अल जजीरामाथि इजरायलको प्रतिबन्ध, कतारसँग तनाव बढ्ने संकेत

A+ A A-

कतारको मिडिया नेटवर्क अल जजीरामाथि इजरायलले प्रतिबन्ध लगाएको छ । प्रधानमन्त्री बेन्जामिन नेतन्याहुले मन्त्रिपरिषदको सर्वसम्मतिमा अल जजीरालाई इजरायलमा प्रतिबन्धित गरिएको बताएका छन् ।

इजरायलको संसदले गाजामा महिनौंसम्म चलेको युद्धका क्रममा राष्ट्रिय सुरक्षाका लागि खतरा मानिएका विदेशी प्रसारकहरूलाई इजरायलमा अस्थायी रूपले बन्द गर्ने अनुमति दिने कानुन पास गरेपछि आइतबार मन्त्रिपरिषदमा नेतन्याहुले भोटिङ गराएका हुन् ।

उनले सामाजिक सञ्जाल एक्समार्फत निर्णय सार्वजनिक गरेका छन् । उनले हिब्रु (इजरायली भाषा) मा पोस्ट गर्दै लेखेका छन्, ‘मेरो नेतृत्वमा रहेको सरकारले उक्साउने खालको च्यानल अल जजीरालाई इजरायलमा बन्द गरिने निर्णय सर्वसम्मतिले लिएको छ ।’

अर्को एक पोस्टमा इजरायली सञ्चारमन्त्री श्लोमो करहीले अल जजीराविरुद्धको निर्णयमा हस्ताक्षर गरेको र यो तुरुन्तै लागू हुने बताएका छन् ।

यो निर्णयसँगै इजरायलसँग लामो समययता चल्दै आएको दुश्मनी थप बढेको अल जजीराले लेखेको छ । यसबाट कतारसँग पनि इजरायलको तनाव बढ्ने सम्भावना छ । कतार सरकारले नै अल जजीरालाई फण्डिङ गर्ने गरेको छ । कतारले गाजामा युद्ध रोक्नका लागि मध्यस्तकर्ताको भूमिका पनि निर्वाह गर्दै आएको छ ।

इजरायल र अल जजीराबीच लामो समयदेखि सम्बन्ध राम्रो छैन । इजरायलले अल जजीरालाई आफूविरुद्ध हमासलाई सहयोग गरेको आरोप लगाउँदै आएको छ । यो कतारी मिडिया नेटवर्कले भने उक्त आरोप अस्वीकार गर्दै आएको छ ।

प्रकाशित मिति: आइतबार, वैशाख २३, २०८१ १७:३८