मेडिकल विद्यार्थीको चेतावनीः बढी शुल्क फिर्ता नभएसम्म आन्दोलन

A+ A A-

मेडिकल कलेजहरूले तोकिएको भन्दा बढी शुल्क लिएको भन्दै विद्यार्थीहरू आन्दोलित छन् । राजधानीबाहिरका मेडिकल कलेजमा अध्ययनरत विद्यार्थीहरू काठमाडौं आएर आन्दोलन गरिरहेका छन् ।

चितवन मेडिकल कलेज, युनिभर्सल मेडिकल कलेज, भैरहवा र नेसनल मेडिकल कलेजलगायतका विद्यार्थी काठमाडौं आएका हुन् ।

आन्दोलित विद्यार्थी कहिले माइतीघर त कहिले डीन कार्यालय पुगेर नाराबाजी गर्छन् । शैक्षिक माफियाका विरुद्ध चर्को नारा लगाउँछन् । संघर्ष समिति नै बनाएर उनीहरू लामो समयदेखि आन्दोलनमा छन् । तर, उनीहरूको माग सुनुवाइ भएको छैन ।

‘विद्यार्थीहरूले बिहीबार पनि डीन कार्यालय पुगेर आन्दोलन गरे । ‘डीन कार्यालयमा घेराबन्दी गर्‍याैं । उपलब्धि देखिएन । आन्दोलनलाई थप चर्काउँछौं,’ चितवन मेडिकल कलेजकी विद्यार्थी मान्यता थापाले भनिन् ।

‘नेता बन्न आन्दोलन गरेको हैन । विद्यार्थीमाथि दमन हुँदाहुँदै कसरी पढ्न सकिन्छ ? पहिले बढेको शुल्क खारेज हुनुपर्‍याे,’ थापाले भनिन् ।

कलेजहरूले बढी लिएको शुल्क फिर्ता नदिएकाले बाध्य भएर आन्दोलन गर्नुपरेको विद्यार्थीहरूको भनाइ छ । पैसा फिर्ता माग्न जाँदा दोस्रो वर्षको शुल्कमा मिलाउने भन्दै कलेजहरूले आलटाल गरेको विद्यार्थीहरू बताउँछन् ।

कलेजहरूले बढी लिएको शुल्क फिर्ता नगरेपछि शिक्षा मन्त्रालयले ती मेडिकल कलेजलाई कारबाही गर्न गृह मन्त्रालयलाई पत्राचारसमेत गरेको छ । तर, मेडिकल कलेजहरूले शुल्क फिर्ता गर्न मानेका छैनन् । शुल्क फिर्ता नभएपछि विद्यार्थीहरू पढ्न छोडेर आन्दोलनमा होमिएका हुन् ।

सरकारले राजधानीबाहिरका मेडिकल कलेजका लागि एमबीबीएस अध्ययनका लागि ४२ लाख ५० हजार रुपैयाँ शुल्क तोकेको छ । तर, मेडिकल कलेजहरूले विद्यार्थीबाट ५५ लाख रुपैयाँसम्म लिने गरेका छन् ।

चिकित्सा शिक्षा आयोगले १ कात्तिकमा एमबीबीएस र बीडीएसको शुल्क बढाएको थियो । उपत्यकाका मेडिकल कलेजमा एमबीबीएसमा ४० लाख २३ हजार र उपत्यकाबाहिर ४४ लाख ३६ हजार रुपैयाँ शुल्क तोकेको थियो ।

त्यस्तै, बीडीएसतर्फ उपत्यकामा २० लाख १९ हजार र उपत्यकाबाहिर २० लाख १९ हजार तोकिएको थियो । बढाएको शुल्क कार्यान्वयनमा नआउँदै विद्यार्थी आन्दोलित भएका हुन् ।

प्रकाशित मिति: बिहीबार, कात्तिक २१, २०७६ १९:०३