पार्टी फुटको क्षति कम गराउने कोसिसमा उपेन्द्र, मुख्यमन्त्री ताक्दै जनमतका चन्दन

पार्टी फुटको क्षति कम गराउने कोसिसमा उपेन्द्र, मुख्यमन्त्री ताक्दै जनमतका चन्दन

A+ A A-

अमेरिकामा हुँदै कार्यवहाक अध्यक्ष राजेन्द्र श्रेष्ठकै नेतृत्वमा पार्टी फुटेपछि जनता समाजवादी पार्टी (जसपा), नेपालका अध्यक्ष उपेन्द्र यादव ड्यामेज कन्ट्रोलको प्रयासमा लागेका छन् ।

स्वास्थ्य तथा जनसंख्यामन्त्रीको हैसियतमा जनसंख्यासम्बन्धी कार्यक्रममा भाग लिन अमेरिका पुगेका यादव पार्टी विभाजनपछि भ्रमण छोट्याएर काठमाडौं फर्किएका थिए । त्यही क्रममा उनले ट्रान्जिट परेको दुबईबाट नै संसदीय दलको बैठक बोलाएका थिए ।

२६ वैशाखमा बसेको संसदीय दलको बैठकले सत्ता गठबन्धनलाई निरन्तरता दिने निर्णय मात्रै गरेन, प्रधानमन्त्री पुष्पकमल दाहाल प्रचण्डसँग भेटेर त्यही निर्णय दोहोर्‍याएका छन् । खासमा यादव अमेरिकाबाट फर्किएलगत्तै प्रधानमन्त्री प्रचण्डलाई दिएको समर्थन फिर्ता लिने निर्णय गर्ने चर्चा थियो । उक्त चर्चाकै बीच उनी अमेरिकाबाट काठमाडौं ओर्लिन नपाउँदै पार्टी विभाजन भएको टिप्पणी गरिन्छ । हुन पनि, बहुमत सांसद नै अध्यक्ष यादवको विपक्षमा देखिएका थिए ।

अझ यादवकै साथमा रहेका केही सांसद अहिले पनि असन्तुष्ट छन् । तर, अशोक राई, प्रदीप यादवसहितको विभाजन गर्ने टिमले ती असन्तुष्टसँग छलफल नगरेकाले यादवकै पार्टीमा रहेको पनि बताइन्छ । त्यसैले अहिले यादव क्षति न्यूनीकरणको चरणमा छन् । प्रतिनिधिसभाको संसदीय दल औपचारिक रूपमा विभाजित भइसकेका कारण त्यसको क्षति कम गर्न भने यादवलाई समस्या पर्न सक्छ ।

यद्यपि, धनुषाका सांसद दीपक कार्कीले भने विज्ञप्ति निकालेर यादवसँगै रहेको बताएका छन् । सुरुमा कार्की राईहरूकै टिममा रहेको भनिएको थियो । मधेश प्रदेशको प्रदेशसभामा हुने क्षति रोक्न भने यादवले निकै प्रयास गरिरहेका छन् । अहिलेसम्म मधेश प्रदेशबाट को-को सांसदले राईलाई समर्थन गर्छन् ? भन्ने प्रस्ट भइसकेको छैन ।

तर, जसपाभित्र चलेको चर्चा अनुसार करिब ६ जना सांसद राईको पक्षमा खुल्न सक्छन् । हुन त, प्रदीप यादवसहितको टोली अहिले प्रदेशसभा सदस्यलाई फकाउन लागिरहेका छन् । उनीहरूले कम्तीमा ९ जना सांसदलाई आफूतिर तान्न सकिने बताइरहेका छन् । अहिलेका मुख्यमन्त्री सरोजकुमार यादव र पूर्वमुख्यमन्त्री लालबाबु राउत अहिलेसम्म यादवकै पक्षमा रहेकाले मधेश प्रदेशमा ठूलो संख्यामा सांसदले राईलाई समर्थन गर्ने सम्भावना नभएको पनि दाबी गरिएको छ ।

त्यसमाथि धनुषाका सांसद दीपक कार्की पनि यादवकै पक्षमा बसेकाले राईको पक्षमा खुल्ने मधेशका सांसदको संख्या कम हुने आकलन भएको हो । मधेश प्रदेशमा जसपाका १९ जना सांसद छन् । अहिले चर्चा भएअनुसार नै ६ जना सांसदले राईलाई समर्थन गरेमा जसपाको शक्ति डा. सीके राउत नेतृत्वको जनमत पार्टीकै हैसियतमा ओर्लिनेछ । साथै, उसले मुख्यमन्त्री पनि गुमाउने सम्भावना छ ।

त्यस्तो अवस्थामा यादवको पार्टी छोड्ने सांसदको संख्या बढ्ने चर्चा पनि मधेशमा हुन थालेको छ । जसपाको विकल्पमा आफूलाई उभ्याएर जनमत पार्टीले मुख्यमन्त्रीको दाबेदारी बढाउन थालेको छ । उसले त्यहीअनुसार रणनीति बनाएर एमाले र माओवादी केन्द्रसँग छलफल बढाएको स्रोतको दाबी छ ।

अहिले जनमतमा चन्दन सिंह मुख्यमन्त्रीको दौडमा छन् । जसपाका प्रवक्ता तथा मधेश प्रदेशका सांसद मनिष सुमनले पार्टी विभाजन नभएको दाबी गरिरहेका छन् । मधेश प्रदेशबाट राईको पक्षमा खुल्ने सांसद नभएको पनि सुमनको दाबी छ ।

२५ वैशाखमा संसदीय दलको बैठक राखेर उनीहरूले सबै सांसदलाई जुटाउने प्रयास गरेका थिए । त्यसदिन प्राविधिक रूपमा ३ जना सांसद अनुपस्थित भए पनि अन्य सांसद भने एकजुट रहेको सुमनको दाबी छ । त्यसैले पार्टी र संसदमा हुने क्षति न्यूनीकरणका लागि भइरहेका प्रयासकै क्रममा बुधबार (आज) जसपा नेपालले पत्रकार सम्मेलन गर्दै छ ।

सुमनद्वारा जारी विज्ञप्तिले पनि समसामयिक विषयमा हुने छलफलसम्बन्धी पत्रकार सम्मेलनले त्यही संकेत गरेको छ ।

प्रकाशित मिति: बुधबार, वैशाख २६, २०८१ ०७:३४