एमालेमा भित्रिन अनुनय गरेका वामदेवलाई ओलीकाे जवाफ– तपाईंकै महाअभियान सफल हाेस्

एमालेमा भित्रिन अनुनय गरेका वामदेवलाई ओलीकाे जवाफ– तपाईंकै महाअभियान सफल हाेस्

A+ A A-

कम्युनिस्ट पार्टी एकताकाे अभियान चलाइरहेका वामदेव गाैतमले एमालेमै फर्किन पाऊँ भन्दै सार्वजनिक मञ्चबाटै गरेकाे आग्रहप्रति अध्यक्ष केपी शर्मा ओलीले छुट्टै छलफल गर्ने जवाफ फर्काएका छन् । उनले सार्वजनिक मञ्चमा त्यसबारे कुरा गर्नु उपयुक्त नहुने भन्दै हाललाई गाैतमले चलाइरहेकाे एकता अभियान नै सफल रहाेस् भनी शुभकामना पनि दिए ।

साेमबार ललितपुरमा आयोजित वरिष्ठ राजनीतिज्ञ सिद्धिलाल ज्ञवाली स्मृति ग्रन्थ विमोचन कार्यक्रममा गाैतमले एमालेमा आफूलाई गतिलाे जिम्मेवारी दिएर भित्र्याउन ओलीलाई आग्रह गरेका थिए । गौतम यतिमै राेकिएनन्, उनले मान्छेबाट नै गल्ती हुने बताउँदै आफूबाट पनि विगतमा गल्ती कमजोरी भएको स्वीकारे । तर, अहिले आफूले विगतकाे गल्तीप्रति आत्मालोचना गरिसकेकाले माफी दिएर पार्टीमा भित्र्याउन ओलीसँग अनुनय गरे ।

उनले पार्टी फुटेको बेला ओलीले बोलाउँदा आफू एमालेमा नजानु गल्ती भएको बताउँदै उतिबेला ओलीले सम्झाएकाे कुरा अहिले उचित लागिरहेकाे बताए । गाैतमले २०८४ को निर्वाचनमा एमालेले ६० लाख मत प्राप्त गर्ने गरी योजना बनाउन र त्याे जिम्मेवारी आफूलाई दिन ओलीसमक्ष माग गरे । 'फेरि पनि पार्टी फुटाउँछ कि भन्ने डर लाग्छ भने मसँग अरू कोही मानिस राखिदिनुहाेला,' गाैतमले भने ।

तर, ओलीले भने गाैतमले एमालेमै फर्किन गरेकाे अनुनयबारे उपयुक्तस्थलमा छलफल गर्ने बताए । 'त्यसका लागि छलफल गर्ने याे थलाे उपयुक्त हाेइन । त्यस कारणले त्यसमा अहिले म प्रवेश गर्न चाहन्नँ,' ओलीले भने । यद्यपि गौतमले आफू एमालेमा फर्कन चाहेको भनी राखेको एकताको भावना भने सकारात्मक रहेकाे ओलीले बताए ।

'अहिलेलाई तपाईं राष्ट्रिय एकता महाअभियानकाे अध्यक्ष हुनुहुन्छ । याे महाअभियान सफल रहोस्, मेराे शुभकामना छ,' ओलीले भने ।