परमाणु हतियारसहित युद्ध अभ्यास गर्न रुसी सेनालाई पुटिनको निर्देशन

A+ A A-

रुसका राष्ट्रपति भ्लादिमिर पुटिनले सेनालाई परमाणु हतियारसहित युद्ध अभ्यास गर्न निर्देशन दिएका छन् । यो युद्ध अभ्यासमा जल सैनिक र युक्रेनी सीमा नजिक तैनाथ सेनालाई पनि समावेश गरिनेछ ।

नेटो र पश्चिमा देशले युक्रेनको सहयोगका लागि सेना पठाउने बताएपछि पुटिनले परमाणु हतियारसहित युद्ध अभ्यास गर्न निर्देशन दिएका हुन् । रुसी रक्षा मन्त्रालयका अनुसार युद्ध अभ्यासका क्रममा रणनीतिक परमाणु हतियारको तैनाथीमा ध्यान केन्द्रित गरिनेछ । यद्यपि, यो सैन्य अभ्यास कहिले हुन्छ भन्ने जानकारी दिइएको छैन ।

गत साता मात्रै फ्रान्सका राष्ट्रपति इमानुएल म्याक्रोंले युक्रेनले सहयोग मागेमा आफ्नो सेना त्यहाँ पठाउने बताएका थिए । त्यसको एक दिनपछि ब्रिटिस विदेशमन्त्री डेभिड क्यामरुनले युक्रेनले चाहेमा रुसमाथि हमला गर्न ब्रिटिस हतियार प्रयोग गर्न सक्ने बताएका थिए ।

रुसले दुवै देशका यस्ता भनाइको विरोध गरेको थियो । दुई महिनाअघि मात्रै रुसी राष्ट्रपति पुटिनले अमेरिकालाई परमाणु हमलाको चेतावनी दिँदै युक्रेनमा सेना पठाएमा युद्ध बढ्ने उल्लेख गरेका थिए । परमाणु युद्धको तत्कालै आवश्यकता नदेखिएको तर सैन्य र प्राविधिक रूपमा तयार रहेको पुटिनको भनाइ थियो ।

पुटिनले गत वर्ष बेलारुसमा परमाणु हतियार तैनाथ गर्ने घोषणा गरेका थिए । पूर्व सोभियत राज्य बेलारुससँग रुसको निकट सम्बन्ध छ । दशकौँदेखि अमेरिकाले बेल्जियम, जर्मनी, नेदरल्यान्ड्स र टर्कीमा परमाणु हतियार राखेकोजस्तै रुसले बेलारुसमा परमाणु हतियार राख्न खोजेको जवाफ रुसले दिएको थियो ।

सन् १९९० पछि रुसले कुनै अन्य देशमा आफ्ना परमाणु हतियार तैनाथ गरेको यो पहिलो घटना हो । अमेरिकाले भने ब्रिटेन, बेल्जियम, जर्मनी, इटाली, नेदरल्यान्ड्स, टर्कीजस्ता देशमा आफ्ना परमाणु हतियार तैनाथ गरेर राखेको छ । सन् २०२१ मा सुरक्षा प्रस्ताव पेस गर्दै रुसले अमेरिकालाई परमाणु हतियार फिर्ता लैजान आग्रह गरेको थियो । यद्यपि, यो प्रस्तावलाई अमेरिका र नेटोले खारेज गरिदिएका थिए ।

प्रकाशित मिति: मंगलबार, वैशाख २५, २०८१ १६:४५