सानिमा बैंकः लाभांश समायोजनले मूल्य घटेको सेयरमा वित्तीय विवरणको कस्तो प्रभाव पर्ला ?

सानिमा बैंकः लाभांश समायोजनले मूल्य घटेको सेयरमा वित्तीय विवरणको कस्तो प्रभाव पर्ला ?

A+ A A-

२१ प्रतिशत लाभांश समायोजनको प्रभाव
३ सय ४ रुपैयाँ टेवा बिन्दु बन्दै
नाफा १४ प्रतिशत बढ्यो

१५ वर्षअघि विकास बैंकको रूपमा सञ्चालनमा आएको सानिमा बैंकको वाणिज्य बैंकको रूपमा ७ वर्षको अवधि पूरा भइसकेको छ । दोस्रो लहरको बैंकको रूपमा रहेको सानिमा बैंकले ८ अर्बको चुक्ता पुँजी पुर्‍याउन बोनस र हकप्रदमा नै जोड दियो । यद्यपि बैंकले बागमति विकास बैंकलाई प्राप्ति गरेको थियो ।

विगत ५ वर्षमा वार्षिक औसत १७.२८ प्रतिशतको लाभांश दिएको बैंकले गतआवमा नाफा भएपछि २१.०५ प्रतिशत लाभांश वितरण गरेको छ । यससँगै १० प्रतिशत बोनस सेयर वितरणपछि बैंकको हाल ८ अर्ब ८० करोड चुक्ता पुँजी पुगेको छ ।
चालू आवको पहिलो त्रैमासमा बैंकको नाफा १४.४० प्रतिशतले वृद्धि भएको छ । यो रकम ५९ करोड रुपैयाँ छ । बैंकले पहिलो त्रैमासको नाफाबाट लगानीकर्तालाई २७ करोड ५४ लाख रुपैयाँ वितरण गर्न सक्छ ।

बैंकको जगेडा तथा सञ्चित कोषमा २ अर्ब ५४ करोड रुपैयाँ छ । कोष लागत ७.४८ प्रतिशतबाट घटेर ७.२२ मा सीमित भएको छ । बैंकको ब्याज आम्दानी १७.११ प्रतिशत र खुद ब्याज आम्दानी १७.०३ प्रतिशतले बढेको छ ।

दुई अर्ब ९६ करोड रुपैयाँ ब्याज आम्दानी गरेको बैंकको खुद ब्याज आम्दानीमा १ अर्ब १४ करोड पुगेको छ । खराब कर्जा अनुपात १ प्रतिशत मुनि नै राख्न बैंक सफल भइरहेको छ । बैंकले ११ करोड रुपैयाँ प्रावधान राखेको छ ।

निक्षेप प्राथमिक पुँजीका आधारमा कर्जा लगानी अनुपात ७८.८४ प्रतिशत छ । बैंकको प्रतिसेयर आम्दानी २६.४७ प्रतिशत र प्रतिसेयर नेटवर्थ १ सय ३२ प्रतिशत छ । वाणिज्य बैंकप्रति दोस्रो बजारका सेयर लगानीकर्ताको विश्वास बढ्न नसकेको समयमा यस बैंकमा प्रवृत्ति खासै फरक देखिँदैन ।

सानिमाको मूल्य आम्दानी अनुपात ११.५२ प्रतिशत हुनुले यही पुष्टि गर्छ । यो दर २० भन्दा माथि ३० सम्म हुनु राम्रो मानिन्छ । यसको अर्थ बैंकले कमाएको १ रुपैयाँको लागि लगानीकर्ताहरूले ११.९९ तिरिरहेका छन् भन्ने हो ।

गैरआवासीय नेपालीहरूले प्रवर्द्धन र सञ्चालन गरिरहेको यस बैंकको अध्यक्षमा विनयकुमार श्रेष्ठ छन् । उनी बैंकको प्रमुख ५ लगानीकर्ताको सूचीमा पर्छन् ।

बुलिश प्रवृत्तिको संकेत

बैंकको सेयरमा केही साताअघि मात्रै लाभांश समायोजन भएको छ । एकैपटक ४० रुपैयाँ गुमाएको बैंकको सेयर मूल्य बढ्ने प्रयासमा भने छ ।

बैंकको सेयरमा सन्तुलित क्षेत्रमा नै रहेको १४ दिने आरएसआई सूचकले संकेत गर्छ । हाल यो ५० मा छ । आरएसआई स्केल ३० भन्दा मुनि भए सेयर अधिक बिक्री क्षेत्रमा, ३० देखि ७० बीचमा भए सन्तुलित क्षेत्रमा र ७० भन्दा माथि भए अधिक खरिद क्षेत्रमा रहेको विश्लेषण गरिन्छ ।

बैंकको सेयर मूल्य एक वर्ष यताकै न्यून बिन्दु (२९० रुपैयाँ) नजिक आइपुगेको छ । बैंकको सेयर मूल्यले हालको बिन्दुमा पटक पटक टेवा पाइरहेको छ । समायोजनपछि ३०४ रुपैयाँसम्म ओर्लिएको मूल्यले त्यसैलाई टेवा बनाइरहेको छ ।

२१ दिने र ७ दिने सिम्पल मुभिङ एभरेज दूरी घटेर जोडिने क्रममा छन् । ७ दिने मुभिङ एभरेज रेखा २१ दिने रेखालाई काट्ने जमर्कोमा रहेको संकेत छ । यसले मूल्य केही सयम बुलिश प्रवृत्तिमा जाने दरिलो सम्भावना देखाएको छ ।

एक महिनामा बैंकको मूल्य ८ रुपैयाँको फरकमा तल माथि गरिरहेकाले रेन्ज नै कम छ । पीभट विश्लेषणले भने अब बजार बढ्ने क्रममा रहे आगामी एक महिनामा ३ सय १२ मा पहिलो प्रतिरोध र घट्ने क्रममा रहे ३ सय ४ मा टेवा पाउने देखाउँछ ।

बैंकको सेयर मूल्यले अन्तिम दुई दिनमा पहिलो दिन कालो मैनबत्ती बनाएको छ जसको माथिल्लो धागो लामो छ । अन्तिम दिन सेतो आकारको मैनबत्ती बनेको छ । पहिलो दिनको शरू र दोस्रो दिनको न्यून मूल्य (३०५ रुपैयाँ) समान छ । यसले मूल्य बढ्न सक्ने सम्भावनालाई देखाइरहेको छ । यो मध्यम किसिमको संकेत हो । सुनिश्चितता आगामी दिनको कारोबारबाटै गर्न सकिने देखिन्छ ।