयाँ पुगेको छ ।

सभामा अध्यक्ष सिंहलेले कम्पनी पुँजीको हिसाबले समेत सवल भएको र चुक्ता पुँजी ३ अर्ब रूपैयाँ नाघेको जानकारी दिइन् । कम्पनीले सो अबको बीमाङ्कीय मूल्याङ्कनमा राम्रो प्रगति गरी नाफासहित जारी गरिएका सबै बीमालेखमा दुई विन्दुले बाेनस दर बढाइएको र यसबाट व्यवसायमा सकारात्मक प्रभाव पार्ने विश्वास व्यक्त गरिन् ।

लगानी विविधिकरण गरी लामो अवधिको लगानी वृद्धि गरी कम्पनीको प्रतिफल वृद्धि गर्नेतर्फ कम्पनीको प्रयास केन्द्रित रहेको परिणामस्वरुप कम्पनीको कोषको वार्षिक प्रतिफल दर उत्साहप्रद रुपले ९.५८ प्रतिशत पुगेको सभामा जानकारी दिइयो । व्यवसाय विस्तारसँगै कम्पनीले संस्थागत सामाजिक उत्तरदायित्वमा पनि विशेष ध्यान दिएको कम्पनीले जानकारी दिएको छ ।

सभाले आव २०७४/०७५ को चुक्ता पुँजीको २.५ प्रतिशत बाेनस सेयर जारी गर्ने र हाल कायम रहेको चुक्ता पुँजीमा १२ प्रतिशतका दरले नगद लाभांश वितरणा गर्ने प्रस्ताव पारित गरेको छ ।

प्रकाशित मिति: आइतबार, कात्तिक २४, २०७६ १८:०४