इजरायली प्रतिबन्धप्रति अल जजीराको प्रतिक्रिया, 'दमनबाट हामी डगमगाउने छैनौँ'

इजरायली प्रतिबन्धप्रति अल जजीराको प्रतिक्रिया, 'दमनबाट हामी डगमगाउने छैनौँ'

A+ A A-

इजरायलले आफूमाथि प्रतिबन्ध लगाएको विषयमा अल जजीरा मिडिया नेटवर्कले प्रतिक्रिया दिएको छ । इजरायलको कदमलाई उसले ‘अपराधिक कर्म’ भन्दै निन्दा गरेको छ । साथै कुनै पनि देशले स्वतन्त्र प्रेसको दमन गर्नु ‘अन्तर्राष्ट्रिय र मानवीय कानुनको उल्लंघन’ भएको भन्दै चेतावनी पनि दिएको छ ।

‘अल जजीरा मिडिया नेटवर्क यो आपराधिक कदमको कडा निन्दा र भर्त्सना गर्दछ । यसले मानव अधिकार र सूचनामा पहुँचको आधारभूत अधिकारको उल्लंघन गर्छ’, नेटवर्कले आइतबार एक वक्तव्यमा भनेको छ, ‘अल जजीराले संसारभरका आफ्ना दर्शकलाई समाचार र जानकारी प्रदान गर्न जारी राख्ने आफ्नो अधिकारको पुष्टि गर्दछ ।’

गाजा क्षेत्रमा आफ्नो दमनलाई लुकाउने प्रयासका रूपमा इजरायलले स्वतन्त्र प्रेसमाथि दमन गरेको पनि अल जजीराले बताएको छ । पत्रकारलाई सिधै निशाना बनाउनु र हत्या गर्नु, गिरफ्तारी, धम्काउनुजस्ता इजरायली कार्यलाई समाचार बनाउने आफ्नो प्रतिबद्धता कायम रहने पनि उसले जनाएको छ । गाजा युद्धको सुरुवातदेखि १ सय ४० भन्दा बढी प्यालेस्टाइनी पत्रकार मारिएको अल जजीराको वक्तव्यमा उल्लेख छ ।

व्यवसायिक मानकहरूको उल्लंघन गरेको भनी इजरायली अधिकारीले लगाएको आरोपलाई अस्वीकार गर्दै अल जजीराले लेखेको छ, ‘हामी पत्रकार आचारसंहितामा सन्निहित मूल्यप्रति आफ्नो अटुट प्रतिबद्धताको पुष्टि गर्दछौं’, उसले लेखेको छ ।

अल जजीरा कतारको मिडिया नेटवर्क हो । आइतबार प्रधानमन्त्री बेन्जामिन नेतन्याहुले मन्त्रिपरिषदको सर्वसम्मतिमा अल जजीरालाई इजरायलमा प्रतिबन्धित गर्ने निर्णय सार्वजनिक गरेका थिए ।

इजरायलको संसदले गाजामा महिनौंसम्म चलेको युद्धका क्रममा राष्ट्रिय सुरक्षाका लागि खतरा मानिएका विदेशी प्रसारकहरूलाई इजरायलमा अस्थायी रूपले बन्द गर्ने अनुमति दिने कानुन पास गरेपछि आइतबार मन्त्रिपरिषदमा नेतन्याहुले भोटिङ गराएका थिए ।

उनले सामाजिक सञ्जाल एक्समा हिब्रु (इजरायली भाषा) मा पोस्ट गर्दै लेखेका छन्, ‘मेरो नेतृत्वमा रहेको सरकारले उक्साउने खालको च्यानल अल जजीरालाई इजरायलमा बन्द गरिने निर्णय सर्वसम्मतिले लिएको छ ।’

अर्को एक पोस्टमा इजरायली सञ्चारमन्त्री श्लोमो करहीले अल जजीराविरुद्धको निर्णयमा हस्ताक्षर गरेको र यो तुरुन्तै लागू हुने बताएका छन् ।

यो निर्णयसँगै इजरायलसँग लामो समययता चल्दै आएको दुश्मनी थप बढेको अल जजीराले लेखेको छ । यसबाट कतारसँग पनि इजरायलको तनाव बढ्ने सम्भावना छ । कतार सरकारले नै अल जजीरालाई फण्डिङ गर्ने गरेको छ । कतारले गाजामा युद्ध रोक्नका लागि मध्यस्तकर्ताको भूमिका पनि निर्वाह गर्दै आएको छ ।

इजरायल र अल जजीराबीच लामो समयदेखि सम्बन्ध राम्रो छैन । इजरायलले अल जजीरालाई आफूविरुद्ध हमासलाई सहयोग गरेको आरोप लगाउँदै आएको छ । यो कतारी मिडिया नेटवर्कले भने उक्त आरोप अस्वीकार गर्दै आएको छ ।

प्रकाशित मिति: सोमबार, वैशाख २४, २०८१ ०९:०४