बझाङका सबै गाउँलाई जोड्ने पानकोट पुल पाँच महिनाभित्र बनिसक्ने

A+ A A-

बझाङको चैनपुरस्थित पानकोटमा निर्माणाधीन सेती नदी मोटरेबल पुल यसै आर्थिक वर्षभित्र बनिसक्ने भएको छ । पुल निर्माणको ठेक्का पाएको इलाइट कन्स्ट्रक्सन प्रालिका अध्यक्ष योगेश पौडेल आगामी चैत महिनाभित्रै पुल बनिसक्ने बताएका हुन् ।

झण्डै आठ करोडको ठेक्का सम्झौता भएको पुल फलाम र स्टिलबाट बन्ने छ । बाहिरबाट नै बनेर आउने उक्त पुलको नटबोल्ट कस्न दुई महिना लाग्ने छ । अहिले उक्त पुल भारतको उत्तराखण्डमा बनिरहेको ठेकेदार पौडेल बताए ।यसअघि विभिन्न निर्माण कम्पनीसँग ठेक्का सम्झौता भए पनि बीचको पिल्लरका लागि खाल्डो खन्दा ढुङ्गा लागेको भन्दै काम रोकिएको थियो ।

गत चैतमा इलाइट कन्ट्रक्सन प्रालिसँग झण्डै ८ करोडमा ठेक्का सम्झौता भएपछि बेली ब्रिज बनाउने सहमति भएको हो । यसपटक ताकेता नै गरेकाले ठेकेदारले समयमै पुल निर्माण गरिसक्ने प्रतिनिधिसभा सदस्य आशाकुमारी बिक बताउँछिन् ।

सेती नदी पारि रहेका स्थानीय तहलाई जोड्ने गरी असार मसान्त २०७३ मा निर्माण सम्पन्न हुने गरी ठेक्का सम्झौता पक्की पुल चार वर्षपछि बल्ल बन्ने आसा स्थानीयले गरेका छन् । सेती नदी पारिका झण्डै आधा भू–भागलाई सडक सञ्जालमा जोड्ने यो पुल निर्माण हुन नसक्दा वर्षौंअघि निर्माण सम्पन्न भएका सडकहरु पनि बेकामे भएका छन् । यसअघि ठेकेदार कम्पनी निलगिरी निर्माण सेवा र जागृती निर्माण सेवाले ६ करोड ७८ लाखको लागतमा संयुक्त रुपमा पुल निर्माणकाे जिम्मा पाएका थिए ।

डिजाइन इस्टमेटमा त्रुटी भएका कारण पुल निर्माण हुन नसकेको निर्माण कम्पनीले जनाएको छ । अहिले पुनः टेन्डर भई निर्माण कार्यले निरन्तरता पाउन लागेकाे हाे ।

पक्की पुल छोडेर काठे पुल बनाउन स्थानीय तहको प्रतिस्पर्धा

बझाङका स्थानीय तहहरुले प्रत्येक हिउँदमा सेती नदीमा अस्थायी पुल बनाउनका लागि प्रतिस्पर्धा नै गर्ने गरेका छन् । काठे पुलमा मंसिरदेखि वैशाखसम्म मात्र गाडी चल्ने गर्दछन् ।

नदीमा पानीको बहाव अलिकति बढ्ने बित्तिकै जुनसुकै बेला पनि पुल बगाएर लैजान्छ । सेती नदीका पारितिर रहेका थलारा, खप्तड छान्ना, जयपृथ्वी नगरपालिकाको साबिकको हेमन्तबाडा, लुयाटा र कैलासका साथै मष्टा र तल्कोट गाउँपालिकाका धेरैजसो सबै गाउँबस्तीमा सड्क सञ्जाल जोडिएको छ ।

सेती नदीमा पक्की पुल नहुँदा यातायातका साधनहरु पारितिर जान सकेका छैनन् । हिउँदमा सेती नदीमा पानी घटेपछि केही महिनाका लागि काठेपुल राखेर यातायातका साधनहरुले ओहोरदोहोर गरे पनि जेठ महिनामा काठे पुल बगाएपछि यातायातका बन्द रहने गरेका छन् ।

सेती नदीमा पक्की पुल नबन्दा त्याहाँका हजारौं जनताले कष्ट भोग्नु परेको छ । त्यस क्षेत्रका स्थानीलाई बिरामी ल्याउन, सामानहरु ढुवानी गर्न हिँडडुल गर्नसमेत समस्या भएको स्थानीय करन धामीले बताए ।

बझाङ जोड्ने जयपृथ्वी राजमार्ग देउरा हुँदै चैनपुर जोडिए पनि सेती पारि पक्की पुल निर्माण नहुदाँ जिल्लाको एकतर्फ यातायात सञ्चालनमा छन् भने अर्कोतिर यातायातका साधन जान सकेका छैनन् ।

अझैं बझाङका विभिन्न स्थानमा निर्माणाधीन चार पुल भने अलपत्र अवस्थामा छन् । सेती लोकमार्ग जोड्ने तमैल पुल, तल्कोट गाउँपालिका र मष्टा जोड्ने देवशैन पुल, झनाना पुल र रायलमा निर्माणाधीन पुल अझै अलपत्र अवस्थामा छन् ।

प्रकाशित मिति: शनिबार, कात्तिक १६, २०७६ १३:३२