आज दिनभर : प्रचण्डकाे दाँत दुख्याे, जेलेन्स्कीकाे हत्या षड्यन्त्र असफल (भिडियाे)

आज दिनभर : प्रचण्डकाे दाँत दुख्याे, जेलेन्स्कीकाे हत्या षड्यन्त्र असफल (भिडियाे)

A+ A A-

प्रधानमन्त्री पुष्कमल दाहाल प्रचण्ड दाँतमा समस्या देखिएपछि उपचारका लागि वीर अस्पताल पुगेका छन् । सुनकोसी मरिन डाइभर्सनको सुरुङ ब्रेक थ्रुका लागि सिन्धुली पुगेका प्रधानमन्त्री त्यहाँबाट फर्किएलगत्तै अस्पताल पुगेका हुन् ।

पार्टीभित्र गुट बनाउने छुट कसैलाई नभएको एमाले अध्यक्ष केपी शर्मा ओलीले बताएका छन् । सरकार ढाल्ने षडयन्त्र एक झट्कामै टुटाइदिएको एमाले उपाध्यक्ष विष्णु पौडेलले बताए ।

सहकारीको रकम अपचलनका विषयमा उपप्रधान तथा गृहमन्त्री रवि लामिछानेमाथि संसदीय छानबिन हुनुपर्ने मागबाट नेपाली कांग्रेस पछि नहट्ने भएकाे छ ।

काेशीका मुख्यमन्त्री केदार कार्कीले पदमा बस्ने नैतिकता गुमाएको भन्दै नयाँ सरकार गठनको आह्वान गर्न प्रदेश प्रमुखलाई एमाले र माओवादीले आग्रह गरेका छन् । असंवैधानिक रूपमा पार्टी विभाजन गराएकाले निर्वाचन आयोगविरुद्ध अदालत जाने जसपा नेपालका अध्यक्ष उपेन्द्र यादवले बताएका छन् ।

यूएईमा भएको भारी वर्षामा परी एक नेपाली महिला सम्पर्कविहीन भएकी छन् । वर्षाका समयमा ड्युटीबाट फर्किरहेकी दाङ तुलसीपुरकी लीला पाण्डे २२ दिनदेखि परिवारको सम्पर्कमा नआएपछि खोजी जारी छ ।

साताको चौथो कारोबार दिन बुधबार शेयर बजार परिसूचक नेप्से अघिल्लो दिनको तुलनामा ०.२१ अंक घटेकाे छ ।

युक्रेनका राष्ट्रपति भोलोदोमिर जेलेन्स्कीको हत्या षड्यन्त्र असफल भएकाे छ । उनकै सुरक्षामा तैनाथ दुई कर्णेल पक्राउ परेका छन् । खतरनाक साइड इफेक्ट पुष्टि भएको एस्ट्राजेनेकाले बनाएको कोभिडविरुद्धको खोपको बिक्री बन्द भएकाे छ ।

बलात्कार मुद्दामा दोषी ठहर भएका राष्ट्रिय क्रिकेट टिमका पूर्वकप्तान सन्दीप लामिछानेको पक्षमा काठमाडौंमा प्रदर्शन भएकाे छ । फ्रेन्च क्लब पीएसजीलाई २–० ले हराउँदै जर्मन क्लब वोरुसिया डर्टमुण्ड युरोपेली च्याम्पियन्स लिगको फाइनलमा प्रवेश गरेकाे छ ।