संसदीय समितिका सभापतिहरूलाई सभामुखको निर्देशन- विधेयकलाई छिटो पारित गरेर संसदमा ल्याउनू

संसदीय समितिका सभापतिहरूलाई सभामुखको निर्देशन- विधेयकलाई छिटो पारित गरेर संसदमा ल्याउनू

A+ A A-

सभामुख देवराज घिमिरेले संसदीय समितिमा रहेका विधेयकहरूलाई छिटोभन्दा छिटो पारित गरेर संसदमा ल्याउन निर्देशन दिएका छन् ।

मंगलबार संसदीय समितिका सभापति र राष्ट्रिय दलका प्रमुख सचेतक तथा सचेतकहरूसँगको बैठकमा सभामुख घिमिरेले समितिमा रहेका विधेयकहरूलाई पारित गरेर संसदमा ल्याउन निर्देशन दिएका हुन् । उनले समितिमा छलफलका क्रममा रहेका विधेयकहरूलाई संसदको आगामी अधिवेशन आह्वान हुनुभन्दा अघि नै बैठक बसेर टुंग्याउन पनि निर्देशन दिए ।

बैठकपछि सभामुख घिमिरेले बैठकमा समितिमा भएका विधेयकहरूको अवस्थाबारे जानकारी लिएको बताए । उनले आगामी अधिवेशनमा संसदमा आउने अवस्थामा के कति विधेयक छन् भन्ने सन्दर्भमा जानकारी लिएको र आगामी अधिवेशनमा विधेयक ल्याउने गरी तयारी स्वरुप बैठक राखिएको बताए । सभामुख घिमिरेले आवश्यक पर्दा आगामी अधिवेशनलाई सहज रूपमा अगाडि बढाउन राजनीतिक दलका शीर्ष नेताहरूसँग छलफल गर्ने पनि बताए ।

अर्थ समितिका सभापति सन्तोष चालिसेले सभामुखले समितिमा रहेका विधेयकलाई चाँडोभन्दा चाँडो पारित गरेर ल्याउन निर्देशन दिएको बताए । उनले समितिको बैठक बस्दा गणपूरक संख्या नपुग्ने समस्या रहेको भन्दै समितिलाई परेका अप्ठ्याराका बारेमा समिति सभापतिहरूले सभामुखसमक्ष कुरा राखेको बताएइ । उनले आगामी बजेटमा संसदीय समितिहरूलाई पनि पर्याप्त बजेट विनियोजन गर्न ध्यानाकर्षण गराइएको पनि बताए ।

सभापति चालिसेले समिति सभापतिहरूसँग सभामुख घिमिरेले महिनाको एकपटक बैठक बस्ने निर्णय गरिएको पनि बताए ।