अध्यागमनका महानिर्देशक नै भन्छन्- अपत्यारिलो संख्यामा नेपालीहरू भिजिट भिसामा विदेश गइरहेका छन् (अन्तर्वार्ता)

अध्यागमनका महानिर्देशक नै भन्छन्- अपत्यारिलो संख्यामा नेपालीहरू भिजिट भिसामा विदेश गइरहेका छन् (अन्तर्वार्ता)

A+ A A-

पछिल्लो समय यूएईलाई ‘ट्रान्जिट’ बनाएर दलालहरूले नेपाली महिलालाई कुवेतहुँदै साउदी अरबदेखि रोजगारीका लागि इराक र सिरियाजस्ता प्रतिबन्धित मुलुकसम्म पुर्‍याइरहेका छन् । हातमा यूएईको भिजिट भिसा तर झोलामा कुवेतको पेपर भिसा र टिकट लिएर विमान चढ्नेको संख्या बढ्दो छ । यसै साताको आइतबार मात्र भिजिट भिसामा १ हजार ३ सय ४४ जना नेपाली यूएई उडेका छन् । अर्को सातासम्म उनीहरू कहाँकहाँ पुग्छन् भन्ने कुरा दलाललाई मात्र थाहा छ । तथ्यांकले आउनेको भन्दा घुम्न जानेको संख्या बढिरहेको देखाउँछ । यसै सन्दर्भमा अध्यागमन विभागका महानिर्देशक कोशहरि निरौलालाई ८ प्रश्न गरेका छौँ:

भिजिट भिसामा जानेहरूलाई विमानमा चढ्नुअघि के-कस्तो सोधीखोजी गरिन्छ ?

यसका लागि छवटा बुँदा बनाइएको छ । ती बुँदाहरूमा उल्लेखित सर्त पूरा भएको छ, छैन भनेर हेर्ने गरेका छौँ । त्यसपछि स्वघोषणा फारम भराउने चलन छ । त्यसमा ‘म यसमा आफैँ पूर्ण जिम्मेवार हुनेछु’ भनेर जाने मान्छेले फारम भरेर सही गरेपछि बल्ल अनुमति दिइने चलन छ ।

छवटा सर्तहरू के-के हुन् भनिदिनुस् न ।

कम्तीमा ६ महिना म्याद भएको राहदानी, गन्तव्य देशको भिसा, आउनेजाने दुवैतर्फको हवाई टिकट, त्यहाँ होटल बुकिङ गरिएको छ या छैन भन्नेलगायतका कुरा हेरिन्छ । यदि होटल बुकिङ नगरेर आफन्तसँग रहने भएमा एकाघरको तीन पुस्ताको नाता खुल्ने मान्छे छ/छैन हेरिन्छ । कम्तीमा ५०० डलरको नगद सटही भएको प्रमाणपत्र चाहिन्छ । ती भ्रमणबाहेक अन्य कुनै क्रियाकलापमा संलग्न हुने छैन भन्ने लगायतका ६ बुँदा राखेर स्वघोषणापत्रमा हस्ताक्षर गराइन्छ ।

झोलामा कुवेतको पेपर भिसा र टिकट अनि हातमा दुबईको भिजिट भिसा बोकेर विमानस्थल छिर्नेहरू बढिरहेका छन् भन्ने सुनिन्छ । अर्कातिर तथ्याङ्कले नै निरन्तर तस्करी बढिरहेको देखाउँछ । अध्यागमन कर्मचारीको मिलेमतोबिना यो कसरी सम्भव छ ?

हामीलाई पनि त्यस्ता उजुरी आइरहेका छन् । अब झोलाभित्र के छ भनेर खोतलेर हेर्ने कुरा त भएन नि । हामीलाई पनि धेरैले यस्तो भइरा'छ भनेर सुनाएका चाहिँ छन् । यसमा अनुसन्धान गरिरहेका छौँ । कर्मचारीको मिलेमतो देखिएको खण्डमा कारबाही गर्छौं ।

कुवेतस्थित केही एजेन्टले हामीसँग कुरा गर्दै अध्यागमनका कर्मचारीलाई प्रतिव्यक्ति ३० हजार रुपैयाँ खुवाएको बताएका छन् । यसमा यहाँहरूकाे स्पष्टीकरण के हो ?

