प्रथम ज्ञान कर्णाली हाफ म्याराथनमा राष्ट्रियस्तरका धावक दौडिने

A+ A A-

आउँदो शनिबार २९ वैशाखमा हुने प्रथम कर्णाली हाफ म्याराथनको तयारी अन्तिम चरणमा पुगेको आयोजकले जनाएका छन् । कर्णाली हाफ म्याराथनमा दौडन राष्ट्रिय रूपमा स्थापित धावकहरूले नाम दर्ता गराइरहेका छन् । कर्णाली प्रदेशको राजधानी वीरेन्द्रनगरमा हुन लागेको पहिलो म्याराथन भएकाले स्थापित धावकलाई प्रोत्साहन गरिएको आयोजक रेस नेपालका अध्यक्ष टीएस ठकुरीले बताए ।

नेपालगञ्ज म्याराथनको यात्रा दशक पुगेको अवसरमा दौड संस्कृतिको विकास गर्न भन्दै यस वर्षदेखि कर्णाली हाफ म्याराथन सुरु गरेको हो । दुवै म्याराथनको व्यवस्थापन क्रियटिभ गन्ज मिडिया एन्ड इभेन्ट म्यानेजमेन्टले गर्दै आएको छ ।

पहिलोपटक हुन लागेको कर्णाली हाफ म्याराथनलाई क्रमिक रूपमा दौड संस्कृतिको विकाससँगै पर्यटन प्रवर्द्धन गराउने इभेन्टका रूपमा स्थापित गराउने आयोजकको योजना छ । आसन्न १० राष्ट्रिय खेलकुदलाई प्रवर्द्धन गर्ने गरी कर्णाली हाफ म्याराथन आयोजना रेस नेपालले जनाएको छ । कर्णाली हाफ म्याराथनमा केएल दुगड ग्रुपको ज्ञान खाद्यान्नले टाइटल स्पोन्सरका रूपमा सहकार्य गर्ने भएको छ ।

कर्णाली प्रदेश खेलकुद विकास परिषद्‌सँगको आर्थिक सहयोग साझेदारी तथा अन्य स्थानीय पालिका एवं निजीक्षेत्रको सहयोगमा कर्णाली हाफ म्याराथन हुन लागेको हो । कर्णाली हाफ म्याराथनका लागि सम्पूर्ण संयोजनको जिम्मेवारी वीरेन्द्रनगर नगरपालिकाका निवर्तमान मेयर देवकुमार सुवेदीलाई दिइएको रेस नेपालका अध्यक्ष ठकुरीले बताए ।

त्यसैगरी, कुमारशमशेर थापालाई सदस्य–सचिवको जिम्मेवारी प्रदान गरिएको छ । कर्णाली म्याराथनलाई अन्तर्राष्ट्रिय मान्यता दिलाउने प्रक्रियामा अघि बढाउने र विश्व म्याराथनको छातामुनि लैजाने पनि उनले जनाए ।

पछाडि परेको प्रदेशका रूपमा चित्रण गरिएको कर्णालीमा हाफ म्याराथनमा सहकार्य गर्न पाउँदा खुसी लागेको केएल दुगड ग्रुपका सीईओ प्रदीप छाजेडले बताए । ‘स्वस्थ खाद्यान्न उत्पादनका लागि केएल दुगड ग्रुप जति गम्भीर छ, स्वस्थ रहन जागरण फैलाउने दौडसम्बन्धी इभेन्टमा सहकार्य गर्न पनि उत्तिकै तत्पर छ,’ सीईओ छाजेडले भने । उनले कर्णाली म्याराथनले चाँडै अन्तर्राष्ट्रियस्तरमा पनि ख्याति प्राप्त गरोस् भन्ने शुभेच्छा व्यक्त गरे ।

प्रकाशित मिति: आइतबार, वैशाख २३, २०८१ १५:१७