लालटिन बालेर पनि नभेटिने हाेइन, जता खोज्दा पनि एमाले भेटिने अवस्था छ : ओली

A+ A A-

नेकपा एमालेका अध्यक्ष केपी शर्मा ओलीले अहिले देश एमालेमय भएको बताएका छन् । सोमबार ललितपुरमा आयोजित वरिष्ठ राजनीतिज्ञ सिद्धिलाल ज्ञवाली स्मृति ग्रन्थ विमोचन कार्यक्रममा ओलीले एमालेलाई लालटिन बालेर खोज्दा पनि नभेटिने बनाउँछौँ भनेर केही शक्ति लागेका भए पनि जता खोज्दा पनि एमाले नै भेटिने अवस्थामा पुगेको बताए ।

‘खोज्दा नभेटिने होइन एमालेमय छ देश, जहाँ हेर्‍यो त्यहाँ एमाले भएको छ, जहाँ हेर्‍यो त्यहाँ एमालेमय बन्छ, त्यसैका लागि मिसन २०८४’, ओलीले भने । एमालेले स्वार्थका लागि होइन सफलताका लागि एकताको अभियान चलाउने उनले बताए । राष्ट्रिय शक्तिलाई निर्णायक तहमा विकास गर्ने काममा एमाले लागेको उनले स्पष्ट पारे । एमालेलाई सिद्धाउँछौँ भनेर लागेको बेला पनि नेकपा एमाले देशको प्रमुख शक्तिको रूपमा स्थापित भएको उनले बताए ।

हालै भएको दुईवटा निर्वाचन नेकपा एमालेले जितेको बताउँदै उनले यो मिसन २०८४ को सफलताको सुरुवात भएको बताए । एमालेको अभियानमा यथोचित ढंगले समाहित हुन उनले सबैलाई आग्रह गरे । एमालेलाई निर्णायक राष्ट्रिय शक्तिको रूपमा विकास गर्न सबैलाई एमालेको अभियानमा लाग्न ओलीले आह्वान गरे । उनले आफूलाई कम्युनिस्ट भन्ने पार्टी र व्यक्तिलाई कम्युनिस्ट पार्टीको मूलधार नेकपा एमालेमा समाहित हुन आग्रह गरे ।

‘सबै आउनुस्, सबै एकजुट भएर जाऊँ’, ओलीले भने । ओलीले वामदेव गौतमले आफू एमालेमा फर्कन चाहेको भनि राखेको एकताको भावना निक्कै सकारात्मक भावना भएको बताए । त्यस विषयमा छुट्टै बसेर छलफल गर्ने उनले जानकारी दिए । गौतमको राष्ट्रिय एकता महाअभियान सफल होस् भन्दै ओलीले शुभकामना दिए ।

ओलीले अहिले देशमा एउटा भुईँफुट्टा वर्ग जन्मिएको बताउँदै त्याग, बलिदान र योगदान बिर्सने मात्र होइन, योगदानको समेत अवमूल्यन गर्ने प्रवृत्ति बढेकोप्रति चिन्ता व्यक्त गरे । ओलीले चुनावी तालमेलदेखि पार्टी एकतासम्मको काम गरेर कम्युनिस्ट पार्टीलाई अघि बढाएको भए पनि त्यसलाई टिकाइराख्न नसकेको बताए ।

एउटा उचाइमा पुगेको कम्युनिस्ट आन्दोलनले फेरि एक झट्का खाएको ओलीको भनाइ छ । आन्दोलनलाई देशी विदेशी शक्तिले सिद्धाउँछौँ भनेर लागेका भए पनि असफल भएका ओलीले बताए ।

प्रकाशित मिति: सोमबार, वैशाख २४, २०८१ १६:४२