राजनीतिक दाउपेचका कारण नेपाल धितोपत्र बोर्ड पाँच महिनादेखि नेतृत्वविहीन

A+ A A-

राजनीतिक दाउपेचका कारण नेपाल धितोपत्र बोर्ड ५ महिनादेखि नेतृत्वविहीन भएको छ । २१ पुस २०८० मा अध्यक्ष रमेश हमालको कार्यकाल सकिएसँगै सरकारले अर्को अध्यक्ष नियुक्त गर्न सकेको छैन ।

तत्कालीन अर्थमन्त्री प्रकाशशरण महत र प्रधानमन्त्री पुष्पकमल दाहालको लाइन नमिलेका कारण सुरुमै अध्यक्ष नियुक्ति प्रक्रियाले सहजता पाउन सकेको थिएन, जसले गर्दा झण्डै २ महिनासम्म निर्णय हुन सकेन । दुई महिनापछि २१ फागुनमा कांग्रेस र माओवादी केन्द्रको गठबन्धन भत्कियो र अध्यक्षको दौडमा हुने पात्रहरू नै फेरिए ।

हुन त ३ फागुन २०८० मा सरकारले अध्यक्ष नियुक्तिका लागि राष्ट्रिय योजना आयोगका उपाध्यक्ष मीनबहादुर श्रेष्ठको नेतृत्वमा छनोट सिफारिस समिति बनाएको थियो । उक्त समितिले १६ फागुनमा अध्यक्षका लागि आवेदन खुला गरेको थियो । समितिले काम गरिरहेकै बेलामा गठबन्धन भत्कियो । त्यसले गर्दा अर्थमन्त्री महत सरकारबाट बाहिरिए । त्यसले गर्दा प्रधानमन्त्री दाहाललाई सहज हुने स्थिति आयो । त्यसैले, नयाँ अर्थमन्त्री वर्षमान पुन आएपछि २४ चैत २०८० मा सिफारिस समितिले पाँच जनाको सूची सार्वजनिक गरेको थियो ।

अध्यक्षका लागि पाँच जनाको सूची सार्वजनिक भएको एक महिना बित्दा पनि नियुक्ति भने हुन सकेको छैन । त्यसमा प्रधानमन्त्री प्रचण्ड र सत्ता गठबन्धनका प्रमुख घटक एमाले अध्यक्ष केपी ओलीले सहमति नजुटाएको अर्थ मन्त्रालय स्रोतले बताएको छ । स्रोतका अनुसार ओली र प्रचण्डको लाइनमा अर्थमन्त्री वर्षमान पुन सहमत नभएका कारणले पनि नियुक्ति प्रक्रिया ढिलाइ भएको हो ।

स्रोतका अनुसार बोर्डका निर्देशकमध्ये दुई जना डा. नवराज अधिकारी र र मुक्ति श्रेष्ठले आफूलाई माओवादीनिकट भनेर अर्थमन्त्री पुनमार्फत लविङ बढाएका छन् । अधिकारी अहिले कार्यवाहकको भूमिकामा पनि छन् । अधिकारी र श्रेष्ठलाई काउन्टर गर्ने गरी माओवादीनिकट भनेर नै चिरञ्जीवी चापागाईं पनि दौडमा लागेका छन् ।

माओवादीकै कोटाबाट पहिला बीमा समितिको अध्यक्ष भएका कारण उनी पनि अहिले अध्यक्षको दौडमा सक्रिय देखिएका हुन् । त्यसो त उनी राष्ट्र बैंकका अवकाशप्राप्त कर्मचारी पनि भएका कारणले पुँजीबजारको जानकारको रूपमा व्याख्या गर्ने गरेका छन् । अधिकारी, श्रेष्ठ र चापागाईंकै लाइनमा दौडिरहेका अर्का व्यक्ति भने कृष्णबहादुर अधिकारी हुन् । नेपाल स्टक एक्सचेञ्जका पूर्वमहाप्रबन्धक समेत भइसकेका उनी पनि राजनीतिक रूपमा वापमन्थी नै भएको भन्दै एमाले र माओवादी नेताहरूलाई रिझाउने प्रयास गरिरहेका छन् ।

अर्का उम्मेदवार भने सन्तोषनारायण श्रेष्ठ हुन् । उनी राजनीतिक रूपमा कांग्रेसनिकट भएको भन्दै प्रचार भइरहेको छ । यातायात व्यवसायी चोपनाराण श्रेष्ठका छोरा सन्तोषलाई कांग्रेसनिकट भनिरहेका बेलामा व्यवसायी दीपक भट्टले साथ दिएको भन्दै चर्चा पनि भइरहेको छ । भट्टले एमाले अध्यक्ष ओली र प्रधानमन्त्री प्रचण्डसम्म पनि उनको पक्षमा लविङ गरेको भन्दै अर्थ मन्त्रालयमा चर्चा भइरहेको छ । कतिपयले भने डा. अधिकारी पनि भट्टनिकट रहेको टिप्पणी गरेका छन् ।

त्यसो त निजीक्षेत्रबाट नयाँ स्टक एक्सचेञ्ज ल्याउने विषयले नेपालको पुँजीबजार निकै तातिएको छ । केही वर्षदेखि राजनीतिक र आर्थिक क्षेत्रमा विवाद भइरहेको छ । विभिन्न तीनवटा समूहले नयाँ स्टक एक्सचेञ्ज ल्याउने तयारी गरेका छन् । सरकारले भने नयाँ स्टक एक्सचेञ्ज आवश्यक रहेको वा नरहेको भन्ने अहिलेसम्म निर्णय लिन सकिरहेको छैन । त्यसैले, धितोपत्र बोर्ड अध्यक्षमा सबैको चासो छ ।

प्रकाशित मिति: शुक्रबार, वैशाख २८, २०८१ १५:२०