सर्वोच्च अदालतसँग कांग्रेसको असहमति- न्यायमूर्तिले दलको अनुहार हेरेर फैसला गर्नुभयो

सर्वोच्च अदालतसँग कांग्रेसको असहमति- न्यायमूर्तिले दलको अनुहार हेरेर फैसला गर्नुभयो

A+ A A-

सर्वोच्च अदालतले दलीय चासो हेरेर दुई सरकारको विषयमा फरकफरक फैसला सुनाएको भन्दै गण्डकी प्रदेशबारे भएको फैसलामा नेपाली कांग्रेसले असहमति जनाएको छ ।

गण्डकी प्रदेशसभामा आइतबार विश्वासको मतसम्बन्धी प्रस्तावमाथि छलफलमा भाग लिँदै निवर्तमान मुख्यमन्त्री एवं कांग्रेस संसदीय दलका नेता सुरेन्द्रराज पाण्डेले सर्वोच्च अदालतले रिट निवेदक दल हेरेर फैसला गरेको र त्यसमा असहमति रहेको सुनाए ।

`कोशीको माननीय जाँदा न्यायमूर्तिले एउटा न्याय दिनुभयो । त्यही कुरा गण्डकी प्रदेशबाट अर्को पार्टीको अनुहार लिएर जाँदा तिनै न्यायमूर्तिले अर्को न्याय दिनुभयो । त्यसकारण हाम्रो यसमा गम्भीर असहमति छ । यो संविधानको खिलाप छ,´ उनले भने ।

संसारमै अदालतका निर्णय धेरैपटक बेठीक भएको र त्यो कुनै कालखण्डमा सच्याउने गरिएकाले अदालतले यो नजिर पनि कुनै दिन सच्याउने विश्वास पाण्डेले व्यक्त गरे । उनले अदालतको फैसलामा असहमति राख्न पाइने तर त्यसलाई स्वीकार्ने बताए ।

अदालतले आदेश गर्दा लेखेका कुरालाई अपव्याख्या गर्ने काम भइरहेको पाण्डेले बताए । उनले कांग्रेसलाई नजरअन्दाज नगर्न र निर्णय गर्दा संविधानमा लेखेका कुरा पढ्न सभामुखलाई सुझाए । मुख्यमन्त्री अधिकारीलाई जवाफ फर्काउँदै उनले असंवैधानिक क्रियाकलाप गरेर राजनीतिक स्थायित्व हुन्छ भनेर प्रश्न गरे ।

एमालेका २२, माओवादी केन्द्रका (सभामुखसहित) ८ तथा स्वतन्त्र सांसद राजीव गुरुङको समर्थनमा एमाले दल नेता खगराज अधिकारीले मुख्यमन्त्रीमा दाबी पेस गरेर २५ चैतमा मुख्यमन्त्री नियुक्त भएका थिए ।

तर, त्यसविरुद्ध निवर्तमान मुख्यमन्त्री तथा कांग्रेस संसदीय दलका नेता सुरेन्द्रराज पाण्डेले सर्वोच्चमा रिट दायर गरेका थिए । उक्त रिट सर्वोच्चले खारेज गरेको थियो र सभामुखबाहेक ६० सदस्यीय प्रदेश सभामा बहुमत पुग्ने देखिएको भन्दै अधिकारी नेतृत्वको सरकारलाई वैधानिकता दिएको थियो ।

यो फैसला न्यायाधीश सपना प्रधान मल्ल र सारङ्गा सुवेदीको इजालसले गत १७ वैशाखमा गरेको थियो ।

प्रकाशित मिति: आइतबार, वैशाख २३, २०८१ १६:४२