हवाइ टिकटमा ठुलाबडाकै हालीमुहाली, हुम्लामा यात्रुको बिचल्ली

A+ A A-

हुम्लामा दसैंतिहारपछि निजी हवाई कम्पनीहरुले उडान भर्न छाडेपछि अहिले हुम्लामा हवाई टिकटका लागि मारामार भइरहेको छ । यात्रुहरु बिहानैदेखि टिकटका लागि लाइनमा बसेपनि टिकट पाइरहेका छैनन् । टिकटका कारण सर्वसाधारणले सास्ती व्यहोर्नुपरेको छ ।

१० डिग्री चिसोमा विहानदेखि लाइनमा बसेपनि टिकट नपाएर पुनः घर फर्कनुपरेको यात्रु धनलाल कामीले बताए । हुम्लामा हवाई टिकटमा ठुलाबडाको हालीमुहारी हुन थालेको यात्रुले अरोप लगाएका छन् ।

टिकट पाउन जनप्रतिनिधिदेखि मन्त्रीसम्मको पावर लाग्ने गरेको छ । सडक सञ्जाललले नछोएको हुम्लामा अन्तरजिल्ला जोड्ने एकमात्र विकल्प हवाइ यातायत हो ।

दशै तिहार विदामा घर आएका सर्वसाधारण टिकट नपाएपछि सदरमुकाम सिमकोटमै विचल्लीमा परेका छन् । ‘छोराका लागि टिकट लिने विमानस्थल धाएको चारदिन भयो तर टिकट पाइएन,’ यात्रु रावत भन्छन्, ‘विमानस्थलको काउण्टर बन्द गरेर सेटिङमा ठुलावडालाई मात्र टिकट बेचिएको छ यो आपत्तिजनक हो ।’

काठमाण्डौमा अध्ययनरत सिमकोट–५ की विनी परियार टिकटका लागि विमानस्थल धाएको सात दिन भयो । टिकट नपाएका कारण आफ्नो पढाइ नै छुटेको उनको गुनासो छ ।

चिसो छल्न हुम्लाबाट बहिरिने सर्वसाधारणको चापपनि जिल्लामा उत्रिकै छ । भारतीय नागरिक हुम्ला आउने सिजनमा बेलुका ६ बजेसम्म उडान भर्ने गरेका नीजि हवाई कम्पनी अहिले पूर्वतिर लागेपछि हुम्लामा उडानको समस्या हुदै आएको बताइएको छ ।

हवाई टिकटकै विषयलाई लिएर सोमबार तारा एयरलाइन्सका कर्मचारी र यात्रु वीच झडप भयो । यात्रु लिष्ट च्यातेको अभियोगमा एक यात्रुलाई प्रहरीले पक्राउ गरेको छ ।

दिनभरिको छलफल पछि दुवै पक्षबाट झगडा नगर्ने शर्तमा मिलापत्र भएपछि यात्रुलाई छाडिएको थियो ।

एयरलाइन्स कम्पनीहरुले भने समानुपातिक ढंगले टिकट वितरण गरिरहेको बताउदै आएका छन् । हवाई उडान समस्या समाधानको पहल भइरहेको प्रमुख जिल्ला अधिकारी विनिता भट्राई बताउँछिन् ।

प्रकाशित मिति: मंगलबार, कात्तिक १९, २०७६ १३:१७