प्रथम कर्णाली हाफ म्याराथनका विजेताले ५५ हजार रुपैयाँ पाउने

A+ A A-

प्रथम कर्णाली हाफ म्याराथनमा पुरुष तथा महिलातर्फका विजेतालाई समान ५५ हजार रुपैयाँ पुरस्कार दिइने भएको छ ।

सोमबार बसेको रेस नेपालको आयोजना एवं क्रियटिभ गन्ज मिडिया एण्ड इभेन्ट म्यानेजमेन्टको संयुक्त बैठकले हाफ म्याराथनमा पुरुष तथा महिलातर्फका विजेतालाई समान ५५ हजार रुपैयाँ पुरस्कार दिने निर्णय गरेको हो ।

२९ वैशाखमा कर्णालीको राजधानी सुर्खेतको वीरेन्द्रनगरमा हुन लागेको प्रथम कर्णाली हाफ म्याराथनमा दोस्रो स्थान प्राप्त गर्नेलाई ३० हजार र तेस्रो स्थान हासिल गर्नेलाई समान २० हजार रुपैयाँ नगदले पुरस्कृत गरिने आयोजक रेश नेपालका अध्यक्ष टीएस ठकुरीले जानकारी दिए ।

हाफ म्याराथनमा पुरुष ४५ वर्षमाथि उमेर समूहका शीर्ष तीन धावकलाई क्रमशः १५ हजार, १० हजार र ५ हजार रुपैयाँ प्रदान गरिनेछ । त्यस्तै, विद्यालय तहका छात्र एवं छात्रातर्फ शीर्ष तीनलाई १० हजार, पाँच हजार र तीन हजार नगद पुरस्कार प्रदान गरिनेछ । कर्पोरेटतर्फका विजेतालाई विशेष प्याकेजद्वारा पुरस्कृत गरिने आयोजकले जनाएको छ ।

आसन्न दशौँ राष्ट्रिय खेलकुदलाई प्रवर्द्धन गर्नेगरी कर्णाली हाफ म्याराथन आयोजना गर्न लागिएको हो । पहिलो संस्करणको सफलतासँगै हरेक वर्ष उपयुक्त समयमा कर्णाली हाफ म्याराथन आयोजना गरिनेछ । विधाहरू थप गर्दै लगिने अध्यक्ष ठकुरीले बताए ।

पहिलो संस्करणमा स्थानीयको सहभागिता र चासोलाई मध्यनजर गर्दै यसको कोर्सलाई आधिकारिकताका लागि चाँडै पहल गरिनेछ । कर्णाली हाफ म्याराथनका विजेतामध्ये उत्कृष्ट समय दिने खेलाडीलाई विदेशी भूमिमा सञ्चालन हुने वर्ल्ड एथलेटिक्सबाट लेवल प्राप्त म्याराथनमा सहभागिताको अवसर प्रदान गर्ने तयारीसमेत आयोजकले गरेको छ ।

कर्णाली हाफ म्याराथनका लागि सम्पूर्ण संयोजनको जिम्मेवारी वीरेन्द्रनगर नगरपालिकाका निवर्तमान मेयर देवकुमार सुवेदीलाई दिइएको छ । त्यसैगरी, कुमारशमशेर थापालाई सदस्य-सचिवको जिम्मेवारी दिएइको छ । रेस डाइरेक्टरमा पूर्वमुख्य प्रशिक्षक चन्द्रबहादुर गुरुङलाई नियुक्त गरिएको छ ।

विगत ९ वर्षदेखि नेपालगन्ज म्याराथन आयोजना एवं व्यवस्थापन गर्दै आएको क्रियटिभ गन्ज मिडिया एण्ड इभेन्ट म्यानेजमेन्टले दौड संस्कृतिको प्रवर्द्धन गर्दै प्रतिभाशाली खेलाडी खोज अभियानअन्तर्गत कर्णाली हाफ म्याराथन गर्न लागेको हो । धारा नेपालगन्ज म्याराथनले आफ्नो यात्राको एक दशक पूरा हुने पूर्वसन्ध्यामा दौडसम्बन्धी विविध नयाँ सोच र कार्यक्रम तयारी गरेको छ ।

आफ्नो भगिनी दौड प्रतियोगिताका रूपमा विभिन्न दूरीका अलगअलग दौड प्रतियोगिता सुरुवात गर्ने क्रममा कर्णाली हाफ म्याराथन सञ्चालन गर्न लागिएको हो । यसलाई क्रमशः अन्तर्राष्ट्रिय मान्यता दिलाउने प्रक्रियामा अघि बढाउने र कर्णाली म्याराथनलाई विश्व म्याराथनको छातामुनि लैजाने पनि रेस नेपालले तयारी गरेको छ ।

कर्णाली प्रदेश खेलकुद विकास परिषद्‌सँगको आर्थिक सहयोग साझेदारी तथा अन्य स्थानीय पालिका एवं निजी क्षेत्रको सहयोगमा कर्णाली हाफ म्याराथन हुन लागेको हो ।

प्रकाशित मिति: सोमबार, वैशाख २४, २०८१ १७:००