सन्दीपविरुद्ध षड्यन्त्रकाे गम्भीर आराेप लागेपछि पारस खड्का आक्राेशित

A+ A A-

नेपाल क्रिकेट संघ (क्यान) का सचिव पारस खड्काले क्रिकेटर सन्दीप लामिछानेको बलात्कार मुद्दामा आफूलाई जोडेर गालीगलाैज गर्नेहरूविरुद्ध कानुनी उपचार खाेज्ने चेतावनी दिएका छन् ।

सामाजिक सञ्जालमा बुधबार राति खड्काले आफूविरुद्ध नियोजित दुष्प्रचार गरिएको बताएका छन् । नियाेजित षड्यन्त्रलाई ढिलाेचाँडाे कानुनी दायरामा ल्याउने उनको चेतावनी छ ।

बलात्कार मुद्दामा जिल्ला अदालतबाट दाेषी ठहर लामिछानेले केही दिनअघि सामाजिक सञ्जालमार्फत आफूविरुद्ध षड्यन्त्र गर्नेहरूकाे नाम सार्वजनिक गर्ने उल्लेख गरेका थिए । त्यसपछि पारसविरुद्ध सामाजिक सञ्जालमा गालीगलाैज चलिरहेकाे छ ।

अधिकांशले पारसले नै सन्दीपविरुद्ध षड्यन्त्र गरेकाे गम्भीर आराेप लगाएपछि उनले कानुनी उपचार खाेज्ने चेतावनी दिएका हुन् ।

पारसले सामाजिक सञ्जालमा राखेकाे स्टाटस जस्ताकाे त्यस्तै

पछिल्लो केहि समय यता सामाजिक संजालमा मेरो नाम जोडेर चरित्र हत्या गर्ने हेतुले विभिन्न व्यक्ति तथा संस्थाबाट अपुष्ट र आधारहिन तरिकाले म माथी भैरहेको व्यक्तिगत आरोपप्रति मेरो गम्भीर ध्यानाकर्षण भएको छ।

नेपालको कानुनले कसैलाईपनि विना प्रमाण चरित्र हत्या गर्ने वा तर्क नराखी व्यक्तिगत आरोप लगाउने छुट दिएको छैन। नेपालको कानुनले सबैलाई कानुनी उपचारको बाटो खुल्ला राखेको छ।

नेपाली क्रिकेटसंग सम्बन्धित विभिन्न पक्षहरू र विशेषत: सन्दिप लामिछानेसंग जोडिएको पछिल्लो मुद्दामा सम्मानित जिल्ला अदालतबाट पहिलो तहको फैसला भएको र उच्च अदालतबाट अन्य कुरा प्रष्ट हुँदै जानेनै छ। यो सबैका विच समेत तर्कहिन तरिकाले मेरो नाम जोडेर चरित्र हत्या गर्ने हेतुले म माथी भैरहेको नियोजित षड्यन्त्रलाई ढिलो चांडो कानुनी दायरामा ल्याउने समेत जानकारी गराउन चाहन्छु।

अन्त्यमा नेपाली क्रिकेटप्रतिको मेरो निस्वार्थ: भावना र यसको विकास, विस्तार प्रतिको मेरो अठोटमा कदापि पनि परिवर्तन नआउने समेत सम्पूर्णका विच संकल्प गर्दछु।