धितोपत्र बोर्ड अध्यक्ष कार्कीको कार्यशैली विरुद्ध ब्यवसायी आन्दोलित

A+ A A-

धितोपत्र बोर्डका अध्यक्ष आफैले छलफलका लागि बोलाए पनि पुरानै प्रबृत्ति देखाएको भन्दै धितोपत्र दलाल ब्यवसायी पुन आन्दोलित भएका छन् ।

धितोपत्र व्यवसायीहरुका प्रतिनिधिहरु र धितोपत्र बोर्डका अध्यक्ष डा. रेवत बहादुर कार्कीबीच १० फागुन मा भएको छलफल बिना निश्कर्ष टुगिंएको थियो । कार्की आफैले आग्रह गरेर भएको उतm छलफलमा कार्की पुरानै शैलीमा प्रस्तुत हुदाँ छलफल बिना निष्कर्ष टुंगिएको धितोपत्र दलाल ब्यवसायीको भनाइ छ ।

धितोपत्र दलाल व्यवसायीहरुको सुशासन तथा क्षमता प्रतिको टिप्पणी र प्रतिशपर्धी बन्न नसकेको भन्दै कार्कीले लान्छना लगाएको भन्दै ब्यवसायी असन्तुष्ट भएका छन् । अध्यक्ष कार्कीले स्वयमलाई महाशत्रुको उपमा दिनु पूजी बजारको लागि उतुण्डे व्यवहारको एक नमुना भएको धितोत्रप ब्यवसायीको भनाइ छ ।

‘विगतदेखि बोर्ड अध्यक्ष कार्कीको यस्ता आरोप कपोलकल्पित, झुटो तथा भ्रमपूर्ण छन्, छलफलमा अध्यक्ष कार्कीले उक्त विषयलाई बिषायन्तर गर्न खोज्दै गोलमटोल गरेको कुराप्रति हाम्रो घोर आपत्ति छ,’ ब्यवसायीहरुको संस्था धितोपत्र दलाल ब्यवसायी संघले भनेको छ ।

ब्यबसायीका प्रतिनिधि र बोर्ड अध्यक्षबीच भएको छलफल बारे जानकारी तथा आगामी रणनीति तय गर्न १२ फागुनमा बसेको व्यवसायीहरुको पूर्ण बैठकले बजार विकास तथा विस्तारका लागि गर्नु पर्ने कामहरु समयमै नगरेर ब्यवसायी माथि अनावश्यक आरोपमा अध्यक्ष रमाउदा सिंगै पूँजीबजार निराश बनेको निश्कर्ष निकालेको छ ।

अध्यक्ष कार्कीको यस्तो कार्यशैलीले आम लगानीकर्ता तथा व्यवसायीहरु बिश्वस्त हुन नसकेको कारण समग्र धितोपत्र बजार नै थप धरासायी हुनेप्रति सजग हुनु जरुरी भएको संघको भनाइ छ ।

बैठक यस्तो अवस्थाबाट जोगाउदै धितोपत्र बजारको विकास, विस्तार तथा सुदृढीकरणका लागि गरिनु पर्ने कामहरु बिवरण मागपत्रका रुपमा बोर्ड समक्ष प्रस्तुत गर्ने निर्णय गरेको छ । साथै त्यस्ता माग पूरा गराउन संघर्षको कार्यक्रम अगाडि बढाउने निर्णय पनि बैठकले गरेको छ ।

बोर्ड अध्यक्ष कार्कीले केही दिन अघि संसदको अर्थसमितिमा धितोपत्र दलाल ब्यवसायी (ब्रोकर) को क्षमता नभएको, सुशासनको अबस्था कमजोर रहेको र ब्रोकरले आफूलाई महाशत्रु घोषणा गरेको बताएका थिए । अध्यक्ष कार्कीको सोही अभिव्यक्ति विरुद्ध ब्रोकर आन्दोलित भएका हुन् ।

प्रकाशित मिति: मंगलबार, फागुन १४, २०७५ ०५:००