रेट्रोफिटिङमा बेवास्ता: मकवानपुरका ११ हजार घर जोखिममा

A+ A A-

२०७२ साल बैशाखको बिनाशकारी भूकम्पबाट आंशिक क्षति भएका मकवानपुरका ११ हजार भन्दा बढी घरको रेट्रोफिटिङ कार्य अझै हुरु भएको छैन । भूकम्प गएको ४ बर्ष पुग्न लाग्दासमेत रेट्रोफिटिङको काम अगाडि बढ्न नसकेपछि भुकम्प पीडित जोखिमपूर्ण आवासमै बस्न बाध्य छन् ।

राष्ट्रिय पुनर्निमाण प्राधिकरण जिल्ला योजना कार्यान्वयन इकाई मकवानपुरका अनुसार जिल्लामा ११ हजार ६ सय ३५ वटा निजी आवासहरु रेट्रोफिटिङपछि बस्न मिल्ने भनेर पहिचान भएका छन् । तर हालसम्म एउटै पनि आवास पुर्णतः रेट्रोफिटिङ भएको छैन ।

जिल्ला आयोजना कार्यान्वयन ईकाई हेटौंडाका अनुसार ४ हजार ४ सय ३५ लाभग्राहीले सरकारबाट प्राप्तहुने प्रवलिकरण अनुदानको पहिलो किस्ताको सम्झौता गरेका छन् । तर एकजनाको पनि दोस्रो किस्ताको सम्झौता हुन सकेको छैन ।

‘दोस्रो किस्ताको लागि लाभग्राही सम्झौता गर्न नआउनु भनेको उहँंहरुले पुर्णरुपमा आवास प्रवलिकरण गर्नु भएको छैन भन्ने नै हो’ इकाइ प्रमुख सोमराज तिमल्सिनाले भने ।

सम्झौता भएका मध्ये ९५ प्रतिशत अर्थात् ४ हजार २ सय ३५ लाभग्राहीले पहिलो किस्ता स्वरुप ५० हजार बुझेका छन् ।

आवास प्रवलिकरण पुर्णतः गरेपछि इन्जिनियरको अनुगमन पछि पछिल्लो किस्ता स्वरुप अर्काे ५० हजार अनुदान प्राप्त हुन्छ ।

पहिलो किस्ता ५० हजार बुझेका लाभग्राहिहरुले प्रवलिकरणको नाममा भुकम्पले चर्केको, फुटेको भत्केको भागमा टालटुल, छोपछाप तथा रड्डरोगन गरेको कारण दोस्रो किस्ताको लागि सिफारिस नभएको बुझिएको छ ।

‘रेक्टोफिटिङ कसरी गर्ने भन्ने बारेमा हाम्रै प्राबिधिकहरु नै अलमल्लिएकोले पनि समस्या सिर्जना भएको हो’ ईकाई प्रमुख तिमल्सिनाले स्वीकार गरे ।