कर्णालीमा विनाेदकुमार शाहले किन गरे मन्त्रीकाे शपथ बहिष्कार ?

A+ A A-

कर्णाली प्रदेश मन्त्रिपरिषद्ले तीन सातापछि पूर्णता पाएको छ । २७ चैतमा नेकपा माओवादी केन्द्रको समर्थनमा मुख्यमन्त्री बनेका नेकपा एमाले संसदीय दलका नेता यामलाल कँडेलले २१ औँ दिनमा मंगलबार मन्त्रिमण्डल विस्तार गरेका हुन् ।

तर, मंगलबार प्रदेश प्रमुखको कार्यालयमा भने फरक दृश्य देखियो । मुख्यमन्त्री कँडेलले सरकार विस्तारका लागि प्रदेश प्रमुखको कार्यालयलाई जानकारी गराएका थिए । सोही बमोजिम प्रदेश प्रमुखको कार्यालयले शपथ कार्यक्रमको तयारी थालेको थियो ।

लामो समयको रस्साकस्सीपछि कँडेलले सत्ता साझेदार दल नेकपा माओवादी केन्द्रबाट सिफारिस तीन मन्त्री र एमालेबाट सहभागी दुई मन्त्रीसहित एक राज्यमन्त्रीलाई शपथका लागि प्रदेश प्रमुखको कार्यालयमा पत्र पठाएका थिए ।

मुख्यमन्त्री कँडेलको पत्रमा माओवादीबाट आर्थिक मामिला तथा योजनामन्त्री महेन्द्र केसी, सामाजिक विकासमन्त्री वीरबहादुर शाही, उद्योग, पर्यटन, वन तथा वातावरणमन्त्री दुर्गहादुर रावतको नाम उल्लेख थियो ।

यस्तै, एमालेबाट भौतिक पूर्वाधार तथा शहरी विकासमन्त्री शेरबहादुर बुढा, भूमि व्यवस्था तथा कृषि सहकारी मन्त्री विनोदकुमार शाह र भौतिक पूर्वाधार तथा शहरी विकास राज्यमन्त्री गमता विश्वकर्माको नाम उल्लेख थियो ।

मन्त्रिको शपथ लिन तम्तयार भएका माओवादीका मन्त्रीका सामु एमालेका मन्त्रीहरू भने बेखबर जस्तै देखिन्थे । किन भने एमालेले शपथको पूर्वसन्ध्यासम्म मन्त्री हुनेलाई कुन मन्त्रालयको जिम्मेवारी दिने भन्ने विषयमा जानकारी गराएको थिएन ।

एमालेबाट विनोदकुमार शाह, शेरबहादुर बुढा र राज्यमन्त्री गमता विकलाई शपथग्रहण गर्न आउन मुख्यमन्त्री कँडेलले भनिसकेका थिए । सोही बमोजिम नेताहरू मन्त्रीको शपथ लिने तयारी गरिरहेका थिए । जसमा भौतिक पूर्वाधार तथा शहरी विकास मन्त्रीको शपथ लिने तयारी शाहले गरिरहेका थिए ।

सुरुमा गोप्य राखिएको मन्त्रीहरूको नामावली प्रदेश प्रमुखको कार्यालयले सार्वजनिक गर्‍यो । उक्त नामावलीमा भौतिक मन्त्रीको शपथ लिने तयारी गरेका शाहकाे नाम भूमि व्यवस्था, कृषि तथा सहकारीमन्त्रीमा थियाे । यसबाट रुष्ट बनेका उनले शथप ग्रहण कार्यक्रम नै बहिष्कार गरे ।

पार्टीमा वरिष्ठताका आधारमा आफूलाई अपमान गरिएको भन्दै शाहले कृषिमन्त्रीमा शपथ लिन इन्कार गरे । निर्धारित समयमा सुरु भएको शपथग्रहण कार्यक्रममा शाह उपस्थित नभएपछि मन्त्रालयमा स्वागत गर्न तम्तयार भएका कर्मचारी छक्क परेका थिए । मुख्यमन्त्री कँडेलले शाहलाई मन्त्रीमा शपथ लिन खबर गरेको भए पनि कुन मन्त्रालय दिने भन्ने विषयमा प्रदेश प्रमुखको कार्यालयले नाम सार्वजनिक नगरुन्जेल केही भनेका थिएनन् ।

शाहले शपथग्रहणका लागि निर्धारण गरिएको आठ मिनेटअघि मात्रै कृषि मन्त्रीको जिम्मेवारी दिइएको विषय थाहा पाएको दाबी गरेका छन् । शपथको अन्तिमसम्म पनि संसदीय दलमा छलफल नै नगरी आफूलाई कृषि मन्त्री बनाएर मुख्यमन्त्री कँडेलले एकलौटी गर्न खोजेको भन्दै आफू मन्त्री नबन्ने निर्णयमा पुगेको शाहले बताए ।

‘पहिलो त पार्टीमा छलफलको कुरा त परै जाओस् शपथको अन्तिमसम्म पनि मन्त्रालयका विषयमा जानकारी गराइएन,’ शाहले भने, ‘यसमा कुरा पार्टी वरियताको हो, उहाँले यसमा खेलाँची गर्नु भएको मात्रै छैन कुनै छलफलबिनै बाइपास गर्नु भएको विषयलाई भनिरहन पर्छ जस्तो मलाई लाग्दैन, कुरा मन्त्रालय नपाएको होइन, यसमा कुरा आवश्यक छलफलको हो ।’

प्रकाशित मिति: मंगलबार, वैशाख १८, २०८१ १८:२७