६५ किलोमिटर हिँड्न २ हजार ५ सय रुपैयाँ गाडी भाडा !

A+ A A-

कर्णाली काेरिडाेरअन्तर्गतको कालिकोटको जितेगडादेखि बाजुराको पिलीचौरसम्मको ६५ किलोमिटर सडकमा यातायात व्यवसायीहरूले यात्रुबाट २ हजार ५ सय रूपैयाँसम्म भाडा असुल्ने गरेका छन् । कालिकोट र बाजुरा यातायात व्यवसायीहरूले यात्रुबाट मनोमानी रूपमा भाडा असुल्ने गरेका हुन् ।

कालिकोटको जितेगडाबाट बाजुरा पिलिचौरसम्म बाजुराका बडिमालिका यातायात प्रा.लि. र कालिकोटबाट रारा कर्णाली यातायात प्रा.लि. र बुलबुले यातायात प्रा.लि.ले सवारी साधन संचालनमा ल्याएका छन् ।

सिण्डिकेट सिस्टमबाट यात्रुहरूलाई बोक्ने गरिएको कर्णाली काेरिडाेरमा अघोषित यातायात सिण्डिकेट रहेको कालिकोट रास्कोट नगरपालिका–१ का रामबहादुर शाहीले बताए ।

‘कर्णाली काेरिडाेरमा यातायातमा सिण्डिकेट नै लागु गरिएको छ । एक दुई यातायात प्रा.लि.का बाहेक अन्य कम्पनीका सवारीसाधन चल्न पाउँदैनन् ।’ उनले भने, ‘जति भन्यो भाडा त्यति तिर्नुपर्ने बाध्यता रहेको छ । भाडा चर्को लिएको विषयमा प्रशासनदेखि स्थानीय सरकार मौन रहेका छन् ।’

कालिकोटदेखि सुर्खेतसम्मको एक सय ३२ किलोमिटरको भाडा जीपहरूले नौ सयसम्म लिने गरेका छन् । कालिकोटदेखि बाजुराको पिलीचौरसम्मको ६५ किलोमिटरमा तीन हजारसम्म भाडा असुल्ने गरेको कालिकोट पचालझरना गाउँपालिका–५ का रामबहादुर बमले बताए ।

‘जथाभावी भाडा असुलि हुदाँ पनि प्रशासन मौन रहेको छ,’ उनले भने, ‘हामीले जति गुनासो गरे पनि उनीहरूले सुन्दैनन् ।’

कर्णाली काेरिडाेरका यात्रुहरूबाट जथाभावी भाडा असुल्ने गरेको आफूलाई जानकारी आएको र कालिकोट प्रहरी प्रशासनसँँग छलफल गरे समस्या हल गरिने जिल्ला प्रहरी कार्यालय बाजुराका प्रहरी प्रमुख उद्धवसिंह भाटले बताए ।

‘व्यवसायीले मनोमानी गरेको गुनासो धेरै आएको छ,’ उनले भने, ‘त्यो विषयमा कालिकोटको प्रहरी प्रशासनसँग छलफल गरेर हल गरिने छ ।’

बीच बाटोमा टिकट नै पाइँदैन

कालिकोटको जितेगडाबाट आफ्नो गतव्य जानका लागि टिकट नै नपाइने यात्रुहरूको गुनासो छ । जतासम्म यातायातको साधन जाने हो, त्यहीसम्म यात्रुहरूले टिकट काट्नुपर्ने बाध्यता रहेको छ ।

कर्णाली काेरिडाेरमा आफूले जान चाहेको गतव्यसम्मको टिकट यातायात व्यवसायीले नदिने आफ्नो यातायातको साधन जहाँ पुग्ने हो, त्यहीसम्मको टिकट काट्नु पर्ने बाध्यता रहेको बाजुरा कार्तिकस्वामी गाउँपालिका–१ का विकास शाहीले बताए ।

‘यात्रुहरूले जान चाहेसम्मको टिकट काटिँदैन,’ उनले भने, ‘गाडी जहाँसम्म जाने हो त्यहीसम्मको टिकट काट्नुपर्ने बाध्यता रहेको छ ।’

भाडादरमा प्रश्न उठाए व्यवसायीले दिन्छन् धम्की

यात्रुहरूले भाडादरका विषयमा व्यससायीहरूसँग कुरा गरेमा यात्रुहरू जिप व्यवसायीले कसैलाई भने राम्रो नहुने चेतावनी दिने गरेका छन् । प्रहरी वा अरू कसैलाई भाडाबारे जानकारी दिए नबोक्ने धम्की दिने गरेका छन् ।

कर्णाली काेरिडाेर नेपाली सेनाले निर्माण जिम्मा लिएको छ । तत्काल यात्रुको सहजताका लागि भन्दै केही जीप सञ्चालन अनुमति दिइएको थियो ।

क्षमताभन्दा बढी यात्रु

गत साउन ३ गते कालिकोट र बाजुरा सीमाक्षेत्रनजिकै ज्रपाली भन्ने स्थानमा जीप दुर्घटना हुँदा २ जनाको मृत्यु भयो । पाँच जना यात्रु बोक्ने क्षमता भएको जीपमा ११ जना बोकेका कारणले जीप दुर्घटना भएको थियो ।

कर्णाली काेरिडाेरमा चल्ने जीपहरूको ५ जना देखि १० जना यात्रु बोक्ने क्षमता भएपनि १० जना बोक्ने जीपमा २० जनासम्म र ५ जना बोक्ने जीपमा १२ जनासम्म यात्रु बोक्ने गरेको स्थानीयको भनाइ छ ।

प्रकाशित मिति: बुधबार, कात्तिक २०, २०७६ १३:२८