ठूलो दलले अरु दलसँग संवाद गर्नु सामान्य हो, कांग्रेस यो सत्ता समीकरण भत्काउन लागेको छैनः रमेश लेखक

ठूलो दलले अरु दलसँग संवाद गर्नु सामान्य हो, कांग्रेस यो सत्ता समीकरण भत्काउन लागेको छैनः रमेश लेखक

A+ A A-

नेपाली कांग्रेसका प्रमुख सचेतक रमेश लेखकले आफ्नो पार्टी अहिलेको सत्ता समीकरण भत्काउन नलागेको बताएका छन् । यद्यपि, ठूलो दल भएकाले अन्य दलसँग संवाद गर्नु भने सामान्य रहेको उनको तर्क छ ।

बुधकार सञ्चारकर्मीहरूलाई प्रतिक्रिया दिँदै लेखकले नेपाली कांग्रेस सरकार ढाल्न लागेको भन्ने कुरामा सत्यता नरहेको बताए । 'हामी अहिलेको समीकरण भत्काउन लागेको भन्ने होइन । ठूलो पार्टीको हिसाबले अन्य दलसँग संवाद गर्ने सामान्य हो,' उनले भने, 'एमालेसँग मिलेर सरकार बनाउने भन्ने बारेमा बसेर कुरा भएको छैन ।'

तर, अस्थिर भएकाले ठूला दल मिलौँ भन्ने धारणा जनमानसमा रहेको लेखकको तर्क गरे । यो भाष्य कांग्रेस र एमाले दुवै दलमा पनि रहेको उनले बताए । दलहरूबीच निरन्तर संवाद सहकार्य हुनुपर्ने उनले बताए । साथै, कांग्रेसले प्रधानमन्त्रीको अफर दिँदै हिँडेको भन्ने कुरामा पनि सत्यता नरहेको बताए । 'प्रधानमन्त्रीको चिट्ठी पुष्पकमल दाहाललाई दिएका हौँ, अर्कोलाई दिइसकेको छैन,' उनले भने ।

संसदीय भूमिका कमजोर भएको भने उनले स्वीकारे । सरकारमा बस्दा पनि र प्रतिपक्षमा बस्दा पनि विधेयक निर्माणका सन्दर्भमा आफूहरूको संसदीय भूमिका कमजोर रहेको स्वीकार्न कठिनाइ नभएको उनले बताए ।

'संसदको प्रभावकारिता हुन सकेको छैन । गणपुरक संख्या पुग्न सकेको छैन,' लेखकले भने, 'स्कुलका विद्यार्थी आउँछन् कहिले स्थगित हुन्छ । कहिले आलोचनात्मक क्रिया-प्रतिक्रिया हुन्छ । यी विद्यार्थी के सिकेर जान्छन् ?,' उनले भने ।

सरकारले सदनको भूमिकालाई कम आँकेको लेखकको तर्क छ । सरकारले अलि नटेर्न खोज्ने, बिजनेस नदिने प्रवृत्ति देखाएको उनले बताए । संसदीय समितिमार्फत सरकारमाथिको निगरानी बढाइने उनले बताए ।

सांसद टेकबहादुर गुरुङको निलम्बन फुकुवा अदालती विषय भएको लेखकको भनाइ छ । 'सर्वोच्च अदालतले आदेश दिएर संसदले सूचना जारी गरेको अवस्था छ । अदालती कुरा भयो,' उनले भने । अहिले कांग्रेसमा छाया सरकारको कुरा नभएको लेखको टिप्पणी छ ।

आफूहरूले सहकारीका विषयमा पर्याप्त बोलेको उल्लेख गर्दै लेखकले यसलाई व्यक्तिकेन्द्रित गर्‍यो भन्ने भाष्य निर्माण गर्न खोजिएको टिप्पणी गरे ।

'सहकारीको विषयमा पर्याप्त बोलेका छौँ । मन्त्रीज्यूको मात्र छानबिन गर्न खोजिएको भाष्य बनाउन खोजिएको छ । बचतकर्ताको रकम सुरक्षित हुनपर्छ,' उनले भने, 'एक जना व्यक्तिको विरुद्ध लक्षित टिप्पणी मैले गरेको छैन । उपप्रधानमन्त्री व्यक्ति मात्र होइन ।'

प्रकाशित मिति: बुधबार, वैशाख २६, २०८१ १४:०३