सेलपे सेवाले सुरू गर्‍याे स्टल एक्टिभेसन कार्यक्रम

A+ A A-

नेपाल राष्ट्र बैंकबाट अनुमतिप्राप्त भुक्तानी सेवा प्रदायक कम्पनी सेलकम प्रालिको सेलपे सेवाले शुक्रबारबाट स्टल एक्टिभेसन कार्यक्रम सुरू गरेको छ । कम्पनीले यो कार्यक्रम आज सिभिल मलमा सम्पन्न गरेको छ भने भोलि लबिम मलमा १० बजेदेखि ५ बजेसम्म गर्ने जानकारी दिएको छ ।

कम्पनीका अनुसार एक्टिभेसनको मूल उद्देश्य ग्राहकहरूसँग अन्तरक्रिया बढाउनु र सेलपे एपबारे यसको प्रयोग र फाइदाहरूको बारेमा जानकारी गराउनु हो । एक्टिभेसनको समयमा सेलपेले स्पट केवाईसी प्रमाणीकरण सेवा प्रदान गर्नुका साथै पहिलो बैंक खाता लिंक भएपश्चात् १ सय रुपैयाँबराबरको फ्रि टपअप आफ्ना ग्राहकहरूलाई प्रदान गर्ने बताएको छ ।

सेलपे सेवा मोबाइल तथा वेब एप्लिकेशन दुवै माध्यमबाट उपयोग गर्न सकिने र यो अत्यन्त द्रुत, सरल तथा सुरक्षित सेवा भएको कम्पनीको दाबी छ ।

सेलपेका अन्य विशेषताहरूमा बिनावालेट/कार्ड कारोबार गर्न सकिने, वास्तविक समयमा भुक्तानी २४सै घण्टा उपलब्ध हुने, चलाउन सरल र सहज, सुरक्षित र न्यून सेवा शुल्कमै काराेबार गर्न सकिने र कारोबार गरेबापत लोयल्टी प्वाइन्ट्स प्राप्त हुने कम्पनीकाे भनाइ छ ।

सम्पूर्ण कारोबार बैंकिङ प्रणालीमार्फत गरिने यस कम्पनीले विभिन्न दूरसंचार सेवा, बिजुली, खानेपानी, टीभी, इण्टरनेटको महसुल भुक्तानी, विभिन्न पसल, रेष्टुरेण्टमा भुक्तानी, एक बैंक खाताबाट अन्य बैंक खातामा रकम स्थानान्तरण, स्वदेशभित्र गरिने मनी ट्रान्सफर, पी२पी, पी२बी, बी२पी र बी२बी आदि वास्तविक समयमा गर्न सकिन्छ । सेलपे सेवा गुगल प्लेस्टोर तथा एप्पल एपस्टोरमा समेत उपलब्ध रहेको कम्पनीले बताएको छ ।