बझाङ र डोटीमा राष्ट्रिय बीमा कम्पनीका उपशाखा

A+ A A-

सरकारी स्वामित्वको राष्ट्रिय बीमा कम्पनीले बझाङको जयपृथ्वी नगरपालिका र डोटीको दिपायल सिलगढी नगरपालिकामा संजाल विस्तार गरेको छ । बीमा समितिले तोकिदिएको बाली तथा पशुपंक्षी बीमा अन्तरगत विगत चार वर्षदेखि त्यस क्षेत्रका किसानहरुलाई सेवा प्रदान गर्दै आएको राष्ट्रिय बीमा कम्पनीले बझाङको जयपृथ्वी नगरपालिका वार्ड नं १०चैनपुरमा र डोटीको दिपायल सिलगढी– ६ मा उपशाखाहरु संचालनमा ल्याएको छ ।

नेपाल पत्रकार महासंघ बझाङ शाखाका उपाध्यक्ष सम्राट बहादुर सिंहको दूर्घटना बीमा लेख जारी गर्दै बझाङ र दिपायल सिलगढीकी नगर प्रमुख मञ्जु मलासीको उपस्थितीमा खाद्य स्वच्छता समुह वडा ६ का सदस्यहरुलाई सम्पत्ति बीमा अन्तर्गत घर बीमाको जानकारी दिदै दिपायकको कार्यालयहरुको अनौपचारिक शुभारम्भ गरिएको कम्पनीले जानकारी दिएको छ ।

बाली तथा कृषि बीमाका अतिरिक्त हालै संचालनमा आएका उपशाखाहरुबाट मोटर बीमा, सम्पत्ति बीमा, इन्जिनियरिङ्ग बीमा, स्वास्थ्य बीमा, दूर्घटना बीमालगायत निर्जीवन बीमाका सबै प्रकारका बीमा लेखहरु जारी हुने कम्पनीले जनाएको छ ।

मानवीय आवश्यकताहरु मध्ये गाँस, बास, कपास पछिको चौथो आवश्यकताको रुपमा रहेको बीमालाई आम नेपाली समक्ष पुर्याइ सरल र चुस्त दुरुस्त सेवा दिन राष्ट्रिय बीमा कम्पनी सक्षम र तत्पर रहेको जनाउँदै कार्यालयको स्थापना पछि बीमाको पहुँचमा बृद्धि समेत हुने कम्पनीका बजार विज्ञ सुकल्याण पराजुलीले बताए ।

संविधानमा ब्यवस्था गरिएको समाजवाद उन्मूख अर्थ ब्यवस्था र समृद्धिको यात्रामा बीमाको महत्व उल्लेखनिय हुने हुँदा राष्ट्रिय बीमा कम्पनीले यस क्षेत्रमा सहज र सरल रुपमा सेवा विस्तार गर्दै जनताको मन जित्न सफल हुने पराजुलीको भनाइ छ।

डोटीमा आयोजित अनौपचारिक कार्यक्रममा दिपायल सिलगढी नगरपालिका नगर प्रमुख मञ्जु मलासीले बीमाको बिकासले मात्र समाजको आर्थिक बिकास हुने भन्दै राष्ट्रिय बीमा कम्पनीलाई हर प्रकारले सहयोग गर्ने बताइन् । डोटी तथा बझाङ्ग जिल्लाहरुको आर्थिक विकासको लागि बैंकहरुको प्रवेशसँगै बीमाको आवश्यकता महशुस गरिएको सन्दर्भमा राष्ट्रिय बीमा कम्पनीको प्रवेश नगरवासी तथा आम जिल्लावासीहरुका लागि उत्साहको विषय बन्न पुगेको छ।

प्रकाशित मिति: मंगलबार, फागुन १४, २०७५ २१:४६