सवा ६ करोडका १६ अत्याधुनिक एम्बुलेन्स वितरण

A+ A A-

सुदूरपश्चिम प्रदेश सरकारले सवा ६ करोडमा किनेका १६ अत्याधुनिक एम्बुलेन्स वितरण गरिएको छ । बुधबार धनगढीमा एक कार्यक्रमका बीच ती अत्याधुनिक एम्बुलेन्स बितरण गरिएको हो ।

धनगढीमा एम्बुलेन्स हस्तान्तरण गर्दे सुदूरपश्चिम प्रदेश सरकारले नौवटै जिल्लाका १६ अस्पताल र स्वास्थ्य चौकीलाई हस्तान्तरण गरेको छ । एम्बुलेन्स हस्तान्तरण गर्दै सुदूरपश्चिम प्रदेशका सामाजिक विकासमन्त्री कृष्णराज सुवेदीले अब सुदूरपश्चिम प्रदेशमा एम्बुलेन्स अभावले बिरामीले ज्यान गुमाउनु नपर्ने बताए ।

प्रदेशको स्वास्थ्य सेवालाई गुणस्तरीय तथा छिटोछरितो बनाउने उद्देश्यका साथ मन्त्रालयले ती एम्बुलेन्स खरिद गरेको हो ।

सुदूरपश्चिमका अधिकांश स्वास्थ्य संस्थाका एम्बुलेन्समा साइरन र अक्सिजन सिलिन्डरबाहेकका सुविधा नभएको अवस्थामा नयाँ वितरण गरिएका सबै एम्बुलेन्समा एसीसहित मुटुको धड्कन नाप्ने मोनिटर, अक्सिजन सिलिन्डर, सुरक्षाका अन्य थुप्रै उपकरणलगायत सुविधा छन् । एम्बुलेन्स चालकलाई तालिम प्रदान भइरहेको सुदूरपश्चिम स्वास्थ्य महाशाखाका प्रमुख नरेन्द्रसिंह कार्कीले बताए ।

सामाजिक विकास मन्त्रालयले सेती प्रादेशिक अस्पताल, प्राथमिक स्वास्थ्य केन्द्र कमल बजार अछाम, जोजबुडा अस्पताल डडेल्धुरा, जिल्ला अस्पताल दार्चुला, बैतडी र बझाङ, टाटे स्वास्थ्य चौकी बाजुरा, रुद्रेश्वर स्वास्थ्य चौकी बैतडी, खार स्वास्थ्य चौकी दार्चुला, रोयल स्वास्थ्य चौकी बझाङ, नवदुर्गा स्वास्थ्य चौकी डडेल्धुरा, डोटीमा जिल्ला अस्पताल र चवराचौतार स्वास्थ्य चौकी, अछामको जिल्ला अस्पताल, बाब्ला स्वास्थ्य चौकी, बान्नीगढीलाई एम्बुलेन्स वितरण गरेको हो ।