राप्रपाले गण्डकीका मुख्यमन्त्रीलाई विश्वासको मत नदिने, तटस्थ बस्ने

A+ A A-

राप्रपाले गण्डकीका मुख्यमन्त्री खगराज अधिकारीलाई विश्वासको मत नदिने भएको छ । मुख्यमन्त्री अधिकारीले आइतबार प्रदेशसभा बैठकमा विश्वासको मत मागेका छन् । तर, राप्रपा दल नेता पञ्चराम गुरुङले हालको गठबन्धन अपवित्र रहेको ठहर राप्रपाको रहेको र त्यसैकारण प्रस्तावमा तटस्थ बस्ने निर्णय केन्द्रबाट भएको बताए ।

विश्वासको मतमाथिको छलफलमा भाग लिँदै उनले सत्ता गठबन्धन पवित्र नभएकाले विश्वासको मत नदिएर तटस्थ बस्ने निर्णय पार्टीले गरेको बताए । राप्रपा केन्द्रीय सत्ता गठबन्धनमा सामेल नभएकाले प्रदेशको गठबन्धनमा पनि नबस्ने उनले बताए ।

एमालेका २२, माओवादी केन्द्रका (सभामुखसहित) ८ तथा स्वतन्त्र सांसद राजीव गुरुङको समर्थनमा एमाले दल नेता खगराज अधिकारीले मुख्यमन्त्रीमा दाबी पेस गरेर २५ चैतमा मुख्यमन्त्री नियुक्त भएका थिए ।

तर, त्यसविरुद्ध निवर्तमान मुख्यमन्त्री तथा कांग्रेस संसदीय दलका नेता सुरेन्द्रराज पाण्डेले सर्वोच्च अदालतमा रिट दायर गरेका थिए । उक्त रिट सर्वोच्चले खारेज गरेको थियो र सभामुखबाहेक ६० सदस्यीय प्रदेश सभामा बहुमत पुग्ने देखिएको भन्दै अधिकारी नेतृत्वको सरकारलाई वैधानिकता दिएको थियो ।

राप्रपाले पनि विश्वासको मत नदिने भएपछि संविधानत: मुख्यमन्त्री अधिकारीले विश्वासको मत पाउँदैनन् । तर, सर्वोच्चको व्याख्यालाई आधार मानेर ३० सांसदलाई बहुमत मान्ने र विश्वासको मत पाएको घोषणा सभामुखलाई गर्न लगाउने योजना गठबन्धनको छ ।