नवीन सुब्बा निर्देशित फिल्म ‘गाउँ आएको बाटो’मा दयाहाङका किस्सा

A+ A A-

नवीन सुब्बा निर्देशित फिल्म ‘गाउँ आएको बाटो’ आउँदो २५ जेठबाट देश तथा विदेशमा एकसाथ प्रदर्शनमा आउँदै छ । मेन्छ्यायेम पिक्चर्स र बाँसुरी फिल्म्सको ब्यानरमा निर्मित फिल्मको टिजर सोमबार सार्वजनिक गरिएको छ । समाजको वास्तविकतालाई पर्दामा कलात्मक तरिकाले उतार्न माहिर सुब्बाले यसपल्ट पूर्वीपहाडको दुर्गम गाउँले जीवनलाई फिल्ममा देखाएका छन् ।

विकट पहाडी गाउँमा सडक आउँदा त्यसले के-के ल्याउँछ र के-के लैजान्छ भन्ने कथा फिल्मले देखाएको निर्देशक सुब्बाले बताए । यो सबै देखाउन बाउछोरालाई अघि सारिएको छ ।

टोरोन्टो, बुसान, साओ पाउलो, जिओ मामी, बेइजिङलगायत प्रतिष्ठित अन्तर्राष्ट्रिय महोत्सवहरूमा भाग लिएर तारिफ पाइसकेको फिल्ममा दयाहाङ राई, पशुपति राई, प्रसन राई, प्रेम सुब्बा, केशव राई र राज थापालगायतको मुख्य भूमिका छ ।

पूर्वीपहाडी जिल्ला भोजपुरमा छायाकन गरिएको फिल्ममा दया र पशुपति श्रीमान् श्रीमती हुन् भने प्रसन उनीहरूको छोरा हो । गाउँमा सडक आएसँगै बाउछोराको सम्बन्धमा केकस्तो उचारचढाव आउँछ भन्ने कुरा पनि फिल्मले देखाएको छ ।

सार्वजनिक टिजरमा दयाहाङ आफ्नो छोरालाई अनकन्टार खोंचतिर देखाउँदै भन्छन्, ‘त्यहाँनेर अलिअलि देखिएको बयाको खेला तरेर नौ डाँडा काट्नुपर्छ, ठ्याक्कै दुई दिन हिँडनुपर्छ ।’

बालक छोराले भन्छ, ‘म त एकदिनमै पुग्दिन्छु ।’

दयाहाङ आफ्नो अनुभव छोरालाई सुनाउँछन्, ‘एकछिन दुगुरेजस्तो हो । हामी ढाकरभरि सुन्तला भरेर घरबाट हिँडेको दिन त सिम्ले पुल मात्तै बास बस्न पुग्थिम् । फेरि भोलिपल्ट बिहानै हिँड्यो भने बेल्काबेल्काखेरि चतरा पुग्थिम् । त्याँदेखि जम्मै उता मधेस, धरान शहर पनि त्यसको चेपमै छ ।’ यति संवाद सुनेपछि लाग्छ, यो फिल्मले पूर्वपहाडी ग्रामिण जीवनको कथाव्यथा देखाउन खोज्दै छ ।

पछि उनको गाउँमा धुलो उडाउँदै आएको बसलाई हेर्न र स्वागत गर्न गाउँलेहरू फूलमाला लिएर उभिएको, केटाकेटी रमाउँदै बस आएतिर दौडिएको देखाइएको छ ।

फिल्ममा अभिनयपछि बाल कलाकार प्रसनले काठमाडौंमै पढ्ने अवसर पनि पाएका रहेछन् । ‘गाउँ आएको बाटो’ निर्माण टिमले अभिभावकत्व लिँदै उनलाई गोल्डेन पिक हाई स्कुलमा भर्ना गरिदिएको निर्देशक सुब्बाले बताए ।

नवीन सुब्बा र महेश राईले लेखेको फिल्मका निर्माता हङकङ बस्ने अमोद राई हुन् । यद्यपि, फिल्म सामुदायिक लगानीको अवधारणामा बनेको निर्माता राईले बताए । ‘चलचित्र राई समुदायकै कथामा आधारित छ । त्यसैले यो समुदायको अपनत्व होस् भनेर हामीले संसारभर छरिएर रहेका राई समुदायबाट पनि सहयोग लिएका छौँ’, टिजर सार्वजनिक कार्यक्रममा उनले भने, ‘यो राई समुदायको संयुक्त लगानीमा बनेको फिल्म हो ।’

gaun aaeko bato -dayahang -naveen subba1714993424.jpg

निर्देशक सुब्बाले फिल्म सजिलै बुझ्न सकिने, सरल र सबै दर्शककाे पहुँचमा पुग्ने खालको रहेको बताए । ‘महोत्सव भन्नेबित्तिकै जटिल फिल्म भन्ने सोचिन्छ तर महोत्सवमा जाने सबै चलचित्र त्यस्तो कठिन हुँदैनन्,’ उनले भने, ‘धेरै दर्शकले ‘नुमाफुङ’ हेर्नुभएको छ, मन पराउनुभएको छ । गाउँ आएको बाटो नुमाफुङकै विस्तार हो ।’ ‘नुमानफुङ’ सुब्बाले नै निर्देशन गरेको सन् २००२ को निकै चर्चित फिल्म हो ।

फिल्मको टिजर हेरेपछि गायक राजेशपायल राई आफ्नो बाल्यकाल सम्झिँदै ‘नोस्टाल्जिक’ बने । ‘धुलो उडाउँदै गुडिरहेको गाडीको पछिपछि हामी पनि दौडिन्थ्यौँ,’ उनले सम्झिए, ‘टिजर हेर्दा याद आयो ।’

उनले यो फिल्मका लागि राई भाषाको गीत गाएका छन्, जसलाई ताइवानकी हाइडी लीले संगीत गरेकी हुन् । लीसँगको अनौठो अनुभव पनि गायक राईले सुनाए ।

'फिल्मको गीतमा संगीत गर्ने भनिएकाले म भेट्न गएँ । राईलिम्बूजस्तै अनुहार आकार भएकी महिलाले मलाई पर्खिरहेको देखेँ । फिल्मको गीत हो, खासै समय लाग्दैन भन्ने थियो,' उनले सम्झिए, 'तर गीत लय सुनेपछि टारेर हिँडौंजस्तो लाग्ने अप्ठेरो थियो । मेरो जीवनकै सबैभन्दा लामो समय ६ घण्टा लगाएर गीत रेकर्ड गरेको थिएँ ।' राजेशपायलले गाएको उक्त गीत सार्वजनिक भइसकेको छैन ।

फिल्म ‘गाउँ आएको बाटो’ क्यानडाको ‘टोरोन्टो, दक्षिण कोरियाको ‘बुसान’, ब्राजिलको ‘साओ पाउलो’, भारतको ‘मुम्बई’, स्वीडेनको ‘गोटेबर्ग’, चीनको ‘बेइजिङ’लगायत डेढ दर्जन चलचित्र महोत्सवमा सहभागी भई नेपाली दर्शकमाफ आउन लागेको हो ।

प्रकाशित मिति: सोमबार, वैशाख २४, २०८१ १६:४५