दि नेपाल डिस्टिलरिजद्वारा उखु खेती र कृषिको बृहत्तर विकासका लागि विशेष पहलको थालनी

दि नेपाल डिस्टिलरिजद्वारा उखु खेती र कृषिको बृहत्तर विकासका लागि विशेष पहलको थालनी

A+ A A-

मधेश प्रदेशको मुख्य नगदे बाली उखु खेतीको प्रवर्द्धन, यसप्रति किसानहरूको आकर्षण वृद्धि तथा कृषिक्षेत्रको बृहत्तर विकासका लागि दि नेपाल डिस्टिलरिज प्रालिले नेपाल फार्मर्स एड्भाइजरी काउन्सिलसँगको सहकार्यमा विशेष पहल सुरु गरेको छ ।

दि नेपाल डिस्टिलरिजको आर्थिक व्यवस्थापन तथा नेपाल फार्मर्स एड्भाइजरी काउन्सिलको प्राविधिक सहयोगमा केही समयअघि धनुषामा उखुखेती प्रवर्द्धनका लागि सीमान्तकृत समुदायका कृषकहरूको सीप, क्षमता तथा आय अभिवृद्धिसम्बन्धी विशेष अभिमुखीकरण कार्यक्रम आयोजना भयो ।

धनुषा जिल्लाको नक्टाझिजस्थित कृषि विकास निर्देशनालय र कृषि व्यवसाय प्रवर्द्धनको सहयोग तथा तालिम केन्द्रमा सिरहा, सप्तरी, महोत्तरी र धनुषा जिल्लाका अगुवा किसानहरूलाई उखुखेती प्रवर्द्धनका लागि सीपमूलक तथा आय अभिवृद्धि अभिमुखीकरण र प्रशिक्षण कार्यक्रम नेपाल डिस्टिलरिजले आफ्नो संस्थागत सामाजिक उत्तरदायीत्व(सीएसआर)अन्तर्गत आयोजना गरेको हो ।

कार्यक्रममा आयोजक द नेपाल डिस्टिलरिजका प्रमुख प्रशासकीय अधिकृत जनकराज रेग्मीले उखुबाट चिनी उत्पादन मात्र नभई यसका बहुआयामिक गुणबारे किसानहरूलाई एकै ठाउँमा राखेर बुझाइएको र खेतीको विस्तार, प्रवर्द्धन एवं संरक्षण गर्न आफूहरूले यो कार्यक्रम गरेको प्रस्ट पारे ।

रेग्मीले भने, ‘सन् १९५९ देखि नेपालमा व्यावसायिक रूपमा विश्वप्रिय पेय पद्धार्थ उत्पादन गर्दै आइरहेको नेपाल डिस्टिलरिजले स्वदेशकै किसानहरूद्वारा स्वदेशी भूमिमा उत्पादित उखुका उत्पादनहरू खपत गर्दै आइरहेको छ । रम उत्पादनको महत्वपूर्ण कच्चा पदार्थ मोलासेस उखुबाट बन्ने गर्छ । यस कारण पनि उखु किसानहरूसँग कम्पनीको प्रगाढ सम्बन्ध छ । हामी यो महत्त्वपूर्ण सम्बन्धमा जोड दिँदै उखु–किसानहरूको समष्टिगत स्तरोन्नतिमा सहयोग पुर्‍याउन सक्रियताका साथ भविष्यमा दीर्घकालीन साझेदारीपूर्ण कार्ययोजनाहरू अघि ल्याउन प्रतिबद्ध छौँ ।’

कार्यक्रमलाई सम्बोधन गर्दै मधेश प्रदेश भूमि व्यवस्था, कृषि तथा सहकारी मन्त्रालयका सचिव डा. शरणकुमार पाण्डेले उखु किसानले वर्षौंदेखि समयमा भुक्तानी नपाउने, मल नपाउने, बिउ नपाउनेलगायत भोगिरहेका समस्याको सम्बोधन गर्ने तथा उखुखेतीको विकास गर्न मधेशका आठवटै जिल्लालाई समेट्ने गरी प्रदेश उखु विकास बोर्ड गठनका लागि गृहकार्य भइरहेको जानकारी दिए ।

मधेश प्रदेशका भूमि व्यवस्था, कृषि तथा सहकारीमन्त्री गोविन्दबहादुर न्यौपानेले उखु किसानहरूको समग्र माग र आवश्यकतालाई सम्बोधन गर्न प्रदेश सरकार प्रतिबद्ध रहेको उल्लेख गर्दै मधेश प्रदेशका हरेक नगरपालिकामा कृषि ज्ञानकेन्द्र स्थापना गरी कृषि क्षेत्रको विकास गरिने बताए ।

कार्यक्रममा नेपाल फार्मर्स एड्भाइजरी काउन्सिलका प्रबन्ध निर्देशक डा. विमलकुमार निर्मलले मधेश प्रदेशको उखुखेतीको अवस्था, समस्या र सम्भावनाबारे प्रस्तुतीकरण दिएका थिए । उनले नेपालमा उखु उत्पादनमा उच्च प्रतिफलको सम्भावना रहेको तथा गुँड, खुदो, चिनी आदिमात्र नभई उखु पेलेर बाँकी रहेको भागबाट स्पिरिटलगायतका पेय पद्धार्थ बनाउन सकिने प्रस्ट्याए ।

उनले थपे, ‘यसमार्फत अर्बौंको वैदेशिक पेय पदार्थहरू प्रतिस्थापन गर्दै देशको पुँजी बाहिरिनुबाट बचाउन सकिन्छ ।’ यो पवित्र अभियानमा सहकार्यका लागि तयार भएकोमा उनले दि नेपाल डिस्टिलरिजप्रति आभारसमेत प्रकट गरे ।

कार्यक्रममा पूर्वकृषि सचिव एवं नेपाल फार्मर्स एड्भाइजरी काउन्सिलका अध्यक्ष डा. योगेन्द्रकुमार कार्की, काउन्सिलका कार्यक्रम संयोजक नारायण श्रेष्ठ, महेन्द्र पन्त, दिलराज यादव, रामकृष्ण रजक र अनिसुर रहमान अन्सारीलगायतले बोलेका थिए ।

सन् १९५९ मा स्थापित नेपाल डिस्टिलरिज आईएसओ ९००१:२०१५ प्रमाणित कम्पनी हो । यस कम्पनीले विश्वभर सर्वाधिक रूचाइने खुकुरी रम उत्पादन गर्छ । यसबाहेक न्यूड भोड्का, कर्द, एरिस्टोक्र्याटलगायतका उत्पादन पनि गर्दै आएको छ । खुकुरी रम स्वदेशमा नेपालभर उपलब्ध छ भने जापान, दक्षिण कोरिया, हङकङ, इटाली, संयुक्त राज्य अमेरिका र दुबईलगायतका देशमा पनि निर्यात गरिरहेको छ ।

प्रकाशित मिति: आइतबार, वैशाख २३, २०८१ १६:१७