यस्तो भएको थाहा भएमा हामीलाई जानकारी भयो भने सिधै कारबाही हुन्छ । तर, कसैले यत्तिकै सुनाएको विषयमा त केही भन्न सकिन्न । यदि उजुरी आयो भने कारबाही हुन्छ । यसमा शङ्कै नगरे हुन्छ । हालसम्म यहाँ कार्यरत कर्मचारीको हकमा प्रमाण नदेखिएकाले स्वीकार गर्न सकिन्न ।

अस्वीकार मात्र गर्नुहुन्छ कि आन्तरिक छानबिन पनि गर्नुहुन्छ ?

हामीले कुनै निकाय वा मिडियाबाट कसले पैसा लिइरहेको छ र दिनेले पनि दिएको छ भन्ने थाहा पायौँ भने कारबाही हुन्छ । आन्तरिक छानबिन पनि नियमित हुन्छ । झन् पछिल्लो समय तपाईंहरूले भनेजस्तो गुनासो आउन थालेपछि त यसलाई बढाइएको छ ।

उमेर पुगेको नागरिकले स्वतन्त्रतापूर्वक कुनै ठाउँमा जान पाउने कुरा नैसर्गिक अधिकार हुन्छ । कुनै सम्बन्धित देशले भिसा दिन्छ भने जान पाउनुपर्छ । तर, यही सुविधालाई तस्कर दलालहरूले गलत तरिकाले प्रयोग गरिदिए र गरिरहेका छन् भन्ने उजुरी पनि आएका छन् । हामीले यसबारेमा अनुसन्धान गरिरहेका छौँ ।

नयाँ नियमले झन् दलाल र अध्यागमन कर्मचारीलाई सजिलो बनाइदिएको छ भनिन्छ नि ? होटेल बुकिङ, टु–वे टिकट बुकिङलगायतका कुरा देखाए भइहाल्ने रहेछ । त्यसमा चाहिने भनेको ५ सय डलर पनि दलालले दिएर पछि फिर्ता लिइरहेको देखिन्छ । यसबारे के भन्नुहुन्छ ?

हामीले नयाँ नियममार्फत सहजीकरण नै गरेको हो । पहिला अप्ठ्यारो भयो, गाह्रो भयो भनेर सहजीकरण गरेका हौँ । उमेर पुगेको नागरिकले स्वतन्त्रतापूर्वक कुनै ठाउँमा जान पाउने कुरा नैसर्गिक अधिकार हुन्छ । कुनै सम्बन्धित देशले भिसा दिन्छ भने जान पाउनुपर्छ । तर, यही सुविधालाई तस्कर दलालहरूले गलत तरिकाले प्रयोग गरिदिए र गरिरहेका छन् भन्ने उजुरी पनि आएका छन् । हामीले यसबारेमा अनुसन्धान गरिरहेका छौँ ।

यूएईकै कुरा गर्दा दैनिक हजारौँ गइरहेको देखियो नि ?

हो । पछिल्लो समय धेरै गइरहेका छन् । अब हामी पनि विश्वास गर्न सक्दैनौँ कि यत्रा मान्छे सबै घुम्न जान सक्छन् भनेर । तपाईंहरूले गर्नुभएको शंकालाई म अस्वीकार गर्दिनँ । यी सबै घुम्न गएका हुन् भनेर भन्दै भन्दिनँ । केही त्यो हैसियतका व्यक्ति पनि होलान् तर यी सबै घुम्न जान्छन् भनेर हामी पनि पत्याउँदैनौँ ।

