कालंगा हाइड्रोको सुरुङमा फसेका मजदुरको उद्धारमा समस्या

A+ A A-

बझाङको बुङ्गल नगरपालिका–१ स्थित कालंगा हाइड्रोको काम गर्ने क्रममा सुरुङभित्र फसेका चार जना मजदुरको उद्धारमा समस्या भएको छ । चितवनकाे कुरिनटारबाट प्रहरीकाे हेलिकाेप्टर ग्यास र उद्धार टोलीसहित कालंगा पुगेको छ ।

आइतबार दिउँसो करिब ३ बजे सुरुङभित्र ६ जना छिरेका थिए । तीमध्ये २ जना सास फेर्न गाह्रो भएको भन्दै तत्कालै बाहिर निस्केका थिए । सुरुङभित्र छिरेका ४ जना अहिलेसम्म सम्पर्कविहीन छन् ।

सम्पर्कविहीन हुनेमा दैलेख गुराँस गाउँपालिका–३ का कर्णबहादुर शाही, सोही ठाउँका महेन्द्रबहादुर शाही, अछामका अछाम तुर्माखाद–६ महेन्द्र साउद र बझाङ बुङ्गल नगरपालिका– १ का शेरसिंह धामी रहेका छन् ।

३५ दिनदेखि बन्द थियो सुरुङ

चाडबाडमा काम नहुने भएकाले ३५ दिनदेखि सुरुङ बन्द थियो । आइतबार दिउँसो ७ जना मजदुर कम्पनीको ट्याक्टरमा सुरुङभित्र लाइट र ग्यासका पाइपको अवस्थाबारे बुझ्न छिरेका थिए ।

केही पर पुगेपछि दुई जना ट्याक्टरबाट ओलिएर हिँड्दै ग्यासको पाइप चेक गर्न थाले भने चालक दिलबहादुर थापामगरसहित चार जना ट्याक्टरमा भित्र छिरे ।

त्यसपछि चारजना ट्याक्टरबाट ओर्लिएर लाइट र पाइपहरु चेक गर्न थाले । उनीहरु १६ सय मिटर लामो सुरुङको एक किलोमिटर भित्र थिए ।

ट्याक्टर चालक मगर भने अन्य दुई जनालाई लिन फर्किए । सुरुङभित्र अक्सिजन ग्यास सकिएकाले सास फेर्न गाह्राे भएपछि चालक मगर बाहिर निस्कन खोजे । तर, त्यतिबेलासम्म चार जना बेहोस भएर अगाडि ढलिसकेका थिए । त्यसपछि चालक मगर अरु दुई जनालाई लिएर बाहिर निस्किए र बाहिर निस्किएपछि उनी पनि बेहोस भए । स्वास्थ्य अवस्था सामान्य हुँदै गएपछि आइतबार बेलुका उनले घटनाबारे बोलेका हुन् ।

चालक मगरको अहिले पनि स्थानीय स्वास्थ्य चौकीमा उपचार भइरहेको छ । चारजना करिब १ किलोमिटरको दुरीमा रहेको र सेना र प्रहरीको टोली ७ सय मिटरभन्दा भित्र पस्न नसकेको जिल्ला प्रहरी कार्यालय बझाङका प्रमुख, डीएसपी गणेशबहादुर बमले जानकारी दिए ।

सात सय मिटरभन्दा अगाडि छिर्न नसकिने भएकाले एक किलो मिटर भित्र रहेका चार जना जीवितै भेटिने सम्भावना कम रहेको डीएसपी बमले बताए ।

नेपाल प्रहरी, शसस्त्र प्रहरी, नेपाली सेना र स्थानीयवासीले उद्धारको प्रयास गरेका थिए । ७५ मेगावाट क्षमताको कालंगा हाइड्रोको उक्त सुरुङ करिब १६ सय मिटर लामो छ ।

प्रकाशित मिति: सोमबार, कात्तिक १८, २०७६ १४:०७