भक्कानिरहन्छन् डा.केसी, रसाइरहन्छन् आँखा

A+ A A-

चिकित्सा क्षेत्र सुधारको माग गर्दै प्राडा. गोविन्द केसी डडेल्धुरामा १७औँ चरणको अनशन बसिरहेका छन् । १५औँ चरणको अनसन हुम्ला, १६औँ चरणको अनशन इलाममा गएर बसेका केसी १७औँ चरणको अनशन डडेल्धुरा अस्पतालमा बसिरहेका छन् ।

अनसन बसेका केसीको पक्षमा सदरमुकाममा दैनिक नारावाजी हुन थालेको छ । तर नाराबाजीमा सत्तासीन नेकपाका नेता, कार्यकर्ता भने उपस्थित छैनन् । यतिसम्मकी अनसन बसेका क्षेत्रका जनप्रतिनिधिसमेत उनलाई भेटेर ऐक्यवद्धता जनाउन मानिरहेका छैनन् ।

शनिबार अनशनको पाँचौ दिन हो । दुव्लो र ख्याउटे शरिरका केसी माग पुरा नहुन्जेलसम्म अनशन तोड्ने मनस्थितिमा छैनन् ।

डा.केसीको माग पुरा गराउनका लागि सुदूरपश्चिमका बिभिन्न जिल्लाबाट संघ संस्था तथा राजनीतिक दलका प्रतिनिधि मागमा ऐक्यवद्धता जनाइरहेका छन् । शुक्रबार डा.केसीलाई भेट्न प्रमुख प्रतिपक्षी दल नेपाली कांग्रेसका नेता तथा छाया सरकारका गृहमन्त्री दिलेन्द्रप्रसाद बडू पुगे ।

उनले केसीको अनशनप्रति सुरुदेखि नै कांग्रेसको समर्थन रहेको बताए । केसीले उठाएका मेडिकल शिक्षालाई गुणस्तरीय, सर्वसुलभ र सबैले पढ्न सक्ने बनाउनुपर्छ भन्ने माग जायज भएको नेता बडूले बताए ।

उनले आगामी २५ कात्तिकमा केसीका मागमा छलफल गर्न संसदको राज्य व्यवस्था समितिले प्रधानमन्त्री केपी शर्मा ओलीलाई डाकेको जानकारी गराए ।

नेता बडुका कुरा सुनेर बोल्न सक्ने अवस्थामा समेत नरहेका डा.केसीका आखाँबाट आशु बगे ।

डा.केसीको अबस्था देखेर नेता बडु मात्रै होइनन्,उनलाई भेट्न आएका अन्य व्यत्तिका आँखा समेत रसाए । भेट्न आउनेहरूसँग कुरा गरिरहँदा डा.केसी बेलाबेला भक्कानिन्छन् ।

‘डा.गोविन्द केसीले राखेका सम्पूर्ण मागहरू पूरा गर, डडेल्धुरा अस्पतालमा दरबन्दी अनुसारका डाक्टरको यथाशीघ्र व्यवस्था गर, डडेल्धुरामा मेडिकल कलेजका लागि निर्णय गर, डा. केसीको जीवन रक्षा गर’लगायतका नारा लगाउँदै नागरिक, पेशाकर्मी र व्यवसायी दैनिक सडकमा उत्रिरहेका छन् ।

१७औँ पटक अनशन बसकेो पाँच दिन बितिसक्दापनि सरकारले उनका माग पुरा गर्न र वार्ता गर्न चासो देखाएको छैन । यतिसम्मकी उनलाई भेट्न सरकारी कर्मचारीलाई समेत अनुमति दिइएको छैन ।

नेकपाबाट निर्बाचित जनप्रतिनिधिहरुलाई समेत केसीसँगको भेटघाटमा अघोषित प्रतिबन्ध लगाएको छ । अमरगढी नगरपालिकाका नगरप्रमुख बिशेश्वरप्रसाद ओझाले समेत डा.केसीलाई नभेटेपछि उनको चर्को आलोचना भयो । सामाजिक संजालमा समेत नगरप्रमुखको बिरोध भएपछि उनले शुक्रबार बल्ल अनशनरत डा.केसीलाई भेटी उनको मागमा ऐक्यवद्धता जनाए ।

कतिपय व्यक्तिहरु डा. केसीको मागमा सहमत भएपनि सरकारी जागीरका कारण उनलाई भेट्न र खुलेर समर्थन गर्न सकिरहेका छैनन् । कतिपयले सरकारलाई जनताको नजरबाट गिराउन नेपाली कांग्रेसले अनशन बस्न लगाएको आरोपसहित आलोचना गरेकाछन् ।

सदरमुकामस्थित डडेल्धुरा अस्पतालभन्दा एक सय मिटरअगाडिको निर्मल क्लिनिक सञ्चालनमा रहेको नीलकण्ठ भट्टको घरको तेस्रो तलामा अनशनरत केसीको स्वास्थयमा समस्या देखिएको छ । स्वास्थ्य विग्रिएपछि अहिले डडेल्धुरा अस्पताल उनी अनसन बसिरहेका छन् ।

प्रकाशित मिति: शनिबार, कात्तिक २३, २०७६ १०:३२