बाढीको चपेटामा ब्राजिल, ५८ जनाको मृत्यु, ७० हजार विस्थापित

A+ A A-

दक्षिण अमेरिकी देश ब्राजिलको दक्षिणी क्षेत्रमा बाढी र भूस्खलनका कारण अवस्था नाजुक बनेको छ । स्टेट डिफेन्स एजेन्सीका अनुसार बाढीका कारण ५८ जनाको मृत्यु भएको पुष्टि भइसकेको छ भने ७४ जना घाइते भएका छन् ।

बाढीपहिरोसँगै ६७ जना बेपत्ता भएका छन् । यसका साथै ब्राजिलको भीषण बाढीका कारण ७० हजारभन्दा बढी मानिस विस्थापित बनेका छन् । बाढीका कारण ब्राजिलको रियो ग्रान्डे डो सुल राज्यको पोर्टो एलेग्रे शहर सबैभन्दा बढी प्रभावित बनेको छ । यहाँका ३ सयभन्दा बढी नगरपालिका प्रभावित बनेका छन् भने शहर भएर बग्ने गुआबा नदी रेकर्ड ५.०४ मिटर उचाइमा पुगेको छ, जुन सन् १९४१ पछिको सबैभन्दा बढी बाढी हो ।

बाढीले सडक र पुल बगाएपछि मानिसहरूको उद्धारमा समेत समस्या उत्पन्न भएको छ । पोर्टो एलेग्रे विमानस्थल अनिश्चितकालका लागि बन्द गरिएको छ । वर्षाका कारण ३ वटाभन्दा बढी हाइड्रो प्लान्ट बन्द भएका छन् भने पिउने पानीको पनि कमी भएको छ ।

ब्राजिलका ५ लाखभन्दा बढी मानिसले पिउन योग्य पानी पाउन सकेका छैनन् । राष्ट्रपति लुइस इनासियो लुला डा सिल्भाले बाढी प्रभावित क्षेत्रको निरीक्षण गर्दै केन्द्र सरकारले सहयोग गर्ने वचन दिएका छन् । उनले जलवायु परिवर्तनले गर्दा दुःखद परिणाम भोग्नुपरेको उल्लेख गरेका छन् ।

ब्राजिलको मौसम विभागले अलनिनो प्रभावका कारण भीषण वर्षा भएको बताएको छ । रियो ग्रान्डे डो सुलका गर्भनरले बाढीपछिको पुनर्निर्माणका लागि ठूलो चुनौती देखिएको बताएका छन् ।