एनएफपिजे नेपालले गर्‍यो चिनियाँ फोटोग्राफरहरूसँग अन्तर्क्रिया

A+ A A-

राष्ट्रिय फोटो पत्रकार समूह (एनएफपिजे) नेपालले चीनका प्रसिद्ध ट्राभल फोटोग्राफर सु छुइलगायत १३ जना फोटोग्राफरसँग अन्तर्क्रिया गरेको छ ।

शुक्रबार नेपाल चाइना फ्रेन्डसिप फोरम (एनसीएफएफ)सँगको सहकार्यमा गोकर्ण हाउस झम्सिखेलमा एनएफपीजेका वरिष्ठ उपाध्यक्ष सुशील श्रेष्ठको अध्यक्षता भएको कार्यक्रममा चीनका प्रसिद्ध ट्राभल फोटोग्राफर सु छुइले आफू पहिलोपटक सन् २००८ मा नेपाल घुम्न आएको र अहिलेसम्म ३० पटकभन्दा धेरै नेपाल घुमिसकेको अनुभव सुनाएका थिए ।

‘मलाई संसार भर घुमौँ फोटो खिचौँ भन्ने लागेको थियो जब म नेपाल आएँ, नेपाल नै विश्व लाग्यो र अझै ४०-५० पटक नेपाल आइरहन मन लागेको छ। नेपाल खासै ठूलो छैन तर यहाँको कला संस्कृतिमा धेरै भिन्नता छ र नेपालीको बानी व्यवहारले हामीलाई तान्छ,' उनले भने, 'मेरो बाँकी जीवन चाहिँ नेपालको धार्मिक र पर्यटकीय क्षेत्रको भित्री रूपमा फोटो खिच्न पाउँ भन्ने इच्छा छ।’ उनले नेपालको सुन्दरता चीनसँगै विश्वमा चिनाउने आफ्नो ठूलो रहर रहेको पनि बताएका थिए ।

कार्यक्रममा एनएफपीजे नेपालका कार्यवाहक महासचिव घनश्याम श्रेष्ठले अन्तरक्रिया कार्यक्रम एकदमै फलदायी रहेको बताए । एनएफपीजेकै कोषाध्यक्ष सागर श्रेष्ठले चिनियाँ फोटोग्राफरहरूसँग अन्तर्क्रिया गर्न पाउँदा खुसी लागेको बताए । कार्यक्रमको अवसरमा उनले सु छुइलगायत फोटोग्राफरसँग सहकार्य गरेर अघि बढ्न प्रस्तावसमेत गरे ।

कार्यक्रममा नेपाल चाइना फ्रेन्डसिप फोरमका अध्यक्ष डा. कल्याण शर्माले भाषा सहजीकरण गरेका थिए । कार्यक्रममा चीनबाट आएका फोटोग्राफरलाई खादा र नेपाली टोपीले सम्मान गरिएको थियो भने दुई देशको तर्फबाट एक अर्कालाई मायाको चिनो स्वरूप पुस्तक आदानप्रदान गरिएको थियो ।

कार्यक्रममा एनएफपीजे नेपालका पदाधिकारी तथा सदस्य, केन्द्रीय सदस्य एवं अन्तर्राष्ट्रिय मामिला प्रमुख सुनिल शर्मा, नेपाल चाइना फ्रेन्डसिप फोरमका अध्यक्ष डा. कल्याण शर्मा, गोकर्ण हाउस झम्सिखेल, संस्थाका सदस्य रमेश शाक्य, अर्चना श्रेष्ठलगायत सहभागी थिए ।

प्रकाशित मिति: शुक्रबार, वैशाख २८, २०८१ २०:४४