सम्बन्धित समाचार

यूएई ‘ट्रान्जिट’ बनाएर भिजिट भिसामा युद्धग्रस्त देशमा मानव तस्करी

सबै देश गरेर आइतबार मात्र घुम्न जानेको संख्या ८ हजार ४ सय ४७ थियो भने आउनेको संख्या ६ हजार ४ सय ७१ थियो । अस्तिको दिन (शनिबार) आउनेको संख्या ६ हजार ३ सय ७२ थियो भने जानेको संख्या ८ हजार ६ सय ८४ थियो । दैनिक रूपमा हेर्दा आउनेको भन्दा जानेको संख्या ठूलो छ । यी सबै घुम्न नै गएका हुन् भन्नेमा हामीलाई पनि शंका छ ।

यसलाई रोक्न अध्यागमनले केही योजना बनाइरहेको छ कि छैन ?

यही कुरामा थप केके गर्न सकिन्छ भनेर मन्त्रालय पनि लागिराखेको छ । हामी पनि लागिराखेका छौँ । कार्यदल नै बनाएर अघि बढ्ने हो कि भनेर कुरा भइरहेको छ । मन्त्रालयले हामीलाई निर्देशन पनि दिएको छ र त्यसका लागि हामीले विवरण तयार गरिरहेका छौँ ।

कि यूएईमै छुट्टै युनिट राख्नुपर्छ, कि यूएईसँगै सम्झौता गरेर ‘नो अब्जेक्सन लेटर’को व्यवस्था गर्नुपर्छ भन्ने विषयमा अध्ययन पनि भइरहेको छ । यूएईमै बस्नुभएका नेपालीहरूले यसरी गए, गइरहेका छन् भन्ने खालका उजुरी गरिरहनुभएको छ । हामीलाई नै प्रत्यक्ष सुनाउनुहुन्छ । यो विषयमा पनि छलफल गरिरहेका छौँ ।

प्रकाशित मिति: मंगलबार, वैशाख २५, २०८१ १६:५२

कौशल काफ्ले

प्रतिक्रिया दिनुहोस्

भर्खरै

इरानी राष्ट्रपति रइसी चढेको हेलिकोप्टर दुर्घटना, अवस्था अज्ञात

जीबी राईले गरेको फोहोर मैले सफा गर्नुपर्छ भन्ने छैन : लामिछाने

संसदमा लामिछाने– ममाथि छानबिन गर्ने भए अरु काण्डमा पनि छानबिन समिति बनाउन तयार हो ?

गृहमन्त्रीकाे गम्भीर आराेप– विदेशीका एजेन्ट संसदमा छन्

'एक्सिटो एक्सिलेन्सी अवार्ड'बाट महेश राणा सम्मानित

लोकप्रिय

छानबिन समिति बने गृहमन्त्रीबाट राजीनामा दिने तयारीमा रवि लामिछाने

एउटै रेडियोमा काम गर्थे रवि र गगन, २५ वर्षपछि सम्बन्धमा कसरी बढ्यो खटपट ?

'ओलीकाे दल फुटाउने षड्यन्त्रमा प्रचण्डकाे पनि संलग्नता देखियाे, विश्वासकाे मत लिने कुरामा सफा नियत छैन'

को हो गौशाला २६ ?

एमाले र माओवादीसँग कसरी बिग्रियो उपेन्द्रको सम्बन्ध ?

विचार

पत्रकारिता र विचारको लडाइँ

विद्यार्थी आन्दोलनमाथि उठिरहेको प्रश्न

दिगो विकासको आधारः शिक्षा व्यवस्था र विश्वदृष्टिकोण

ब्लग

सम्पादक शिव डोटेललाई पत्र- साँच्चै ती दिन क्या दामी थिए है

रहस्यैरहस्यको चाङ नरवीर नेम्वाङ

गोसाइँकुण्ड यात्राले स्वस्थ छु, चुस्त छु भन्ने भ्रमबाट मुक्त गरायो

शिक्षा

बेनी नगरपालिकाले सुरु गर्‍यो ‘हामी सक्छौँ, हामी गर्छौं’ कार्यक्रम

विद्यार्थीविहीन विद्यालयमा चार शिक्षक

दिगो विकासको आधारः शिक्षा व्यवस्था र विश्वदृष्टिकोण