यी हुन् महरालाई जेल पठाउने १५२ कागजात, १८ साक्षी र ८ कानुन

A+ A A-

जबर्जस्ती करणी अभियोगमा पूर्वसभामुख कृष्णबहादुर महरा अदालतको आदेशबाट सोमबार पुर्पक्षका जेल चलान गरिएका छन् । पक्राउ परेको २८औं दिनमा महरा जेल चलान भएका हुन् ।

महरालाई जेल पठाउन सरकारी वकिलको कार्यालयले १८ जना साक्षीको बयान र १ सय ५२ वटा कागजात अदालतमा पेस गरेको थियो । त्यसैगरी, महरालाई मुलुकी अपराध संहिताका विभिन्न ६ वटा कानुनी प्रावधानहरु आकर्षित गर्दै सजाय माग दाबी गरिएको थियो ।

यी थिए साक्षी

सरकारी वकिलको कार्यालयले महराविरुद्धको मुद्दामा पहिलो प्रमाणका रूपमा पीडित महिलाको सुविधानगरस्थित कोठामा गरिएको घटनास्थलको मुचुल्का पेस गरेको छ ।

मुद्दाको अर्को साक्षीका रुपमा महानगरीय प्रहरी वृत्त बानेश्वरका प्रहरी नायव उपरीक्षक दुर्गाराज रेग्मीको प्रतिवदेनलाई आधार मानिएको छ, जसले घटनास्थलका दस प्रमाण र पीडित महिलाले घटनास्थलमा बोलेको भिडियो रेकर्ड उपलब्ध गराएको छ ।

प्रहरीले पीडित भनिएकी महिलाको जाहेरी दर्खास्तलाई अर्को प्रमाणका रूपमा पेस गरेको थियो जसमा पीडित महिलाको परिवर्तित नाम वृत्त बानेश्वर २६ (३०) भनेर पेस गरिएको छ ।

योसँगै महराविरुद्धको मुद्दामा पीडित महिलाको स्वास्थ्य परीक्षणका ११ वटा रिपोर्ट पेस गरिएको छ, जसलाई डा. तुलसी कँडेल, डा. मनि महर्जन र डा. आहाना श्रेष्ठले परीक्षण गरेको भनिएको छ ।

अर्को साक्षी प्रमाणका रुपमा हाम्रा कुरा डटकमका प्रधानसम्पादक अजयबाबु शिवाकोटीको निवेदन र उनले उपलब्ध गराएका श्रव्यदृश्य सामाग्रीलाई पेस गरिएको छ ।

मुद्दामा घटना विवरण कागजका रुपमा प्रहरी नायब निरीक्षकहरू किशोर आचार्य, डबलबहादुर बम, प्रहरी हवल्दार विष्णुबहादुर थापा, महराका चालक श्यामहरि आचार्यले गरेको घटना विवरण कागजलाई आधार बनाइएको छ ।

योसँगै नेपाली सेनाका जमदार काजीराम रानामगर, प्रहरी सहायक निरीक्षक वीरबहादुर बोहराको पनि घटना विवरण कागज मुद्दामा उल्लेख छ ।

पीडित महिलासँगै संसद सचिवालयको स्वास्थ्य इकाइमा कार्यरत उमा रेग्मी, महराका छोरा निर्मल महरालाई गाडी बिक्री गर्ने महेश चौधरी, दीपक परियार र जम्मु दिन मियाको घटना विवरण कागजलाई पनि अदालतमा पेस गरिएको छ ।

मुद्दामा महराकी पत्नी सीता महरा र छोरा राहुल महराको बयानसँगै पीडित युवतीका छिमेकी गोपाल श्रेष्ठको बयानलाई पनि साक्षी प्रमाणका रूपमा राखिएको छ ।

महराप्रति आकर्षित भएका ८ कानुन

महराविरुद्ध मुलुकी अपराध संहिता २०७४ को दफा ११९को उपदफा १ र २, दफा ३४ को उपदफा १, दफा २१९ को उपदफा ३ (ङ), दफा ३४ को उपदफा ३, फौजदारी कसुर ऐन २०७४ को दफा १५ को उपदफा २ (ङ)ले तय गरेको सजाय माग दाबी गरिएको छ ।

यसैगरी मुलुकी अपराध संहिता २०७४ को दफा २२८मा भएको क्षतिपूर्ति भराइ पाउने र अपराध पीडित संरक्षण ऐन २०७५ को दफा ४१ मा उल्लेखित कसुरदारबाट पीडित राहत कोषमा क्षतिपूर्ति शुल्क जम्मा गराउनुपर्नेसमेत माग दाबी छ ।

र, १ सय ५२ कागजात

प्रहरीले मुद्दासँगै कागजातका रुपमा पीडितको परिचय खुल्ने घटनास्थलका मुचुल्काको सक्कली कागजात, प्रतिलिपी, प्रहरी प्रतिवेदनलगायतका १ सय ५२ वटा कागजात पनि अदालतमा पेस गरेको छ, जसमा भिडियो रेकर्डदेखि विभिन्न व्यक्तिले दिएका बयानका कागजात, विधिविज्ञान प्रयोगशालाको पत्र, फरेन्सिक ल्याब, नर्भिक हस्पिटलको पत्र, कल डिटेल झिकाउने अनुमतिको पत्र र प्रहरीका विभिन्न प्रतिवेदन तथा पत्र गरी १ सय ५२ कागजात पेस गर्दै कारबाहीका लागि अभियोगपत्र दर्ता गराएको हो ।