उर्लाबारी–मधुमल्ला सडक निर्माण सम्पन्न नहुँदा सर्वसाधारणलाई सास्ती

A+ A A-

मोरङको उर्लाबारी, मधुमल्ला जोड्ने सडक निर्माण सम्पन्न नहुँदा सर्वसाधारणले सास्ती झेल्नुपरेको छ । निर्माण कार्यलाई बीचमै छाडेर ठेकेदार बेपत्ता भएपछि ७ वर्षमा पनि सो सडक निर्माण सम्पन्न हुन नसकेको हो ।

१२ किलोमिटरको सो सडक खण्ड २०६९ सालमा ३ जेठ २०७१ मा निर्माण सम्पन्न गर्ने गरी ठेक्का लागे पनि निर्माण कार्य बीचमै छाडेर ठेकेदार सम्पर्कविहीन भएपछि उक्त सडक अलपत्र परेको हो ।

२०७२ सालको अन्त्यसम्म पनि ढिलो गतिमा निर्माण कार्य जारी राखेको ठेकेदार पक्षले त्यसपछि काम रोकेको स्थानीयले बताएका छन् । सो समयमा झण्डै ५० प्रतिशत निर्माण कार्य गरिए पनि त्यो गुणस्तरीय नभएका कारण यतिखेर अधिकांश ठाउँमा भत्किएको छ ।

निर्माणका क्रममा ग्राभेल गरिएको ठाँउहरूमा खाडल परिसकेको छ भने कालोपत्रे गरिएको सडकसमेत अधिकांश ठाउँमा भत्किएको छ । सडकको दुर्दशाका कारण आफूहरूले दुर्घटना र धूलोको पीडा झेल्नुपरेको स्थानीयले गुनासो गरेका छन् । ‘जताततै खाल्डो छ । धूलोसमेत उस्तै छ,’ मिक्लाजुङ गाउँपालिका–९ की देवी खड्काले भनिन् ।’

उनले थपिन्, ‘खाडलकै कारण दैनिक दुर्घटनासमेत भइरहेको छ । काम किन बन्द भयो ? सरकारले यो के गर्न खोजेको ?’

निर्माण कार्यलाई बीचमै छाडेर ठेकेदार बेपत्ता भएपछि स्थानीयवासीले समाजसेवी मानबहादुर श्रेष्ठको अध्यक्षतामा बाटो निर्माण पहल समिति गठन गरेर निर्माण कार्यअघि बढाउन पहल गर्दै आएको छ । तर, अनेकौं पहल गर्दासमेत कुनै सुनुवाइ नभएको समितिका अध्यक्ष श्रेष्ठले गुनासो गरे । उनले भने, ‘पूर्वाधार विकास कार्यालय पनि हामी धेरै पटक धाइसक्यौं । कुनै सुनुवाइ भएको छैन । हामी धाउँदाधाउँदा हैरान भइसक्यौं ।’

ललितपुर सातदोबाटोस्थित प्रेरा, जेभी कन्स्ट्रक्सनले सो सडकको ठेक्का लिएको छ । तत्कालीन पूर्वाञ्चल डिभिजन सडक कार्यालय ३ नम्बर विराटनगरले ठेक्का लगाएको सो सडक यतिखेर प्रदेश सरकारको मातहतमा आएको छ । पटक–पटक पत्र काटेर निर्माण कार्य सुचारु गर्न आफूहरूले आग्रह गर्दासमेत ठेकेदार पक्ष सम्पर्कमा नआएको र सो सडक निर्माणको विषयमा अख्तियारले समेत गहन छानबिन गरिरहेको पूर्वाधार विकास कार्यालय मोरङका इन्जिनियर शैलेन्द्रकुमार सिंहले बताए ।

१६ करोड ७४ लाख ५६ हजार रुपैयाँ लागत इस्टिमेट रहे पनि त्योभन्दा झण्डै ४४ प्रतिशत कम रकममा ठेकेदार पक्षले ठेक्का लिएको पाइएको छ । हालसम्म ठेकेदार पक्षले ४ करोड २७ लाख ७१ हजारभन्दा बढी रकमसमेत सम्बन्धित कार्यालयबाट भुक्तानी लिइसकेको देखिएको छ । स्थानीयले कामबिनै भुक्तानी गरिएको प्रति आपत्ति जनाएका छन् । स्थानीय बुद्धमान चौधरीले उक्त सडकमा चरम भ्रष्टाचार गरिएको आरोप लगाएका छन् ।

प्रकाशित मिति: बिहीबार, कात्तिक २१, २०७६ १९:२७