रास्वपा संसदीय दलको बैठकः मनिष झा भन्छन्- सबै दल सहमत भए सहकारी प्रकरणको छानबिन गर्न तयार छौँ

रास्वपा संसदीय दलको बैठकः मनिष झा भन्छन्- सबै दल सहमत भए सहकारी प्रकरणको छानबिन गर्न तयार छौँ

A+ A A-

राष्ट्रिय स्वतन्त्र पार्टीको संसदीय दलको बैठकमा आगामी बजेट अधिवेशनमा पार्टीको भूमिकाबारे छलफल भएको छ ।

मंगलबार सिंहदरबारस्थित पार्टीको संसदीय दलको बैठकमा आगामी वर्षे अधिवेशन र बजेटबारे कसरी प्रस्तुत हुने भन्नेबारेमा छलफल भएको सांसद मनिष झाले जानकारी दिए । छलफलमा आगामी बजेटका बारेमा नीति तथा कार्यक्रम र आफ्नो दलको तर्फबाट सरकारमा पाएको मन्त्रालयका बारेमा कठोर रूपमा प्रस्तुत विषयमा छलफल भएको उनको भनाइ छ ।

'बजेट अधिवशेनको तयारीको क्रममा छलफल गरेका छौँ । वर्तमान वस्तुस्थिति र राजनीतिक घटनाक्रमका बारेमा छलफल भएको छ,' झाले भने, 'सभापतिज्यूले अपडेट गराउनुभएको छ । मन्त्रीज्यूहरूले पनि अनुभव सुनाउनुभएको छ ।’

राजनीतिक कठोरता, निर्ममता र सबै रूपमा मन्त्रालयहरूलाई सत्ता पक्ष मात्र नभई जनप्रतिनिधिको रूपमा हेर्ने गरी अघि बढ्नेबारेमा छलफल भएको झाले जानकारी दिए । बजेट अधिवशेन आउँदै गर्दा राजनीतिक दलहरूले विभिन्न साझेदारहरूसँग छलफल गर्न आवश्यक रहेका बारेमा पनि छलफल भएको उनको भनाइ छ ।

साझेदारी संघसंस्था, बैंकर्स, बुद्धिजीवी, निजीक्षेत्रसँग छलफल गर्नुपर्ने भन्नेबारेमा पनि छलफल भएको झाले जानकारी दिए ।

'बजेट अधिवशेन आउँदै गर्दा राजनीतिक दलहरूले विभिन्न साझेदारहरूसँग छलफल गर्न आवश्यक छ । मिडिया, साझेदारी संघसंस्था, बैंकर्स, बुद्धिजीवी, निजीक्षेत्रसँग छलफल गर्नुपर्ने भन्नेबारेमा पनि छलफल भएको छ,' झाले भने ।

गत वर्षको बजेट अधिवेशनमा आफ्नो राजनीतिक दलको प्रस्तुतिलाई हेरेर कमजोरी भए सुधार गर्ने र अघि बढ्ने बारेमा छलफल भएको झाको भनाइ छ । बैठकमा वर्तमान राजनीतिक परिस्थितिका बारेमा पनि छलफल भएको उनले जानकारी दिए ।

सबै राजनीतिक दलहरूले स्वीकार गर्ने र सत्तामा रहेका दलहरूको सर्वदलीय निर्णय भयो भने छानबिन समिति बनाउने निष्कर्षमा पुगे सहकारी प्रकरणमा उपप्रधानमन्त्री एवं गृहमन्त्रीमाथि छानबिन गर्न आफूहरू सहमत हुने पनि झाको भनाइ छ ।

प्रकाशित मिति: मंगलबार, वैशाख २५, २०८१ १२:२०