संसदको क्यान्टिनमा हलाल मासु

A+ A A-

सांसदहरुका लागि अव नयाँ बानेश्वरस्थित संसद भवनमा सुविधा सम्पन्न चमेना गृह बन्ने भएको छ । जहा पहिलोपटक मुस्लिम समुदायका व्यक्तिले समेत हलाल गरेको खाना पाउँनेछन् ।

शहरी विकास मन्त्रालय अन्र्तगतको अन्तराष्ट्रिय सम्मेलन केन्द्र विकास समितिले ६ महिनाभित्रमा निर्माण सम्पन्न गर्ने गरी संसद भवनमा चमेना गृह बनाउन शुरु गरेको छ । करिब ९ सय ८३ स्क्वायर मिटर क्षेत्रफलमा ओगट्ने चमेनागृहमा १ सय ८६ जना क्षमताको डायनिङ हल निर्माण हुनेछ ।

मुस्लिम समुदायका लागि समेत खान मिल्ने हलाल गरेको मासु लगायतका खाना बनाउन छुट्टै भान्छाघरको समेत चमेनागृहमा व्यवस्था गरिएको छ । कुल २ करोड ७८ लाख लागतमा निर्माण हुन लागेको चमेनागृहको आज शहरी बिकास मन्त्री मोहम्मद इस्तियाक राईले शिल्यान्स गरे ।

भवनको शिल्यान्स गर्दै मत्री राईले तोकिएको मितिमा निर्माण सम्पन्न गर्न ठेकेदार कम्पनीलाई निर्देशन दिए । उनले अवको ६ महिनाभित्रमा निर्माण सम्पन्न नभए ठेकेदार कम्पनी र अन्तराष्ट्रिय सम्मेलन केन्द्र बिकास समितिका कर्मचारीलाई कारवाही गर्ने चेतावनी समेत दिए । ‘हाम्रो मुलुकमा निर्माणको जिम्मा लिन होडबाजी गर्ने तर समयमै निर्माण सम्पन्न नगर्ने प्रवृति हावी छ, तर अव पनि त्यस्तो प्रबृति दोहरिए सरकारले कडा कारवाही गर्नेछ, उनले भने ।

समयमै काम गर्नेलाई पुरस्कृत गरिने र काममा ढिलाई गर्नेलाई कडा कारवाही गर्ने नीति सरकारले लिएको जनाउ दिदै मन्त्री राईले निर्माणका क्रममा गुणस्तरलाई समेत ध्यान दिन आग्रह गरे । शिल्यान्यास कार्यक्रममा शहरी विकास मन्त्रालयका सचिव रमेश प्रसाद सिंहले चेमनागृहलाई अपाङ्गमैत्री बनाउन आग्रह गर्दै प्राविधिक आवश्यकता परे मन्त्रालयले थप सहयोग गर्ने बताए ।

समितिका कार्यकारी निर्देशक पुरुषोत्तम अमात्यले अवको ६ महिनभित्रमा चमेनागृह निर्माण सम्पन्न हुनेमा विश्वस्त हुन आग्रह गर्दै निर्माणका क्रममा संरचनाको गुणस्तर र निर्माणपछि खानाको गुणस्तरमा कुनै कमी आउन नदिने प्रतिवद्धता जनाए ।

प्रकाशित मिति: मंगलबार, फागुन १४, २०७५ ०४:३९