प्रदेश प्रमुखमा राजनीतिक व्यक्तिको चर्चा, यी हुन् प्रमुख दाबेदार

A+ A A-

प्रदेश प्रमुखको नियुक्तिका लागि सत्तारुढ नेपाल कम्युनिस्ट पार्टी (नेकपा) सचिवालय बैठकमा आकांक्षीका विषयमा छलफल हुँदैछ ।

प्रधानमन्त्रीको सरकारी निवास बालुवाटारमा जारी नेकपा सचिवालय बैठकमा प्रदेश प्रमुखमध्ये पूर्वमाओवादीको तर्फबाट नेकपाका अध्यक्ष पुष्पकमल दाहाल प्रचण्डले अमिक शेरचन, खेमराज भट्ट मायालु र तिलक परियारको नाम प्रस्ताव गरेका छन् ।

पूर्वएमालेको तर्फबाट भने अमृत बोहोरा, सोमनाथ अधिकारी प्यासी, धर्मनाथप्रसाद यादव र केशव बडालको नाम सिफारिस गरिने भएको छ । तर, कतिपय नेताले पूर्वपरराष्ट्रमन्त्री महेन्द्रबहादुर पाण्डे र शर्मिला त्रिपाठीको पनि नाम सिफारिस गरेका छन् ।

मन्त्रिपरिषद्को आइतबारको बैठकले सिफारिस गरेपछि राष्ट्रपति विद्यादेवी भण्डारीले सातै प्रदेश प्रमुख पदमुक्त गरेकी थिइन् । रिक्त पदमा नयाँ नियुक्तिको लागि छलफल भएको हो ।

शेरचन संयुक्त जनमोर्चाका पूर्वअध्यक्ष हुन् । संयुक्त जनमोर्चा यसअघि नै तत्कालीन नेकपा माओवादीमा एकीकरण भइसकेको छ ।

मायालु भने गणतन्त्रबादी नेता रामराजा प्रसाद सिंहको सहयोद्धाको रूपमा चर्चित थिए । परियार पूर्वमाओवादीका वरिष्ठ नेता हुन् भने बोहोरा तत्कालीन नेकपा एमालेका वरिष्ठ नेता हुन् ।

सोमनाथ प्यासी अधिकारी तत्कालीन राष्ट्रिय पञ्चायतका सदस्य हुँदै चर्चित थिए । यादव तत्कालीन नेकपा एमालेका मधेशी मूलका वरिष्ठ नेतामा पर्छन् ।

बडाल राष्ट्रिय सहकारी महासंघका अध्यक्ष हुन् । पाण्डे परराष्ट्रमन्त्री भइसकेका तत्कालीन एमाले नेता हुन् ।

नेकपा नेतृत्वको सरकारले सातै प्रदेशमा राजनीतिक पृष्ठभूमिका नेतालाई नियुक्त गर्ने तयारी गरेको स्रोतले जानकारी दियो ।

अहिले पदमुक्त गरिएका सात जना प्रदेश प्रमुखमध्ये कर्णाली प्रदेश प्रमुख दुर्गाकेशर खनाल मात्रै राजनीतिक व्यक्ति हुन् । उनी नेपाली कांग्रेसको तर्फबाट सांसदसमेत भइसकेका व्यक्ति हुन् । बाँकी ६ जना प्रदेश प्रमुख भने सामाजिक, प्राज्ञिकलगायतका क्षेत्रमा विशिष्ट योगदान पुर्याएका व्यक्ति थिए ।

प्रकाशित मिति: सोमबार, कात्तिक १८, २०७६ १३:३३