कोशीमा नयाँ सरकार गठन गर्न एमाले-माओवादीको माग, प्रदेश प्रमुखलाई दिए निवेदन

कोशीमा नयाँ सरकार गठन गर्न एमाले-माओवादीको माग, प्रदेश प्रमुखलाई दिए निवेदन

A+ A A-

नेकपा एमाले र माओवादी केन्द्रले कोशीमा नयाँ सरकार गठनको प्रक्रिया सुरु गर्न माग गरेका छन् । मुख्यमन्त्री केदार कार्कीले विश्वासको मत लिने समय गुजारेको भन्दै नयाँ सरकार गठनको प्रक्रिया सुरु गर्न आग्रह गरेका हुन् ।

त्यसका लागि एमाले संसदीय दलका नेता हिक्मत कार्की र माओवादी केन्द्र संसदीय दलका नेता ईन्द्र आङ्बोले प्रदेश प्रमुख परशुराम खापुङलाई निवेदन दिएका हुन् ।

त्यसअघि एमाले र माओवादी केन्द्रले प्रदेशसभाबाट वैशाख ७ को संकल्प प्रस्तावको निर्देशनअनुसार मुख्यमन्त्री कार्कीले ३० दिनभित्र विश्वास मत लिए/नलिएको जानकारी लिएका थिए । जसअनुसार मुख्यमन्त्रीले विश्वासको मत नलिएको जानकारी प्रदेशसभा सचिवालयबाट पाएपछि उनीहरूले नयाँ सरकार गठनको प्रक्रिया थाल्न मुख्यमन्त्रीलाई आग्रह गरेका हुन् ।

एमाले र माओवादी केन्द्र संसदीय दलका नेताको प्रदेशसभामा संयुक्त निवेदन दर्ता गराएका थिए । सो, निवेदनको सभामुखले प्रतिउत्तर दिएका छन् । सभामुखको निर्देशनबमोजिम प्रदेशसभा सचिवालयले मुख्यमन्त्री केदार कार्कीले विश्वासको मत नलिएको प्रतिउत्तर दिएको छ । एमाले सचेतक रेवतीरमण भण्डारीका अनुसार सो पत्रको बोधार्थ प्रदेश प्रमुखलाई समेत पठाइएको छ ।

प्रदेशसभाबाट यस्तो प्रतिउत्तर लिएर एमाले र माओवादीका सांसदहरू प्रदेश प्रमुखलाई भेट्न उनको कार्यालय पुगेका थिए । त्यसपछि उनीहरूले नयाँ सरकार गठनका लागि प्रदेश प्रमुख खापुङलाई आग्रह गरेका हुन् ।

यस्तो थियो एमाले र माओवादी केन्द्र संसदीय दलका नेताले प्रदेशसभामा दिएको निवेदनः

'प्रस्तुत विषयमा माननीय प्रदेश प्रमुखज्यूबाट विक्रम संवत् २०८१ साल वैशाख ६ गतेका लागि संविधानको धारा १८३ को (३) बमोजिम आह्वान भएको कोशी प्रदेशसभाको अधिवेशनको बैठक २०८१ साल वैशाख ६ र ७ गते बसी उक्त बैठकले मुख्यमन्त्री माननीय केदार कार्कीले बहुमत प्रदेशसभा सदस्यको समर्थन गुमाई अल्पमत पर्नुभएकाले २०८० साल चैत २६ गतेका मितिले नेपालको संविधानको धारा १८८ (२) बमोजिमको अवधिभत्र प्रदेशसभाबाट विश्वासको मत लिन निर्देशन दिने संकल्प प्रस्ताव पारित भएको र सो अधिवेशनमा मुख्यमन्त्रीज्यूले विश्वासको मत लिन कुनै प्रस्ताव सभासमक्ष पेस नगर्नुभएको तथा वैशाख ७ गते नै अधिवेशन समाप्त भएको र सो अधिवेशनमा भएका निर्णयहरूको कार्यान्वयन भए नभएको जानकारी माननीय प्रदेश प्रमुखज्यूसमक्ष पठाई सोको जानकारी हामी निवेदकसमेतलाई उपलब्ध गराइदिनु हुन अनुरोध गर्दछौँ ।'

यो निवेदनको जवाफमा प्रदेशसभा सचिवालयले सो अवधिमा मुख्यमन्त्री कार्कीले विश्वासको मतसम्बन्धी प्रस्ताव प्रदेशसभामा दर्ता नगराएको जवाफ दिएको थियो ।

प्रदेशसभाबाट यस्तो जवाफ आएपछि संसदीय दलका नेताद्वय कार्की र आङ्बोले प्रदेश प्रमुख खापुङलाई नयाँ सरकार गठनको प्रक्रिया सुरु गर्न आग्रह गरेका छन् ।

'२५ वैशाख २०८१ को राति १२ बजेबाट माननीय केदार कार्कीले कोशी प्रदेश सरकाको मुख्यमन्त्री पदको संवैधानिक र कानुनी हैसियत गुमाई स्वतः पदमुक्त भैसक्नु भएको हुँदा नेपालको संविधानबमोजिम नयाँ सरकार गठनका लागि तत्काल उपयुक्त प्रक्रिया प्रारम्भ गर्न माननीय ज्यूसमक्ष हार्दिक अनुरोध गर्दछौँ,' कार्की र आङ्बोले दिएको निवेदनमा भनिएको छ ।

यस्तो छ प्रदेश प्रमुखलाई कार्की र आङ्बोले दिएको निवेदनः