हिन्दु पर्व छठमा मुस्लिमले समेत व्रत लिई चढाए अर्घ

A+ A A-

हिन्दुहरूको पर्व मुस्लिमहरूले पनि मनाउँछन् भन्दा आश्चर्य लाग्न सक्छ तर यसपालिको छठ पर्वमा मिथिलाञ्चलका दर्जनौं मुस्लिम परिवार सहभागी भएका छन् । उनीहरूले छठको व्रत बसी प्रसादी मात्रै चढाएका छैनन्, पोखरीमै पसेर भगवान् सूर्यदेवलाई अर्घ चढाएका छन् ।

महोत्तरीको सोनमा गाउँपालिका– ६, मगर थानाका हसरुल खातुनले यसपालि गाउँकै पोखरीमा पसेर अर्घ दिएकी छिन् । उनले भनिन्, ‘मैले छठमा व्रत बस्ने भाकल गरेकी थिएँ, त्यही भाकल पूरा गर्न यसपालिदेखि छठमा व्रत बस्ने निर्णय गरेकी छु ।’

सुरूमा धर्मसंस्कृतिका कारण आफ्नो समुदायका केही व्यक्तिले पूजा गर्न रोकिरहेको उनले बताइन् । उनले भनिन्, ‘तर, बुबाले छोरी छठको व्रत बस्छ्यौ नै भने हिन्दुसाथीहरूसँग सल्लाह लिएर आफ्नो भाकल पूरा गर भन्नुभयो, अनि व्रत बसें ।’ उनले हिन्दु साथीहरूसँग पूजाको विधिबारे सल्लाह लिएर व्रत बसेको बताइन् ।

सो गाउँमा पहिलो पटक मुस्लिम महिलाले अर्घ दिएकाले गाउँमै चर्चाको विषय बनेको महोत्तरीका पत्रकार धर्मेन्द्रकुमार यादवले बताए ।

छठ पर्वमा व्रत बसी पूजा आराधना गर्नाले दुःख, कष्ट र चिन्ताबाट मुक्ति प्राप्ति, चर्मरोग निको हुने र पारिवारिक सुखशान्ति रहने जनविश्वास छ । यस कारण पनि छठ मनाउन सबै सम्प्रदायका मानिसहरू आकर्षित हुन थालेका छन् ।

जनकपुर उपमहानगरपालिकाका पूर्वउपमेयर मोहम्मद असगर अलीले जनकपुरमै दर्जनौं परिवारले छठ मनाउने गरेको बताए । उनका अनुसार जनकपुरमा केही हिन्दु धर्म मान्ने परिवारहरू मुस्लिमको पर्वमा रोजा बस्छन् भने मुस्लिम परिवारहरू छठ मनाउने गर्छन् । ‘हाम्रो धर्मले छठ पूजा गर्न रोक्दैन,’ मौलानाहरू बताउँछन ।

मुस्लिमले हिन्दुको पर्व र हिन्दुले मुस्लिमको पर्व मनाउँदा सामाजिक सद्भावसमेत बढ्ने जानकारहरू बताउँछन् । स्थानीय अरुण यादवले सामाजिक सञ्जालमा लेखेका छन्, ‘हिन्दु र मुस्लिमबीचको बलियो आत्मीयता एकता कायमको सन्देश दिएको छ । हिन्दु मुस्लिमबीच ठाउँठाउँ विवाद हुनेगरेको समाचारका बीच यस प्रकारका सकारात्मक खबर आएका छन् ।

राजकुमार साहले सामाजिक सञ्जालमा लेखेका छन्, ‘छठी मैया सबैलाई समेटेर एकताको सूत्रमा बाँधून् ।’