श्रमिकका समस्या, गुनासो र जिज्ञासा समाधान र सुधारका लागि श्रमाधान सेवा सुरु

श्रमिकका समस्या, गुनासो र जिज्ञासा समाधान र सुधारका लागि श्रमाधान सेवा सुरु

A+ A A-

श्रमिकका विभिन्न समस्या, गुनासो र जिज्ञासालाई समाधान र सुधार गर्ने उद्देश्यले सरकारले श्रमाधान सेवाको सुरुवात गरेको छ ।

बुधबार १३५औँ विश्व मजदुर दिवसको अवसरमा स्वदेश तथा विदेशमा रहेका श्रमिकका समस्या समाधान गर्नेगरी श्रम,रोजगार तथा सामाजिक सुरक्षा मन्त्रालले श्रमाधान सेवाको सुरुवात गरेको हो । श्रममन्त्री डोलप्रसाद अर्यालले श्रमाधान सेवाको सुरुवात गरे ।

नेपाली स्वदेश तथा विदेशमा रहेका श्रमिकहरूका समस्या समाधानका लागि मन्त्रालयको कल सेन्टरले मात्रै नपुग्ने भएकाले श्रमाधान कल सेन्टर भन्दा पनि कार्यक्रमको रूपमा श्रमाधानको सुरुवात गरेको अर्यालले बताए । यो मन्त्रालयको बृहत् र व्यावहारिक योजना भएको उनको दाबी छ ।

श्रमाधानले नेपाली नागरिकको श्रम र रोजगार सम्बन्धि बहुआयामिक आवश्यकताको एकद्वार प्रणालीद्वारा सम्बोधन गर्ने उद्देश्य राखेको अर्यालको भनाइ छ । श्रमाधानमा सात क्षेत्रसँग सम्बन्धित कार्यक्रमहरू समावेश गरिएको उनले बताए ।

उनले रोजगार बैंकमा गौरवका आयोजना र नेपाल सरकारसँग रोजगारदाता र श्रमिक जोडिने गरी काम गरिरहेको बताए । उनले श्रमाधानमा सबै नेपालीहरूको श्रमलाई उच्च प्राथमिकता दिँदै समानताको प्रत्याभूति दिने उद्देश्य श्रमाधान समता कार्यक्रम पनि समावेश रहेको बताए ।

सरकारले श्रमिकका समस्या, गुनासो वा जिज्ञासा समाधान गर्न श्रमाधान कल सेन्टरमा फोन गर्दा पैसा नलाग्ने ११४१ फोन नम्बर समेत सार्वजनिक गरिएको छ । समस्यामा परेको श्रमिकले फोनबाट मात्रै नभएर सामाजिक सञ्जाल लगायत अन्य माध्यमबाट सम्पर्क गर्न सक्ने मन्त्रालयले जनाएको छ ।

प्रकाशित मिति: बुधबार, वैशाख १९, २०८१ १२:५४