जसपा विभाजनको झड्काः जसपा र नेकपा एसबीच पार्टी एकताको चर्चा

A+ A A-

उपेन्द्र यादव नेतृत्वको जनता समाजवादी पार्टी (जसपा) नेपालको फुटको त्रास माधव नेपाल नेतृत्वको एकीकृत समाजवादी (एस) मा पनि परेको छ । सत्ता राजनीतिका कारण जसपाले फुटको मार खेपेसँगै त्यही रोग एसमा पनि सर्ने चर्चा भइरहेको छ ।

अहिले पनि एसभित्र केही सांसदहरू फुटका लागि चलखेल गरिरहेको स्रोतले दाबी गरेको छ । यद्यपि, कानुनी र प्राविधिक कठिनाइका कारण ती सांसदहरूले निर्णय भने लिन नसकेको पनि एस स्रोतको भनाइ छ । फुटकाे भयकै बीचमा यतिबेला जसपा र एसबीच पार्टी एकताको चर्चा पनि सुरु भएको छ ।

एस स्रोतका अनुसार, पार्टी विभाजन रोक्नका लागि पनि जसपासँग एकता गर्ने प्रयास भइरहेको छ । अनि, उपेन्द्र यादवले पनि आफ्नो सामर्थ्य बढाउनका लागि माधव नेपाल नेतृत्वको एससँग एकताका लागि चासो राखेकाे बताइएको छ ।

एस र जसपाबीच एकता हुँदा १५ जना सांसद हुनेछन् । सांसद १५ जना भएको अवस्थामा एसबाट पार्टी विभाजनको तयारीमा रहेका सांसदले ४० प्रतिशत पुर्‍याउन कठिनाइ हुने भएकाले पनि एकता चाँडो गर्ने गरी छलफल अगाडि बढेको स्रोतको दाबी छ । उक्त स्रोतका अनुसार, दल विभाजनको त्यही कानुनी कुरा हेरेर पनि एकतालाई चाँडो गर्ने प्रयास भइरहेकाे छ । केन्द्रमा मात्र होइन, प्रदेश सरकारलाई समेत मध्यनजर गरी दुई दलबीच एकताको प्रयास भएको हाे ।

जसपा विभाजनअघि पनि एकताका लागि छलफल भएका थिए । एस र जसपाबीच एकता हुँदा २२ सिट हुने भएकाले सत्ता बार्गेनिङमा झन् शक्तिशाली हुने नेताहरूको भनाइ थियो । एकतापछि प्रचण्ड नेतृत्वको सरकार छोड्ने उनीहरूको योजना थियो ।

त्यही योजना पत्तो पाएर गठबन्धन नेतृत्वकाे सहयाेगमा जसपा विभाजन भएको पनि एसका नेताहरूकाे विश्लेषण छ । अध्यक्ष माधव नेपालले पनि एसका नेता र सांसदहरूलाई साेही ब्रिफिङ गर्ने गरेका छन् । स्रोतका अनुसार, उक्त योजना सफल नभए पनि एसभित्रको विभाजन रोक्नका लागि अहिले फेरि एकताको प्रयास भएको हो । त्यसले आकार भने लिइनसकेको पनि स्रोतको दाबी छ ।

एसका छ जना सांसद असन्तुष्ट रहेका छन् । असन्तुष्ट सांसदको नेतृत्व भने प्रेम आलेले गरेका छन् । आलेकै नेतृत्वमा विभाजनका लागि एसभित्र माहौल बन्छ कि बन्दैन भन्ने प्रस्ट नभए पनि असन्तुष्टि भने चुलिँदो क्रममा छ । कतिसम्म भने माधव नेपालले गरेको फोन सांसदहरूले रिसिभ नगर्ने अवस्था आइरहेको छ । त्यसैले, नेपालनिकट स्रोतको भनाइमा पनि अहिले सांसदमा देखिएको असन्तुष्टि तत्काल रोकिए पनि विभाजन टार्न भने कठिन छ । त्यही कारण नेपाल अहिले यादवसँग एकता गरेर केन्द्र र प्रदेशको सरकारमा बार्गेनिङ पावर बढाउने रणनीतिमा छन् ।

एसका उपमहासचिव तथा प्रवक्ता जगन्नाथ खतिवडाले भने एकताको विषय अहिले छलफलमा नरहेको दाबी गरे । शिलापत्रसँग कुरा गर्दै उनले भने, ‘राजनीतिमा दाउ थाप्ने कुरा स्वाभाविक हो तर अहिले नै जसपासँग एकता गर्ने कुरा भने छलफलमा छैन ।'

प्रकाशित मिति: बुधबार, वैशाख २६, २०८१ १५:५५