खाली कुर्सीलाई सम्बाेधन गर्दै प्रदेश २ मा भ्रमण वर्षकाे औपचारिक सुरूवात

A+ A A-

संघीय सरकारको संस्कृति, पर्यटन तथा नागरिक उड्ययन मन्त्रालय र प्रदेश सरकारको उद्योग, पर्यटन, वन तथा वातावरण मन्त्रालयले संयुक्त रूपमा भिजिट नेपाल २०२० को औपचारिक शुभारम्भको घोषणा गरेका छन् ।

उपप्रधान एवं स्वास्थ्य तथा जनसंख्या मन्त्री उपेन्द्र यादवको प्रमुख आतिथ्यतामा आज जनकपुरस्थित तिरहुतिया गाछीमा आयोजित समारोहमा संस्कृति, पर्यटन तथा नागरिक उड्ययन मन्त्री योगेश भट्टराई, प्रदेश २ का मुख्यमन्त्री लालबाबु राउत, प्रदेश सरकारका अन्य मन्त्रीहरु, संघीय सांसद, प्रदेशसभा सदस्य, स्थानीय तहका प्रमुखलगायतको उपस्थिति रहेको थियो । यद्यपी अतिथि, स्वयंसेवक तथा सुरक्षाकर्मीको तुलनामा भने सर्वसाधारणको न्यून उपस्थिति रहेको थियो ।

आयोजकको तर्फबाट मैदानअनुसार कुर्सीको व्यवस्था त गरिएको थियो तर तीन चौथाइभन्दा बढी कुर्सी खाली रहे । आम जनताको निराशाजनक उपस्तिति देखेपछि प्रमुख अतिथि यादव, मन्त्री भट्टराई र मुख्यमन्त्री राउतले खाली कुर्सीलाई नै सम्बोधन गरी बाहिरिएका थिए ।

उक्त कार्यक्रमलाई सम्बोधन गर्दै उपप्रधानमन्त्री यादवले नेपालको प्राकृतिक , धार्मिक तथा सांस्कृतिक संगम विश्वकै लागी अनुपम रहेको दाबी गरे । उनले हिमालको चुचुरोदेखी तराई मधेशका फाँटसम्मको प्राकृतिक सौन्दर्य तथा विविधताको वर्णन गर्दै धार्मिक आस्थाका केन्द्र जनकपुर, लुम्बीनीलगायतका क्षेत्रहरु पर्यटक लोभ्याउन पर्याप्त रहेको जिकिर समेत गरे ।

मुलुकको समृद्धिको लागि पर्यटन प्रमुख आधार बन्न सक्ने तर्क गर्दै यादवले पर्यटन क्षेत्रको विकास गर्न संघ, प्रदेश र स्थानीय सरकारलाई हातेमालो गर्न आग्रह पनि गरे ।

कार्यक्रममा पर्यटन मन्त्री योगेश भट्टराईले पर्यटनको विकासका लागि संघीय सरकार तत्पर रहेको उल्लेख गर्दै पर्यटकीय क्षेत्रको विकासमा प्रदेश सरकारसँग सहकार्य गर्न तयार रहेको बताए ।

कार्यक्रममा प्रदेश २ का मुख्यमन्त्री लालबाबु राउतले प्रदेश सरकारले प्रदेश भित्र धार्मिक करिडोरको निर्माण गर्ने प्रक्रिया शुरु गरिसकेको उल्लेख गर्दै यसमा सहयोग गर्न संघीय सरकारलाई आग्रह समेत गरे । उनले प्रदेश नं. २ को विकास बिना मुलुकको समृद्धि सम्भव नरहेको पनि जिकीर गरे ।

प्रदेश सरकारले धार्मिक पर्यटनको महत्व बुझेर नै आफ्नो विकासको पहिलो कदम जानकी मन्दिरबाट शुरु गरेको उल्लेख गर्दै मुख्यमन्त्री राउतले अन्य पर्यटकीय स्थलहरुको विकासमा समेत प्रदेश सरकार प्रतिबद्ध रहेको दाबी गरे ।

प्रदेशका उद्योग, वन तथा पर्यटन मन्त्री रामनरेश रायको अध्यक्षतामा भएको कार्यक्रममा नेपाली कांग्रेस संसदीय दलका नेता रामसरोज यादव सहितका वक्ताहरुले मन्तव्य राखेका थिए ।

कार्यक्रममा विभिन्न कलाकारहरुले आफनो साँस्कृतिक प्रस्तुती समेत गरेका थिए ।

प्रकाशित मिति: बिहीबार, कात्तिक १४, २०७६ २१:२९