चिसोका कारण तेस्रो दिनमै अनशनरत डा. केसीको स्वास्थ्य कमजोर

A+ A A-

डडेल्धुरा सदरमुकाममा सोमबारदेखि १७औं चरणको अनशन सुरू गरेका अनशनरत डा.गोविन्द केसीको स्वास्थ्य अवस्था कमजोर बनेको छ ।

सदरमुकामस्थित डडेल्धुरा अस्पतालनजिकै रहेको निर्मल क्लिनिक सञ्चालनमा रहेको घरको तेस्रो तलाको एउटा कोठामा अनशन बसिरहेका केसीको चिसोका कारण स्वास्थ्य अवस्था कमजोर बन्दै गइरहेको हो ।

चिसोका कारण अनशनरत डा.केसीको स्वास्थ्य अवस्था बिग्रन थालेको र ब्लड प्रेसर घटेको डडेल्धुरा अस्पतालका निमित्त मेडिकल सुपरिटेन्डेन्ट डा.जितेन्द्र कँडेलले जानकारी दिए । उनका अनुसार केसीको ब्लडप्रेसर तलमाथि भइरहेको छ ।

बुधबार बिहान मात्रै दुई पटक उनको स्वास्थ्य जाँच गरिएको थियो । उनको ब्लडप्रेसर ९०/६० र ६०/४० सम्म घटेको पाइएको छ ।

‘हिजोसम्म उहाँको व्लड प्रेसर ठीकठीकै थियो । आज ९०/६० मा झरेको छ,’ निमित्त मेडिकल सुपरिटेन्डेन्ट डा.कँडेलले भने, ‘उहाँले आफू कमजोर भएको महसुस गर्नुभएको छ । हिजोजस्तो उहाँमा जाँगर छैन ।’ चिसोले डा. केसीको स्वास्थ्यमा झन् प्रतिकूल असर पर्न सक्ने पनि उनले जानकारी दिए ।

बुधबार दिउँसोसम्म डडेल्धुराको अधिकतम तापक्रम २१ दशमलव २ डिग्री सेल्सियस तथा न्यूनतम तापक्रम ९ दशमलव ३ डिग्री सेल्सियस रहेको छ । केसी अनशन बसिरहेको क्षेत्रमा घाम नै लाग्दैन ।

डडेल्धुरा अस्पतालमा चिकित्सक कम हुँदा उनको नियमित जाँचमा समेत समस्या भइरहेको उनको भनाइ छ । दिनप्रतिदिन डा. केसीको स्वास्थ्य कमजोर बन्दै गए डडेल्धुरा अस्पताल सार्नुपर्ने अवस्था आउने कँडेलले बताए ।

डा.केसीले पत्रकार सम्मेलन गरी सोमबार बेलुकी ५ बजेदेखि डडेल्धुरा सदरमुकाममा अनशन सुरू गरेका थिए । बुधबार अनशनको तेस्रो दिन हो । चिसोका बाबजुद पनि सातबुँदे माग अघि सार्दै उनको अनशन जारी छ । माग पूरा नभएसम्म अनशन जारी नै राख्ने उनको अडान छ ।

प्रकाशित मिति: बुधबार, कात्तिक २०, २०७६ १३:३९